म्हगसय् मखनागु खन

डा. तुल्सीनारायण श्रेष्ठ

गथांमुगः चःर्‍हे। जिमि गुथि दु। पाः जिगु हे। दाजुकिजापिं नापं भ्वय् नयेमाः। आगमय् द्यः पुजा यायेमाः। पुजा धुंकाः भ्वय् नयाः घौछि आराम याना। छेँय् वःपिं पाहांपिं लिसे भचा खँल्हाबल्हा याना। सनिलय् क्लिनिकय् वनेमाःगु। मं मदया वल। छखे टन्न भ्वय् नयाः सने मं मदुगु। मेखे भचा भचा त्वने नं धुनागुलिं क्लिनिकय् वने जी थें मच्वन। उकिसनं कपालय् हाकु सिन्हः, ह्याउँ सिन्हः गःपतय् ह्याउँ क्वखा क्वखायाः क्लिनिकय् च्वनेगु ला जी थें मताल। म्वःल्हुयाच्वने नं मं मंत। थौं म्हाल धकाः मनं तुनाः छेँनं पिहां वया ।

पत्रिका पसलय् वना। 'सन्ध्या टाइम्स' थौं न्हापलाक हे वयाच्वंगु खना। ६ बजे पाखे जक थ्यनीगु पत्रिका थौं ४ बजे थ्यनाः लय्ताया। जितः ला पत्रिका सदां ४ बजे थ्यंसा गुलि जिउ। पत्रिका ज्वनाः क्लिनिकय् वने दःसा उसाँय् मदुपिं मदइबलय् ब्वनेगु ई दइगु। पत्रिका ज्वनाः छम्ह पासाया पसलय् पिने तयातःगु बेन्चय् फ्यतुनाः पत्रिका ब्वना। आनन्द कया। घौछि दुने पत्रिका ब्वने सिधल। व हे इलय् छम्ह नेता वहे लँ जुयाः वल ।

पुलांम्ह नेता। नेवाः नेता। बर्मू नेतातय् पुचलय् थःगु हैसियतया थाय् दयेके मफुम्ह। पुलां जुयां नं पार्टीइ बल्लाःगु ज्या ज्वने मफुम्ह। मन्त्री जुयां नं व्यक्तित्व विकास मजूम्ह। जि पासा। क्याम्पसनिसेंया। खने साथ ल्हाः ल्वाकाः ज्वज्वलपा धाल। जि डाक्टर जूगुलिं इलय्ब्यलय् जिगु क्लिनिकय् वः। उकिं स्वापू भचा जिमि क्वातु। छगू निगू खँ धुंकाः चाःहिउ वने मखुला धाल। जितः नं थौं ई छ्याये मालाच्वंगु। खः नु धकाः नेता नापं नेताया इभिनिंङ वाकय् वना ।

जिपिं उखे थुखें चाःहिला। नेताया चाःहिलेगु न्हिंन्हिंया थाय् थासय् चाःहिहिउँ जिपिं यलया बागमति सिथय् निर्माणधीन यूएन पार्क थ्यन। पार्कय् च्वनाः भचा फ्यतुनाः गफ यायेगु मन। बांलाःगु थाय् मालेत पार्कय् जिपिं उखें थुखें चाःहिला। जवंखवं घाँय्या ख्यः। अले सिमा। अथे हे न्यागू फिट ति तब्यागु सिमेन्टया ब्लक दयेकातःगु लँ। गनं गनं आराम यायेत मेचत तयातःगु दु। तर प्वंगु धाःसा छगू हे मदु। थाय् मदयाः ज्वः ज्वः मिसा मिजंत ल्यासे ल्याय्म्हत लँ सिथय् सिथय् घाँय् ख्यलय् च्वनाः माया प्रीतिया आनन्द कयाच्वंगु दु। थ्व हे झ्वलय् जिं छज्वः मिसा मिजं छथाय् लँ सिथय् मस्तं आराम यानाच्वंगु खना। भचा तापाकं जिं व मिसायात म्हसिउ म्हसिउ थें ताल। मस्त गफ यानाच्वन। नयेत्वने यानाच्वन। ल्यासेपिं मखु। बाज्यः वनेधुंकूपिं। जिपिं निम्हं गफ यायां व हे लँय् वना। ख्वाःपाः मखं। लिउनें जक खना। मिसां थःत सुचुकेत स्वः थें च्वन। जिं स्वयेगु नं कुतः मयाना। मनय् लुल, खःसां छु याये? थौंकन्हय्या जमाना। यःम्हलिसे चाःहिलेगु, ययेकेगु मानव अधिकार जुल। धात्थें व मिसा वहे खः ला ?

