भारु कारोवारय् पारस
नकली भारु तस्करी यानाः भारत थ्यंकीगु द्वपं
येँ (सन्ध्या टाइम्स)/पाकिस्तानं नकली भारु नेपाः हयाः नेपालं हानं भारतय् तस्करी यानाः थ्यंकेगु ज्याय् पुलांम्ह युवराज पारस शाहया ल्हाः नं दुगु खँ भारतीय सञ्चार माध्यमतय्सं धयाहःगु दु ।
भारतया मध्यप्रदेश राज्यय् नकली भारु सहित ज्वंपिं निम्ह मनूपाखें थ्व खँ पिहां वःगु खँ भारतीय मिडियातय्सं प्रचार याःगु दु ।
५०० तका वंगु नकली भारु सहित अनया मध्य प्रदेशय् छुं न्हि न्ह्यः राजेश गुप्ता व अटिक अहमद नांया निम्ह मनूयात ज्वंगु खः। उमित प्रहरीं बयान काःबलय् उमिसं थःपिनि स्वापू नेपाःया पुलांम्ह युवराज पारस शाहलिसे समेत दु धकाः धाःगु खँ प्रहरीं धाःगु दु ।
उमिसं बिउगु बयानय् धयातः कथं पाकिस्तानं नेपाः वइगु भारु भारतय् थ्यंकेगु थ्व ज्याय् नेपाःया पुलांम्ह मन्त्री सलिम मियाँ अन्सारीया काय् युनुस अन्सारीया नं ल्हाः दु। अन्सारी व पारस शाह दथुइ मंकाः रुपं व्यापारिक ज्याखँ नं जू। अथे खःसां पाकिस्तानया गुप्तचर संस्था आईएसआईं नेपालय् च्वनाः ज्या यायेत खटे यानातःम्ह मनू युनुस अन्सारी खःसा अन्सारीं पारस शाहया शक्ति छ्यलाः नकली भारु भारत थ्यंकेगु ज्या याइगु खः ।
अन्सारीया व्यापारिक कारोबार भारतय् नं दुसा अन नं वयात शंकास्पद मिखां स्वयेगु यानातःगु दु। अन्सारीं व्यापारया नामं हे नेपाः भारत खुल्ला सीमाया लबः कयाः पाकिस्तानं वइगु नकली भारु भारत दुने थ्यंकीगु दावी नं भारतीय अखबारतय्सं याना हःगु दु ।
पाकिस्तानं नकली भारु नेपाः हइगु व वयां लिपा भारतय् यंकेगु थ्व ज्या न्यागू तह जुयाः सम्पन्न जुयाच्वंगु भारतया दावी दु। थुकी मध्यय् आः नकतिनि भारतय् ज्वंपिं राजेश व अहमद स्वंगूगु तहलय् च्वनाः ज्या याइपिं खः धकाः नं धाःगु दु। थ्व ज्याय् पारस शाहया नां नं पिहां वःगुलिं अनया प्रहरीं थुखेपाखे अझ विशेष रुपं मालेकुले यानाच्वंगु खँ नं धाःगु दु ।
