राजकर्णिकार पुर्खाया धर्मकृतिबारे खःगु खँ

घनश्याम राजकर्णिकार

जिं च्वयागु 'जिमि पिता पुर्खाया धर्मकृति : जिगु लुमन्ति' च्वसु २०६५ फागुन ८ या 'सन्ध्या टाइम्स' न्हिपती पिदंगु खः। उगु च्वसु पिदनेवं भगवानदास राजकर्णिकारं जिगु व्यक्तित्वय् आघात यायेगु उद्देश्यं 'राजकर्णिकार पूर्खाया धर्मकृति बारे' नांगु च्वसु पिकयादिल। थ्व च्वसु वंगु भाद्र ८ गतेया 'सन्ध्या टाइम्स' य् पिदंगु खः। थुकी जिगु व्यक्तित्वय् घाः लाकेकथं जिं 'सार्वजनिक रुपं क्षमा याचना यायेमाः' धकाः च्वयातःगु दु। उकी च्वयातःगु मखुगु असत्य खँया दसित थन न्ह्यब्वये :

१. भगवानदासं च्वयादी - 'घनश्यामजुया उगु च्वसुया दकलय् न्हापाया धापूकथं हौगःबाहाःया चुकया पूर्वरिखे कुनय्च्वंगु शिलापत्र वय्कःया खुगू पुस्ताया घाँय्घाँय् बाज्या रत्नेश्वर व जीवनरसिंह राजकर्णिकारपिंसं वय्कःपिनिगु आगंछेँया पुनर्निर्माण याःगु धइगु खँय् दकलय् न्हापा वय्कलं थः खुगूगु पुस्ताया घाँय्घाँय् बाज्या खः धइगु छुं आलेख दसि वा प्रमाण बियादीगु मदु।'
अनुसन्धानविद् छत्रबहादुरजुं निष्कर्ष यानाः धयादीगु खँ नं ब्यक्वयेकाः च्वयादिल ।

खुगूगु पुस्ताया घाँय्घाँय् बाज्या रत्नेश्वर खः धइगु छुं आलेख दसि वा प्रमाण बियादीगु मदु धकाः वयकलं च्वयादीगु हकय् छत्रबहादुर कायस्थजुं 'नेपाल संस्कृति', दँ १० ल्याः ८ या पृष्ठ १७ य् ब्वयादीगु नेपाल संवत् ९२५ या शिलापत्र स्वयादीत इनाप याये। थ्व शिलापत्रय् नां दुपिं २४ मध्ये फुकं धइथे जिमिगु सोर्‍ह श्राद्ध यायेबलय् तर्पण बीमाःपिं पुर्खातयुग नां लिसे ठ्याक्क मिले जू ।

थ्व शिलापत्र कथं खनेदुगु खँय् नं छत्रबहादुर कायस्थजुं थथे च्वयादीगु दु, 'थुकिं हौगःबाहा छेँ जीर्णोद्धार याःपिं राजकर्णिकार रत्नेश्वर व जिवनरसिहं निम्ह दाजु किजाया परिवार यक्व तःजि धइगु क्यं। मेगु खँ, शिलापत्रय् कियातइगु मूर्तियात नं 'सालिक' धाइगु खनेदत। दकलय् महत्वपूर्णगु खँ ला हौगः बाहाःया निर्माण सम्बन्धी खः। थ्व शिलापत्रं हौगः बाहाः निर्माण याना वंम्ह दाता थ्वहे हौगः बाहाः छेँ जीणोद्धार यानावंपिं रत्नेश्वर राजकार्णिकार व जिवनरसिंह राजकर्णिकारया पुर्खापिं हे जुइ धइगु क्यं। थुगु ल्याखं थ्व तसकं हे महत्वपूर्णगु शिलापत्र खनेदु ।'

