सेना समायोजन हे थौंया मुख्य खँ

माओवादी सेना समायोजन समितिं ज्या याये मफयाच्वंगु खँ सार्वजनिक जुयाच्वंगु इलय् हे वयाः आः सेना समायोजन समितियात पूर्णता बीगु खँ सार्वजनिक जूगु दु।
तत्कालिन प्रधानमन्त्री पुष्पकमल दाहाल 'प्रचण्डं' थःगु पदं राजीनामा बीवं सेना समायोजन समितिया अध्यक्ष प्वनाच्वंगु खः। आः माओवादीया निम्ह दुजः तनाः समायोजन समितियात पूर्णता बीगु ज्या याःगु दु। देशय् माओवादी सेनायात समायोजन मयायेकं देशय् न्ह्यानाच्वंगु शान्ति प्रक्रियायात निष्कर्ष थ्यंकेत थाकुइगु निश्चित खः। अथे जुयाः गुलि फु उलि याकनं सेना समायोजन यायेमाःगु सः थ्वयाच्वंगु खः। तर राजनीतिक पार्टीतय् दथुइ सेना समायोजन यायेगु बारे थीथी कथंया बिचाःत वयाच्वंगुलिं यानाः अझ नं सेना समायोजन यायेगु खँय् विवाद ब्वलने फइगु आशंका जुयाच्वंगु दु ।

विशेष यानाः कांग्रेस व एमालेया छुं नेतातय्सं माओवादी सेनायात सम्बन्धय् लाथेपाथे न्ववायेगु ज्या यानाच्वंगुलिं थज्याःगु आशंका ब्वलनाच्वंगु खः ।

थौं नं शान्ति प्रक्रियाया मू खँ धइगु माओवादी सेना समायोजन हे खः। अले गुलि फु उलि याकनं सेना समायोजन प्रक्रिया न्ह्याकेगु जक मखु उमिगु योग्यता कथं समायोजन यायेमाःगु नं थौंया आवश्यकता खः। गथे माओवादी दुने दुपिं गुलिखे लडाकुत अयोग्य धइगु खँ वयाच्वंगु दु उमिसं थःपिंत नं सेनाय् याकनं समायोजन यायेमाःगु माग नं उलि हे यानाच्वंगु दु। थज्याःगु इलय् थुकी माओवादीं नं संयमता क्यनेमाःगु आवश्यकता दु ।

More Stories Like this