पारस शाहया वक्तव्य
सरकारं नागरिकया हक सुरक्षा मयात
येँ (सन्ध्या टाइम्स)/भारतीय जाली नोट काण्डय् थःगु नं ल्हाः दु धकाः भारतीय व नेपाःया सञ्चार माध्यमतय्सं पित हःगु समाचार 'कपोलकल्पित, मनगढन्ते व विद्वेषपूर्ण' जूगु धासें पुलांम्ह युवराज पारस शाहं थौं उकिया खण्डन यानादीगु दु। थौं छगू प्रेस विज्ञप्ति पिथँसें वय्कलं उगु खण्डन यानादीगु खः ।
'जि छम्ह साधारण नेपाःमिया हैसियतं थःगु जिम्मेवारी निर्वाह यानाच्वनागु अवस्थाय् नेपाःया तरल राजनीतिया लबः कासें विदेशी भूमिपाखें जिगु विरुद्ध बिउगु फुक्कं द्वपंयात जिं खण्डन याना' पारसं जारी याःगु प्रेस विज्ञप्तिइ न्ह्यथनातःगु दु ।
विज्ञप्तिइ नेपाः लगायत विश्वया गुगुं नं कुनय् च्वनाः सामान्य नागरिक जीवन हनाच्वंपिं नागरिकयात जितः थें तुं लाञ्छना व दुराशयुक्त द्वपंत बियाच्वंगु इलय् राज्यं नेपाली नागरिकया हक अधिकार संरक्षण यायेगु थःगु सर्वप्रमुख दायित्व निर्वाह याइ धइगु खँय् नं जि उलि हे विश्वस्त जुया धकाः नं वक्तव्यय् न्ह्यथनातःगु दु ।