२. आगं छेँया च्वसं दुगु देगःचा जिमि तापा बाज्या गजराजं दयेकूगु विषयय् व देगःचाय् तिकातःगु स्वर्णपत्र बांलाक्क ब्वनादीगु खःला कि मखु धकाः च्वयादिल। थ्व विषय छत्रबहादुर कायस्थजुं ने.सं. १००५ या स्वर्णपत्रया मूलपाठ व भावार्थ 'नेपाल संस्कृति' लय्पौ थ्यंल्याः १८० स थथे च्वयादीगु दु - ''ने.सं. १००५ वैशाख कृष्ण अष्टमी, वृहस्पतिवार कुन्हु श्री ५ महाराजाधिराज पृथ्वी वीर विक्रम शाहदेवया विजयराज्यस यल देश हातिगल विहार आगंछेँय् पोलस पुल दयेकाः सिजःया पोलचं चिनातःगुली लुँ सियाः राजकर्णिकार गजराज, थ्वया पुत्र हेरामानसिहं, वृषराज, रत्नप्रसाद, पौत्र मोतिलाल, भार्या मान्यलक्ष्मी, भलिमचा विष्णुमाया, सिद्धिलक्ष्मी, पौत्री हेरामायापिं खः। थ्व पुण्यं दाताया सकल परिवारया दक्व दुःख मोचन जुयेमाल। संसार आः स्वयेमाःगु खँ छु धासेंलि थ्व स्वर्णपत्रय् ''सएव विहारया तंगल तोल कोलाक्षस चोनम्ह काश्यपगोत्र गजराज'' धकाः स्पष्ट च्वयातःगु दु। थुकिया अर्थ हौगःबाहालय् च्वंम्ह थौंकन्हय् तंगल टोल कोलाछेँय् च्वनाच्वंम्ह धाःगु खः। थथे स्पष्टं उल्लेख यानातःगु दयेक दयेकं भगवानदासं गजराज हौगःबाहालय् च्वंम्ह मखु तंगलय् च्वंम्ह धकाः च्वयेगु सरासर झूठ मखु ला? थुकिं भगवानदास राजकर्णिकार लिपि सःम्ह संस्कृत व पुलांगु नेवाः भाय् सिउम्ह नं मखु धयागु खँ सीदत। वय्कलं गुलि नं राजकर्णिकारया बारे च्वसु च्वयादिल, थ्व फुक्कं अन्वेषक छत्रबहादुर कायस्थजुयागु प्रकाशित च्वसु सुटुक्क ल्ह्ययेगु ज्या जक याःगु खनेदु। थज्याःगु ज्या जिं गबलें मयाना ।

ने.सं. १००५ या स्वर्णपत्रय् गजराजं थः हौगल त्वालं तंगल त्वालय् बसाइँ सरे जुयागु खः धकाः स्पष्टं उल्लेख यानादीगु दु ।

तोडमोडया खँय् ने.सं. ७४८ विष्णुरामं द्यःछेँ जक दयेका थकूगु खः। पुरि धयागु द्यःछेँय् लिपा बःचाधंगु देगःचा थकाइगु खः। थ्व पुरी नांगु देगःचा गजराजं दयेकूगु खः धयागु प्रमाण ने.सं. १००५ या स्वर्णपत्रय् ''दानपति गजराज' धकाः हे स्पष्टं उल्लेख यानातःगु खः। वय्कः गजराजं न्हापा सिजःपातां दयेकागु पलि वय्कलं हे लिपा लुं सिया बिउगु खँ स्वर्णपत्रं प्रमाणित जू ।

३. भगवानदासं च्वयादी, ''हौगः बहालय् च्वंम्ह आनन्द बुद्धया चीभाः व धर्मधातु दुगु छेँ दयेकूम्ह वय्कःया अबु कृष्णबहादुर राजकर्णिकारं वि.सं. २०१० सालय् दयेकाः पलिस्था याःगु खः धकाः दावी याःगु नं पाय्छि मजू। वय्कःया अबु मदयेधुंकाः थौतक नं थ्व आनन्दबुद्धया मन्दिर व छेँयात इलय्ब्यलय् संरक्षण व सम्बर्द्धन यानाच्वनागु दु धकाः दावी याःगु दु। वय्कःयात शर्ण गुथिया छेँ संरक्षण व संवर्द्धन यायेगु ज्या गुथिं बियातःगु नं मदु ।''

थुकिया विषयय् जिमि अबु कृष्णबहादुर राजकर्णिकारं दयेकूगु जिमि अबु मदयेधुंकाः जिं संरक्षण वा सम्बर्द्धनया ज्या यानाच्वनागु खँया प्रमाण थथे दु -

(क) जिमि अबु कृष्णबहादुर राजकर्णिकार वि.सं. २०१० सालय् दयेकूगु खः धयागु खँ हौगबाहाः दुने आनन्दबुद्ध मन्दिर क्वथाय्च्वंगु अभिलेखं न्ववानाच्वंगु दु। थुकी थथे च्वयातःगु दु - ''श्री कुलदेवता।। कृष्णबहादुर कमलपोखरी प्रीति २०१०/९/३ मा ।''

