सेनाया मापदण्डय् विवाद
प्राविधिक रिपोर्टय् कांग्रेसया विरोध
येँ(सन्ध्या टाइम्स)/माओवादी लडाकुयात नेपाःया सुरक्षा निकायय् दुथ्याकेगु वर्तमान मापदण्डयात लचिलो दयेकेमाः धइगु कार्ययोजना प्राविधिक समितिया सिफारिसय् मतभेद ब्वलंगु दु ।
माओवादी सेना समायोजन यायेत गठन याःगु उगु अध्ययन समितिं स्वलाया दुने खुगू शिविरया भ्रमण यानाः तयार याःगु प्रतिवेदन सरकारयात लःल्हायेवं थ्व विवाद ब्वलंगु खः ।
अस्थायी शिविरय् दुपिं नीद्वः माओवादी मध्ये अप्वः धइथें लडाकुतय्सं थःपिं सुरक्षा निकायय् ज्या यायेत इच्छुक दु धाःगु खँ प्राविधिक समितिया दुजः इन्द्रजीत राईनं कनादीगु दु ।
समितिं शिविरया अध्ययन यायेगु झ्वलय् लडाकुतय्त राजनीति यायेगु, सेना लगायतया सुरक्षा निकायय् वनेगु वा मेगु व्यवसाय नालेगु धइगु विकल्प बिउगु खः। विशेष समय जूगुलिं लडाकुतय्त सुरक्षा निकायय् दुथ्याकेत सुरक्षा निकायया विद्यमान मापदण्डयात लचिलो दयेकेमाःगु सुझाव दुगु खँ दुजः राईनं धयादीगु दु ।
तर प्राविधिक समितिइ दुम्ह नेपाली कांग्रेसया नेता डा. रामशरण महतं धाःसा राष्ट्रिय सुरक्षा निकायया प्रचलित मापदण्डय् गुगुं नं हालतय् हीके मफइगु खँ धयादीगु दु।
वय्कलं धयादी, 'लडाकु व्यवस्थापन स्थापित मान्यता कथं यायेगु सहमति जूगु दु, तर स्थापित मान्यतायात विस्थापित यानाः हाकनं मेगु मापदण्ड गुकथं दयेके फ इ?'
उखे नेपाली सेनां न्हापांनिसें सेनाया प्रचलित मापदण्डय् लाःपिं माओवादीया छुं लडाकुयात सेनाय् समायोजन याये फइगु खँ धया वयाच्वंगु खःसा उकी एमाले व कांग्रेसं समर्थन यानाच्वंगु खः ।
तर माओवादीं धाःसा सुरक्षा अंगय् हे थः लडाकुत दुथ्याकेमाःगु अडान कया वयाच्वंगु दु ।
कांग्रेस, एमाले व माओवादीं थुकथं माओवादी लडाकु समायोजन यायेगु खँय् वयाच्वंगु अडानया कारणं थप जटिल समस्या ब्वलने फइगु विश्लेषण थन जुयाच्वंगु दु ।
माओवादी लडाकु समायोजन यायेगु निंतिं उच्चस्तरीय सहमति कायम जुइमाःगु खँ नं विज्ञतय्सं धाःगु दु। समितिया बैठकय् थ्वहे वइगु वालय् च्वनीगु जूगु दु ।
