गुम्हेस्यां उगु प्रतिवेदन च्वयादिल

नेपाल सरकार संस्कृति मन्त्रालयपाखें गुथि संस्थानया औचित्य व नेवाः संस्कृति हनेज्याय् वयाच्वंगु समस्या बारे अध्ययन यायेत नीस्वंगु उच्चस्तरीय अध्ययन समितिं दयेकूगु कार्यदलया संयोजक खः डा. चुन्दा वज्राचार्य। अध्ययन समितिपाखें वंगु मंगलवाः संस्कृति मन्त्री डा. मिनेन्द्र रिजालयात गुगु प्रतिवेदन लःल्हाःगु खः, उगु प्रतिवेदन तयार यायेगु ज्या डा. वज्राचार्यया हे नेतृत्वय् जूगु खः ।

खतुं प्रतिवेदन तयार यायेगु लागिं समितिया संयोजक पवित्र वज्राचार्यंनिसें कयाः सकलें हे दुजःत सक्रिय जुयादीगु खः, तर समितिया हनुमानध्वाखा ज्याकुथी न्हिंन्हिं हे उपस्थित जुयाः प्रतिवदेनया आखः ग्वःग्वः च्वयादीम्ह धाःसा वय्कः हे खः ।

कार्यदल संयोजकया रुपय् वय्कलं नेवाः संस्कृति न्ह्याकीपिं फुक्क हे गुथियात ला नापलाना मदी, तर गुलि नं नापलानादिल फुक्क धइथें गुथियारतय्सं नेवाः जात्रा पर्व न्ह्याकेगु लागिं दां अभाव जुयाच्वंगु हे मू रुपं वय्कःयात कन। नेवाः संस्कृति न्ह्याकेत माःगु उत्साह, भावना व कलाकौशल अझ नं नेवाःतय्के दनि, तर थ्व फुकसित छथाय् तये हइगु आर्थिक शक्ति धाःसा मदयेधुंकल ।

डा. चुन्दा बज्राचार्य स्वयम् थःहे नं भ्वँत व पन्ति तक वनाः अध्ययन यानादिल। अन वय्कलं खंकादिल, भ्वँतया चण्डेश्वरी जात्रा चले यायेत वइगु दां नं आः म्हो जुइधुंकल अले न्हापा न्हापा द्यःया नामय् तयातःगु जग्गा नं आः अन लाः थन लाः मदयेधुंकल ।

सरकारं २०२१ सालय् भूमिसुधार लागू यायेधुंकाः गुथिया जग्गा फुक्कं सरकारं दुकाल। गुथिं चले याना वयाच्वंगु जात्रा पर्व संस्कृति फुक्कं गुथि संस्थानं दां बियाः चले यायेगु व्यवस्था यात। तर बीगु दां धाःसा तसकं म्हो। लखौं खर्च जुइगु जात्राया लागिं द्वःबद्वः दां बियाहइ। नेवाःतय् जात्रा हनेत भ्वय् न्यायेकेमाः, ततःधंगु पुजाआजा यायेमाः, ताःई न्ह्यवंनिसें तयारी यायेमाः। गुथि संस्थानं बीगु ध्यबा ला उँटया म्हुतुइ जी जक खः ।

तर थज्याःगु थाकुगु परिस्थितिइ नं जात्रा चले याइपिं व्यक्ति व गुथितय्सं गय् यानाः ज्या यानाच्वन, व प्रत्यक्ष सीकेगु अवसर वय्कःयात थुगुसी चूलात ।

गुथि संस्थानं थौं तक नं नेवाः जात्रा पर्व सञ्चालनया लागिं सिमसिम महाराजया पालय् बियातःकथंया खर्च उपलब्ध याकीगु जुयाच्वन। डा. वज्राचार्यया कार्यदलं अज्याःगु नां जकया खर्च गन गुलि बियातःगु खः, व फुकया धलः नं खिचे याना काःगु दु ।

वय्कःया कार्यदलय् येँय्या गुथिगाना व थीथी नखःलिसे सम्बन्धित विवरण कायेत भाजु एकाराम सिंहं अध्ययन यानादीगु खः। अथेहे यलया जात्रा पर्व व संस्कृतिया अध्ययन राजेन्द्र मानन्धरं यानादीगु खःसा ख्वप व मकवानपुरया जात्रा पर्व व संस्कृति बारे रास जोशीं अध्ययन यानादीगु खः। थ्व स्वंगुलिं प्रतिवेदनया लिधंसाय् मूल प्रतिवेदन च्वयेगु ज्या डा. बज्राचार्यं यानादीगु खः ।

उच्चस्तरीय समिति गुला तक च्वंसां कार्यदलं ज्या याये खंगु धइगु स्वला ति हे जक खः। तर उलिया दुने नं यक्व हे ज्या जूगु वय्कःया अनुमान दु। धयादी, 'अध्ययन अझ हे सिमधःनि धाःसां जिउ। थ्व छगू विशाल विषय खः। खोज यायेमानिगु ज्या अझ हे बाँकी दनि ।'

नेवाःतय् जग्गा गन गन लानाच्वन, छु छु जुयाच्वन, गय् गय् यानाः हिनामिना जुयाच्वन धइगु खँ मामां वनाबलय् लुयावःगु तथ्यत खनाः थः हे अजूचायाच्वनागु खँ नं वय्कलं कनादी ।

थःपिंसं अतिकं मेहनत यानाः नेवाः प्रतिवेदन दयेकेधुन, तर उकी न्ह्यथनातः थें बिस्कं कोष दयेकाः थुकियात न्ह्यःने मयंकेगु खःसा प्रतिवेदनया अर्थ मदइगु नं वय्कःया धापू दु ।

More Stories Like this