पारस शाह आक्रोशित
थःत वःगु द्वपं बारे अबुलिसे सल्लाह
येँ (सन्ध्या टाइम्स)/भारतीय सञ्चार माध्यमं नकली भारु तस्करी याइम्ह धकाः थःत पाः यानाः समाचार सम्प्रेषण याना हःगु खनाः पुलांम्ह युवराज पारस शाह आक्रोशित जूगु दु। छुं हे प्रमाण मदयेक लाथेपाथे थःत बद्नाम याःगु धासें पारसं थ्व तं प्वंकूगु खः ।
नेपालं भारतया निंतिं ब्वःगु छगः विमान अपहरण काण्डय् छम्ह निर्दोष नेपाःमियात बद्नाम याः थें भारतीय सञ्चार माध्यमं थःत बदनाम यानाच्वंसां सरकार मौन च्वनाच्वन धकाः नं पारसं असन्तुष्टि प्वंकूगु दु ।
'थः आः देय्या विशिष्ट नागरिक मखुसें सामान्य नागरिक जक जूगुलिं थज्याःगु काण्डय् थःगु संलग्नता दुगु खःसा सरकारं ज्वनाः भारतयात लःल्हायेमाःगु खः धासें यदि अथे मखुसा सरकारं भारतीय सञ्चार माध्यमं बियाच्वंगु द्वपंयात प्रतिक्रिया बीमाःगु खँ नं वय्कलं कनादीगु दु ।
सिंगापुरं म्हिगः जक नेपाः थ्यंकः वःम्ह पारसं थः सतीपिं लिसे खँ ल्हासें थथे धाःगु खः ।
भारतया उत्तर प्रदेश बहराइचय् भारतीय प्रहरीं जाली नोट सहित ज्वंपिं निम्हं मनुखं बिउगु बयानया आधारय् अनया सञ्चार माध्यमतय्सं पारस शाह नं जाली नोट तस्करीइ संलग्न धकाः समाचार बियाहःगु खः ।
थ्वहे झ्वलय् थःत वःगु द्वपंयात कयाः पारसं थः अबु पुलांम्ह जुजु ज्ञानेन्द्र लिसे नं सहलह यानादीगु खँ सीदुगु दु।
