खुसिबालं नीन्याद्वः प्रभावित

कोशी बाँध मचायेकूगुलिं खुसिबाः

भारतीय पक्षं कोशी बाँध इलय् मचायेकूगु कारणं सप्तकोशी तज्यानाः वःगु खुसिबालं सुनसरीया जनजीवन अस्तव्यस्त जूगु दु । उगु खुसिबालं सुनसरीया प्यंगू गां लौकही श्रीपुर हरीपुर व कुशाहा पूवंक हे डुबे जूगु दुसा अनया जनता सदरमुकाम इनरुवाय् च्वनाच्वंगु दु । म्हिगः निसें वःगु खुसिबालं स्वद्वलं मल्याक छेँ चुइकेधुंकूगु दु । खुसिबाः वयेवं मनूत छेँय् च्वंगु छुं भचा खाद्यान्न व थलबल जक ज्वनाः छेँ त्वःताः बिसिउँ वःगु खः । थुकिं यानाः अन आपालं मस्त वसः तकं मफिसे च्वनाच्वंगु दु ।

खुसिबालं प्रभावित नीन्याद्वः स्वयां अप्वः जनतायात इनरुवाय् च्वंगु स्कूल व क्याम्पसय् पाल तयाः च्वनेगु व्यवस्था स्थानीय प्रशासनं यानातःगु दु । अन आः त्वनेगु लः व खाद्यान्नया अभाव जुयाच्वंगु खँ धाःगु दु । न्यंकनं खुसिबाः वयाच्वंगुिलं त्वनेगु लःया अभाव नं जुयाच्वंगु दु । झिम्ह मनूत थौं तकं सम्पर्कं पिने लानाच्वंगु दु । खुसिबालं पीडिततय् उद्धार यायेत सेना प्रहरी व स्थानीय मनूत परिचालित जुयाच्वंगु दुसां खुसिया लः पाः मजूगुलिं उद्धार ज्याय् समस्या जुयाच्वंगु दु । उद्धारया निंतिं येँनं वंगु निगः हेलिकप्टर नं मौसम स्यनाच्वंगुलिं विराटनगरय् तुं थानाच्वंगु दु । खुसिबालं कोशी टप्पु वन्यजन्तु आरक्ष सुरक्षाया िनंितं तयातःगु त्रीबक्स गुल्म नं डुबानय् लाःगु दु । अथे हे नेपाल टेलिकमया अप्टिकल लिङ्क चुइका यंकूगुलिं पूर्वाञ्चलय् पोष्टपेड पि्रपेड व स्काइ मोबाइल सेवा नं ठप्प जुयाच्वंगु दु ।

थ्वहे झ्वलय् सुनसरीया पीडित जनतायात ग्वाहालि यायेगु िनंितं प्रधानमन्त्री प्रचण्डं थौं दैवी पीडित उद्धार कोषया बैठक सःतूगु दु । उगु बैठकय् पीडित जनतायात उद्धार यायेगु निंतिं माःगु पलाः ल्ह्वनीगु खँ धाःगु दु । उखे पीडित जनताया उद्धार यायेत सुनसरीइ सेना जनपथ प्रहरी व सशस्त्र प्रहरीयात छथासं तयाः परिचालन यायेगु कथं बैठक च्वनाच्वंगु दु । खुसिबालं छेँय् दुगु खाद्यान्न चुइका यंकूगुलिं अन खाद्यान्नया नं अभाव शुरु जूगु दु । खाद्यान्नया अभाव मजुइकेत स्थानीय प्रशासनया कुतलय् राहत मुंकेगु ज्या नं न्ह्याकेधुंकूगु दु । राहत संकलनया निंतिं उद्योग वाणिज्य संघं थीथी क्लबत सकि्रय जूगु दु । खुसिबालं जमुना खुसिया लँ चुइके यंकूगुिलं अन थप राहत सामाग्री थ्यंकेत कठिनाइ जुयाच्वंगु दुसा राजमार्ग नं अवरुद्ध जूगु दु ।