व्यवसायी इमान्दार मजूगुया मेगु दसु

लखौं सवारी साधनय् छ्यलेमाःगु डिजेल इन्धनय् मचिकं ल्वाकछ्यानाः मीपिं व्यवसायीतय्त कारवाही यानां याये मफयाः अन्ततः आयल निगमं मचिकं व डिजेलया भाः छगू हे याना बीवं आः बजारय् मचिकंया खपट कुहां वःगु खँ धाःगु दु। भाः छगू जुइसातकि मचिकंया खपट कुहां वल धाःगुलिं न्हापा डिजेल स्वयां मचिकं दनाच्वंगु इलय् थनया पेट्रोलियम पदार्थ मीपिं व्यवसायीतय्सं डिजेलय् मचिकं ल्वाकछ्यानाः उपभोक्तातय्त जिक्व ठगे यानाच्वंगु खँ अथें हे पुष्टि जूगु दु। उमित थज्याःगु ज्या मयाकेगु लागिं सरकारपाखें छक्वः पेट्रोल पम्पतय्सं मचिकं मी मदइगु नियम हःगु खःसा उकियात उमिसं विरोध यानाः मी दइ याना बिउगु खः। छुं हे उपाय यानाः मजिसेंलि सरकारं मचिकंया भाः हे थकयाः डिजेललिसे ज्वलिंजः याना बिउगु खः। नेपालय् व्यापार व्यवसाय याइपिंके नैतिकता मदुगुया थ्व छगू ज्वलन्त दसु खः। व्यवसायीतय्सं थःपिनि हक हितया निंतिं धकाः आन्दोलन याइ, सेवा बन्द याइ, तर थःपिनि व्यावसायिक नैतिकता क्यनेगु ज्याय् धाःसा उपिं न्ह्याबले चुके जुइ। नेपालय् उपभोक्ता आन्दोलन नं सशक्त मजूनि। गुकिं यानाः थःपिंसं न्ह्याम्हेस्यां ठगे याःसां उकिया प्रतिकार यायेगु शक्ति उपभोक्तातय्के मदु। डिजेलयात आयल निगमं अनुदान बियाः दंकातःगु खः। तर व्यवसायीतय्सं व नं थःपिंसं नयेत स्वइ। थुकिं यानाः मचिकं छ्यलेमाःपिं सर्वसाधारण जनतायात धाःसा तःधंगु आघात लाः वनाच्वंगु दु। देशय् सरकार क्वातु मजू, अले व्यवसायी इमान्दार मजू। उकिया लिच्वः जनतां फये मालाच्वंगु दु ।

More Stories Like this