आन्दोलनकारीतय् समर्थन

उपराष्ट्रपति प्रकरण झन जटिल मोडय्

येँ(सन्ध्या टाइम्स)/उपराष्ट्रपति परमानन्द झां खय् भासं शपथ नं मकायेगु व राजीनामा नं मबीगु निर्णय यायेवं आः वय्कःया पदीय दायित्व व वय्कलं ल्ह्वनाच्वंगु भाषिक अधिकारया खँ छु जुइगु धकाः थन न्ह्यसः ब्वलंगु दु। संवैधानिक रुपं वय्कःयात पदमुक्त यायेगु तयारी जुयाच्वंसां भाषा आन्दोलनया न्ह्यलुवातय्सं धाःसा वय्कलं ल्ह्वनाच्वंगु मुद्दायात समर्थन याःगु दु ।

नेपाल आदिवासी जनजाति महासंघया अध्यक्ष पासाङ शेर्पां उपराष्ट्रपति झायात थःपिंसं थःगु हे मांभाय् मैथिलीं शपथ ग्रहण यानादिसँ धकाः सुझाव बियागु खँ कनादिसें वय्कःयात मांभासं शपथ ग्रहण यायेगु अवसर बीमाः धयादिल।
नेपालभाषा मंकाः खलःया नायः पद्मरत्न तुलाधरं उपराष्ट्रपतिया पलाखं भाषिक एकाधिकारवाद विरोधी आन्दोलनयात तिबः बीगु जूगुलिं उकियात समर्थन यायेमाः धयादिल। उपराष्ट्रपतियात खय् भासं शपथ कायेमाः धकाः सर्वोच्च अदालतं हे आदेश जारी यायेधुंकूगु खःसां विद्रोहीतय्सं अदालतया फैसला धकाः पिया च्वनी मखु धयादिल। वय्कलं धयादिल, 'आः संविधान संशोधन यानाः जूसां मांभासं शपथ ग्रहण यायेगु व्यवस्था जुइमाः ।'

अथे हे जनजाति महासंघया पुलांम्ह महासचिव डा. ओम गुरुङं यदि हिन्दीं शपथ ग्रहण यायेगु गलत खःसा वय्कःयात शपथ ग्रहण जुयाच्वंगु इलय् हे पने माःगु खः, आः मुद्दा लाःगुलिं जक थपाय्धंगु बखेडा पिकयाच्वंगु पाय्छि मजू धयादिल। उपराष्ट्रपतिं कयाच्वंगु भाषिक अडान सिबें राजनीतिक अडान खः धासें थपाय्धंगु विवाद वयेधुंकाः आः सदन सक्रिय जुयाः तुरुन्त संविधान संशोधन यायेमाः धयादिल ।

अथे हे जनजाति बुद्धिजीवी डा. कृष्णबहादुर भट्टचनं थ्व प्रकरणं सर्वोच्च अदालत व अन्तरिम संविधान निगुलिं बाहुनवादी खः धइगु थुकिं क्यं धयादिल। वय्कलं खस भासं जक शपथ कायेमाः धाःगु नं ठीक मखु अले नेपाः दुनेया थःगु हे मांभासं शपथ मकासे हिन्दीं शपथ काःगु नं ठीक मजू धयादिल ।

उखे सत्ताय् संलग्न मधेशवादी नेतातय्सं थौं नेकां सभापति गिरिजा प्रसाद कोइराला नापलानाः थुकिया निकास पिकायेत इनाप याःगु दु। सभापति कोइरालां सदनया गतिरोध चीकाः संविधान संशोधन यायेत मेगु दललिसे नं सहलह यायेगु आश्वासन बियादीगु दु ।