मोति अजिं त्वःतावंगु मोति

मोति अजि (मोतिलानि ताम्राकार) मदुगु झिंस्वन्हु पुल । वय्कःया ख्वाः अझं थ्व नुगलय् उलि हे थिनाच्वंगु दु । मोति अजि व वय्कःया योगदान स्यूपिं सुं छम्हसिनं नं वय्कःयात याउँक ल्वःमंके फइमखु । वय्कलं त्वःताझाःगु मोतिया स्याहार यायेगु जिम्मा आः झीत वःगु दु ।

मोतिलानि ताम्राकार संभ्रान्त परिवारय् ब्वलंम्ह मखु । अले आखः धकाः ब्वनातःम्ह नं मखु । तर वय्कःयाके थःगु भाषा व शिक्षा सम्बन्धी गुगु मतिना दु व तःमि व सःस्यू धाःपिंके तकं लुइके थाकु । एसएलसी निसें एमएतकया नेपालभाषा परिक्षाय् दक्कले अप्वः अंक हयाः पास जूपिं विद्यार्थीतय्त बिइत धकाः थःगु हे नामं स्थापना यानादीगु मोतिलानि सिरपा नेपालभाषा ब्वनीपिन्त गुलि हःपाः व तिबः जूगु दु धकाः धयां मब्याः । थुकिया अनुभव जि थः स्वयमं यानागु दु ।

छम्ह विज्ञानया विद्यार्थी जितः नेपालभाषा ब्वनेत छगू तःधंगु प्रेरणा जूगु खः मोतिलानि सिरपा । आइए, बिए व एमए यानाः लिपा स्वक्वःगु खुसिइ थुगु सिरपा कयाबलय् जितः छगू कथंया दायित्वया आभाष जुल । जितः ताल, मोति अजिं जितः छगू भाला ब्यूगु दु - थःगु भाषा ख्यलय् छुं ज्या यायेत । उगु भाला वय्कः मदये धुंकाः जिं आः लुमंका च्वना । वय्कःया न्ह्यूख्वाः लुमनेवं जितः अझ न्ह्यःने न्ह्यावनेत हौसला ब्यू ।

मोतिलानि सिरपाया छगू ज्याझ्वलय् पासा रवि शाक्यं थः मोतिलानि सिरपा कायेत हे नेपालभाषा ब्वनागु धकाः कन । लुमन, जि जक मखु खनिं मोतिलानि सिरपालं नेपालभाषा ब्वनेत प्रेरित जूम्ह । मोतिलानि सिरपा दर्जनौं मनूतय्सं काये धुंकूगु दु अले अझ गुलि विद्यार्थी पासापिं मोतिलानि सिरपाया हे कारणं मेपिं विद्यार्थीत स्वयां थःम्ह अझ बांलाक ब्वनेमाः धकाः लगनशील जुयाच्वंगु जुइमाः ।

थः आखः मसःसां, थःम्ह ज्यूत्युं मुंकादीगु भचा भचा ध्यबां मोति अजिं सिरपाया गुगु मोति स्वना थकादिल, उगु मोतिया जलं ख्युंयाच्वंगु थौंया न्हि बुलुहुं चकना च्वंगु दु । थुकिया जलं छगू न्हूगु पुस्ता ब्वलनाच्वंगु दु । थुगु हे जतिइ ब्वलना च्वनापिं जिमिसं न्हूगु दिं छन्हु अवश्य हयेतिनि, आर मानन्धरया म्येय् धाः थें --

जिमिसं हयेतिनि, जिमिसं हयेतिनि,
जिमिसं हयेतिनि न्हूगु दिं
वंगु शदिइ ख्वइच्वंम्ह मांयात
न्हूगु शदिइ न्हिइके तिनि
जिमिसं हयेतिनि न्हूगु दिं...

More Stories Like this