(ख) अबु कृष्णबहादुर मदयेधुंकाः जिं थःगु हे पहलं कृष्ण पाउरोटी प्रा.लि.या नामं संरक्षण व सम्बर्द्धन यानागु खँ थ्वहे आनन्द बुद्ध मन्दिर भवन बैठकय् च्वंगु २०४६ साल भाद्र १३ गतेयागु शिलापत्रं न्ववानाच्वंगु दु। थुकी 'सबै राजकर्णिकार बन्धुबाट यथाशक्य चन्दा संकलन गरी कमलपोखरी निवासी श्री कृष्णबहादुर राजकर्णिकारको अथक प्रयासबाट यो भवनको निर्माण र यहाँ बुद्ध मूर्ति, धर्मधातु तथा चैत्यको स्थापना कार्य २०१० साल पौष ३ गते सुसम्पन्न भएको हो। त्यसपछि मिति २०४६ साल भाद्र ३ गते सम्ममा कृष्ण पाउरोटी प्रा.लि. कमलपोखरीबाट दुइपटक यो भवनको निर्माण जीर्णोद्धार सम्पन्न भएको छ' धकाः च्वयातःगु दु। थ्व अभिलेख निगुलिं 'गजराज राजकर्णिकारको वंशावली' नांगु सफुली पिदंगु खः ।

४. जिं नेपालभाषां च्वयागु च्वसुइ निथाय् जिमिगु शब्द प्रयोग यानागु दु। जिं सिउ कथं समाजया दुने जूसा झी शब्द प्रयोग यायेगु याइ। समाजं पिनेयापिंत थुइकेकथं धायेबलय् जिमिगु व जिमि खँग्वः छ्यलेगु चलन दु ।

लेख धयागु प्रकाशित जुलकि सार्वजनिक सम्पत्ति जुइ। राजकर्णिकार समाज दुने जक जूसा 'झीगु' व 'झी' पुर्खापिं खँग्वः छ्यलेगु याइ। हरेक समाजया ब्वँमिपिंत थुइके कथं च्वयेमालीबलय् जिमिगु, जिमि पुर्खा खँग्वः छ्यलेमाली। थ्वहे चलन कथं जिं थःगु च्वसुइ जिमिगु व जिमि शब्द प्रयोग यानागु खः। जिं च्वसुइ दकलय् न्हापां हे थथे च्वयागु दु - ''थ्व जिपिं राजकर्णिकारतय्गु आगंछे (कुलछेँ) धकाः जिपिं राजकर्णिकारतय्सं संरक्षण यानाच्वनागु दु।'' थुकिं जिपिं व जिमिगुया अर्थ राजकर्णिकार सकलयागु हे खः धइगु प्रस्ट जू ।

५. पोल, पुलि, गजूया विषय भगवानदासं अर्थ हे मथुइक व्याख्या यानादिल। अन्वेषक छत्रबहादुरया कथं विष्णुरामं द्यःछेँ हे निर्माण याःगु खनेदु। च्वय् च्वंगु पुरि दानपति गजराजं दयेकूगु धकाः स्वर्णपत्रं स्पष्ट जुगु दु ।

६. अबुं यानाथकूगु भिंज्यायात लुमंकेगु वा प्रचार प्रसार यागेगु कायपिनिगु धर्म नं खः, कर्तव्य नं खः। थ्वहे धर्म व कर्तव्य पालना यायेगु उद्देश्यं जक च्वसु च्वयागु खः। झी पुर्खापिंसं दयेका थकूगु धार्मिक कृतियात राजकर्णिकार कुलया सकलसिनं जिमिगु धकाः गर्व याये सयेकेमाः, याये फयेकेमाः। थुकी हे झी राजकर्णिकार समाजया अस्तित्व ल्यनाच्वनी ।

७. भगवानदासया प्रतिक्रिया ब्वनेबलय् वय्कःया मनय् शंका वा संकुचित भावना यक्व खनेदु। वय्कलं जि घनश्याम राजकर्णिकारं जिमिगु धाधां थःगु व्यक्तिगत याना काइ न धयागु यक्व शंका ब्वलंगु खनेदु। थुकिं जिगु धापू दु : धार्मिक सम्पदा धइगु राष्ट्रिय सम्पत्ति खः। राष्ट्रिय सम्पत्ति धयागु सुनां थःगु निजी याना काये फइ मखु। जिं च्वसु च्वयागु थःगु पुर्खाया गुण प्रचार यायेत खः। जिं आः तक सुं प्रति द्वेष, इर्ष्या यानागु नं मदु, सुयागुं लोभ यानागु नं मदु। अथे द्वेष, इर्ष्या याइम्ह जूसा सकल राजकर्णिकार कुलया भिं यायेगु तातुनाः 'राजकर्णिकार समाज' नीस्वनेगु ज्या याइ ला ?

More Stories Like this