भाःतनाप मिले मजू धाःगु न्यनागु। भाःतं वास्ता मयाः धाःगु। अले मिसां नं वास्ता मतः धाःगु। करंबरं नापं च्वनाच्वंगु हँ। म्ह्याय् अमेरिकाय् ब्वंके छ्वयेत ध्यबा मगानाः मांम्हं छेँ मीगु खँ ल्हाःगु। मिसाया नामय् दनातःगु छेँ। मिजंम्ह नं हाकिम। निवृत्त जुयाः दांप्वः ज्वनावःगु। म्ह्याय्यात अमेरिकाय् छ्वयेत ध्यबा मबिउ हँ। छेँय् ल्यासेम्ह म्ह्याय् दु, ल्याय्म्हम्ह काय दु। स्वयं मिसा बीए ब्वनातःम्ह। अफिसय् प्रथम श्रेणीया हाकिम। जिथाय् नखःचखःबलय् भ्वय् वइबलय् नं गुबसं नापं वःगु मखना। बाइक गया जुइम्ह मिसां गुब्सं मिजंयात तया महः। आदि इत्यादि खँत लुमना वल। भाःतनाप मिले मजुल धायेवं अथे मेपिं मिजंत नाप जुइ जिउ ला? मनय् खँ ल्हाकाः जिपिं न्ह्याः वना। तर अपशोच, न्ह्यःने जिमित न आराम यायेगु थाय् लुल न न्ह्यःने वनेगु लँ। बाध्य जुयाः जिपिं वहे लं लिहां वया। उपिं निम्ह अनं तुं तिनि। शायद मिसां बाध्य जुयाः खः ला वं थःत जिपाखें सुचुके मफुत। जि नापया नाताया नां कयाः न्वतुल। जि ला जिल्ल। जितः ला म्हगसय् मखनागु खना थें जुल।
जिं अले वास्ता मयाः थें यानाः न्ह्याः वना। न्वतुयाः निम्हेसिनं म्ह सिल। मिजं नं बाज्यः वनेधुंकूम्ह। शायद छगू हे अफिसया पासा थें च्वं। मिजं बांलाःम्ह मखु। हाकुम्ह। मिसायात मल्वःम्ह। मिसा वैंश वंसां आः तक उलि हे बांलाःनिम्ह। अवश्य नं मिजं ब्याहा धुंकूम्ह जुइमाः। मचाखाचा नं दुम्ह जुइमाः। तर थ्व दृश्य जिगु लागिं धाःसा हानं तःधंगु सुयातं कने मजिउगु घटना जुया बिल। थज्याःगु सुयातं कने मजिउगु थःगु मानसपटलं तंका छ्वयेमाःगु, थःगु कतःतय्गु यक्व घटना दु। तर विडम्बना अज्याःगु घटनात ल्वःमंका छ्वये धाःसां फइ मखु। झन जक लुमना वइगु।
नापं वःम्ह नेता भाजुं खँ ल्ह्वन। न्यन। कने हे माल। अय्सां नापं च्वंम्ह मिजं वया मिजं मखु धकाः छता जिं धाये हे मफुत। मखुगु खँ मल्हाइम्ह जि। तर वइबलय् जि खःगु खँ ल्हायेगु आँट याये मफुत। खःगु खँ ल्हानाः सुयागुं इज्जतय् हाकु किकेगु ठिक थें मताल। ख ला सुं नं मिसा मिजं अथे पार्कय् नापं च्वनाः खँ ल्हानाच्वन धायेवं उमि अनैतिक सम्बन्ध हे दु धकाः ला धाये फइमखु। अय्सां थः काय म्ह्याय्पिंत नैतिक शिक्षा बीगु इलय् स्वये थः हे अथे अनैतिक कथंया व्यवहार क्यना जुइबलय् शंका यायेगु थाय् धाःसा अवश्य नं दइ ।

