प्रतिवेदनया सुझाव याकनं पूवंकि

थगुने यँयाः जात्राय् नेवाःतय्सं याःगु आन्दोलनयात संवोधन याये कथं सरकारं गठन याःगु उच्चस्तरीय अध्ययन समितिं म्हिगः थःपिनि प्रतिवेदन सरकारयात लःल्हात। सरकारं समितियात स्वलाया ई बियातःगु खःसां थीथी कारणं यानाः समिति करिब गुला तक च्वन। थुकिया दुने समितिपाखें छगू कार्यदल हे नीस्वनाः अतिकं मेहनतपूर्वक न्यनेकने, बैठक, गोष्ठी, सम्मेलन आदिपाखें सामग्री मुंकाः उगु प्रतिवदेन तयार याःगु खः ।

प्रतिवेदनया सार धइगु नेवाः संस्कृतिलिसे सम्बन्धित थीथी नखःचखः, जात्रा, पर्व न्ह्याकेगु लागिं गुथि संस्थानं यानाच्वंगु ज्या नकारात्मक जूगु कारणं नेवाः संस्कृति न्ह्याकेगु सवालय् थुकिया औचित्य मदु, उकिं थुकिया विकल्पय् नेवाः संस्कृति जक न्ह्याकेगु लागिं छगू बिस्कं संयन्त्रया आवश्यक दु धइगु हे खः। समितिं अज्याःगु संयन्त्र गज्याःगु जुइमाः धइगु खाका दयेकाः उकियात माःगु विधानया मस्यौदा समेत दयेकाः सरकारयात लःल्हाःगु दु। यदि अज्याःगु संयन्त्र दयेके फत धाःसा नेवाःतय्सं न्ह्याका वयाच्वंगु जात्रा पर्व सञ्चालनया जिम्मेवारी व अज्याःगु जात्रा पर्व न्ह्याकेत नेवाः पुर्खां तया थकूगु जग्गा जमिन, तिसा आदि थेंज्याःगु सम्पत्ति नं नेवाःतय्गु हे ल्हातय् वइ। देश राज्य पुनर्संरचना जुयाः न्हूगु स्वरुपय् प्रवेश जुइत्यंगु थ्व इलय् आदिवासी नेवाःतय्सं थ्व हकया माग याइगु स्वाभाविक खः।
उकिं आः राज्यं फयांफछि याकनं हे प्रतिवेदनय् न्ह्यथनातःगु दीर्घकालीन व तत्कालीन मागत पूवंकेगु कुतः यायेमाः। मखुसा हानं आन्दोलन हे जुइगु खँय् शंका मदु ।

More Stories Like this