नेवाः देय् दबूया झिंन्याक्वःगु बुदिं छपुलु

वंगु बिहिवाः नेवाःतय् राष्ट्रिय संगठन नेवाः देय् दबू झिंन्यादँ बुदिं स्वयम्भूया आनन्दकुटी विहारय् न्यायेकल। नेवाः देय् दबूया नायः नरेश ताम्रकारया सभापतित्वय् उगु बुदिं ज्याझ्वः जूगु खः। बुदिंया ज्याझ्वः नेवाः देय् दबूया न्वकु धर्मशोभा तुलाधरं लसकुस यानाः न्ह्याकूगु खः। उकुन्हु वा वयाच्वंगुलिं बिचाः याना स्वयां तसकं हे म्हो जक मनूत उपस्थित जूगु खः। अथे खःसां ३ ताः इलय् ब्वनातःगु ज्याझ्वः निघौ लिपा ५ ताः इलय् जूसां सुथांलाक हे न्ह्याःगु खः। झिंन्याम्ह नेवाः न्ह्यलुवातय्त झिंन्याप्वाः हे सुकुन्दा च्याके बियाः मंकाः रुपं उगु ज्याझ्वःया उलेज्या याकूगु खः ।

नेवाः न्ह्यलुवा पद्मरत्न तुलाधरं उगु समारोहय् नेवाः देय् दबू धाथेंया राष्ट्रिय संगठन कथं विकास याना यंकेमाःगु खँय् बः बियादिल। नेवाः देय् दबूया पुलांम्ह नायः व हाल संरक्षक जुयाच्वनादीम्ह नेवाः न्ह्यलुवा मल्ल के. सुन्दरं नेवाः देय् दबू गुगु परिस्थितिइ निर्माण जुयाः आः राष्ट्रिय संगठन कथं थुकिया आपालं दायित्व नं अप्वयेधुंकूगु न्ह्यथँसें न्हापा भाषिक व जातीय संगठन कथं दयाच्वंगु नेवाः देय् दबू आः वयाः छगू स्यल्लाःगु गैर भाषिक व गैर सामाजिक संगठन कथं राजनीतिक अधिकारमुखी आन्दोलनय् हे न्ह्याः वनेमाःगु खँय् बः बियादिल ।

उलेज्या समारोहय् सहभागी डा. सुमित्रा मानन्धरं ई बलवान जूगुलिं इलं मधायेकं छुं याये जी मखु, नेवाःतय्गु नं पाः वइ तिनि धयादिल। वय्कलं मिस्तय्गु प्रतिनिधित्व यायेगु ई गबलय् वइ धइगु खँयात कयाः उगु खँ धयादीगु खः। उकिया लिसलय् नेवाः देय् दबूया संरक्षक मल्ल के. सुन्दरं ला आः नेवाः देय् दबूया नेतृत्व यायेगु पाः हे डा. सुमित्रायागु जुइमा धकाः सुवाः बियादिल ।

नेवाः देय् दबूया मेम्ह संरक्षक लक्ष्मण राजवंशीं थःत छ्वयाहःगु ब्वनापती 'भाजु लक्ष्मण राजवंशी' धकाः जक उल्लेख यानाः छ्वयाहःगु व गनं हे 'नेवाः देय् दबूया संरक्षक' धकाः न्ह्यथना मतःगुलिं यानाः गनं मेम्ह हे लक्ष्मण राजवंशीया कार्ड जकं थःत लाः वल ला धकाः च्वनागु खँ न्ह्यथनादिल। वय्कलं स्थापनाकालय् स्वयां नं आः नेवाः देय् दबू हाथ्यां जाःगु घडीइ लायेधुंकूगु खँ कनादिल। वय्कलं नेवाः स्वायत्त शासन मवल धाःसा छु यायेगु धइगु चिउताः तयाः न्ह्यसः नं तयादिल ।

सभापतिया थासं न्ववानादीम्ह नेवाः देय् दबूया नायः नरेश ताम्रकारं थःपिनि न्हापांगु तःमुँज्या निसें कुतः यानाच्वनागु नेवाः देय् दबूया ज्याकू भवन दयेकेगु निंतिं थाय् मालेगु झ्वलय् आः पुलांगु नगरपालिका च्वनीगु धर्मपथया थाय् चूलायेत्यंगु व अन भवन दनेगु निंतिं प्रत्येक नेवालं म्होतिं छतका दां आर्थिक ग्वाहालि यायेत आह्वान यानादिल ।

धनकुटा महाधिवेशनं झिंन्याम्ह सल्लाहकार तयेगु ब्यवस्था याःकथं झिन्याम्ह सल्लाहकारपिं मध्ये वय्कलं न्याम्हेसिया नां अनं हे घोषणा यानादिल। वय्कःपिं खः - पद्मरत्न तुलाधर, मोहनकृष्ण डंगोल, डा. पुष्पराज राजकर्णिकार, डा. सुमित्रा मानन्धर व नरेन्द्रभक्त हाडा। मेपिं झिम्ह सल्लाहकारया नां लिपा घोषणा यायेगु नं नायः ताम्रकारं जानकारी बियादिल ।

नेवाः देय् दबूया थुगु झिंन्याक्वःगु बुदिं समारोहय् मिस्त व मिजंत यानाः आपालं नेवाः ब्यक्तित्वत सहभागी जुयादीगु खः। वा वःगुलिं धाःसा ज्याझ्वः छुं भचा प्रभावित जुल। अथे खःसां आनन्दकुटी विद्यापिठया हल हे जायेक धइथें सहभागीत दुगु व चीहाकलं हे ज्याझ्वः क्वचायेकाः छगू न्ह्यइपुगु तुच्चा यासें समपन याःगु खः ।

नेवाः देय् दबूया न्हूगु नेतृत्वं छम्ह ज्यापु मिसा मचायात महासचिव कथं प्रतिष्ठापित यानागुयात नेवाः देय् दबूया नायलं थःपिनि उपलब्धी कथं ब्याख्या यानादीगु खः। अथेहे देय् दबूया थीथी गतिविधिइ उलि हे संलग्न जुया वयाच्वंपिं नेवाः ब्यक्तित्वत अन खने दुगु खः। नेपालभाषा न्हिपौ सन्ध्या टाइम्सपाखें नेवाः देय् दबूया पुलांपिं नायः एवं आःया संरक्षकपिं लक्ष्मण राजवंशी व मल्ल के. सुन्दरया धापू व स्वयम नेवाः देय् दबूया नायः नरेश ताम्रकारया विचाः नं दुथ्याकाः तँसापौ पिथनाः अन इना बिउगुयात नं सहभागीतय्सं च्वछात ।

थनिं झिंन्यादँ न्ह्यः येँय् नेवाःतय्गु न्हापांगु राष्ट्रिय सम्मेलन यासें नेवाः देय् दबू स्वनेगु ज्या जूगु खः। अबलय् देय् दबूया पलिस्थां नेवाःतय् दथुइ तःधंगु आशाया लहर हया बिउगु खः। देय् दबुलिं थःगु स्थापना काल लिपा खास यानाः स्वनिगलं पिने नेवाः संगठन विस्तार यायेगु व नेवाः अधिकार बारे पिनेया नेवाःतय्त सचेत यायेगु ज्याय् तःधंगु भूमिका म्हितूगु दु ।

More Stories Like this