ख ला विदेशी समाजय् जक मखु नेपाली समाजय् नं दाम्पत्य जीवन सुथां मलानाः दथुइ त्वाःथलाः ब्यागलं च्वनीपिं मदुगु मखु। अझ थौंकन्हय्या मिसा स्वतन्त्रता, मिसा अधिकारं यानाः तिपू त्वाथलीपिं अप्वः खने दयावःगु दु। पश्चिमी समाजय् अनुसन्धान जूसां थन धाःसा अज्याःगु तिपू जीवन त्वाःदलेगुया अनुसन्धान जूगु खने मदुनि। कारण यक्व दइ। उकी मध्यय् छता मू कारण यौन असन्तुष्टि खः। मनूत न्ह्याक्व हे वैंश वंसां न्ह्याक्व हे बुराबुरि जूसां शरीर स्वस्थ जुयाच्वन धाःसा उमित उमिगु वैंश कथं इलय्ब्यलय् यौन सन्तुष्टि मालाच्वनी। यौन सन्तुष्टि मन्त कि यौन टेन्सन जुइ। तनाव जुइ। जब छेँय् तिपूया दथुइ ल्वापु जुयाः आरोप प्रत्यारोप जुयाः नतुसुतु मदयावनी, छखे छखे द्यनेगु जुयावनी। अले बुलुहुँ उमित यौन तनाव जुया वइ। यौन टेन्सन जुयावइ। सीमा पुलकि यौन मुक्तिया लागिं लँ माली। गुलिसिनं हस्तमैथुन, कृत्रिम मैथुन आदि यानाः तनाव मुक्त जुइसा गुलिसिनं मेम्ह हे यौन पासा माली। ल्यासे ल्याय्म्हत थें सदांया लागिं मखुसां इलय्ब्यलय् यौन टेन्सनं मुक्त जुइत अज्याःपिं तिपूतय्सं छम्ह छम्ह यौन पासा मालीगु अस्वाभाविक मखु। स्वास्थ्यया मिखां धायेगु खःसा अथे यौन टेन्सन जुइकाः थःगु ज्या सुथां मलाका च्वनेगु स्वयां छम्ह यौन पासा दयेकाः यौन मुक्त जुइगु बांलाः। सकलें तिपूतय्सं थ्व खँ थुइकेमाः। छेँय् कलाः भाःत ल्वानाः थःथःगु यौन जीवनपाखें निराश जुयाच्वन धाःसा अवश्य नं उपिं पिहां वनी। लिपा स्वापू त्वाः नं दलेफु ।

तिपूया दथुइ ल्वापु जुइगु मेगु छता कारण यौन दुर्बलता नं खः। मिजनं मिसायात यौन सन्तुष्टि बी मफुत कि मिसा सन्तुष्टि जुइ मखु। इलय् हे अज्याःगु दुर्बलताया वासः यायेमाः। अथे हे तुं मिसापाखें मिजं नं यौन सन्तुष्टि काये मखन कि नं मिजं पिहां वने यः। उकिं मिस्तय्सं नं थुखेपाखे बिचाः यानाः थःत तन्दुरुस्त तयेमाः। मिस्त तन्दुरुस्त दयां नं यदि वया थी मजिउ दीधुंकल धाःसा शरीरय् हर्मोन तन्दुरुस्त दयां नं यदि वयागु योनी गना वनेफु। सुख्खा जुयाः यौन सम्पर्क असम्भव जुइफु। अज्याःपिं मिसातय्सं थःत थुइकाः जिउसा वासः यानाः मजिउसा यौन सम्पर्कया इलय् हावी मजुइगु छुं साधन छ्यलाः यौन, सन्तुष्टि कालबिल यायेमाः ।

More Stories Like this