उपराष्ट्रपति झाया पलाः

उपराष्ट्रपति परमानन्द झां सर्वोच्च अदालतं जारी याःगु आदेशयात हाथ्या बिसें थम्हं खय् भासं शपथ ग्रहण नं मयायेगु व राजीनामा नं मबीगु निर्णय यानाः देशय् ब्वलनाच्वंगु भाषा विवादयात छगू बिस्कं मोड बियादीगु दु। वय्कलं थम्हं तुं पदं राजीनामा मबिउगु कारणं आः वय्कःया पद व हैसियत छु जुइ धइगु कानुनी व संवैधानिक विवाद पिहां वःगु दु। सर्वोच्चं आदेश बीवं जक वय्कः पदमुक्त जुइ मखु। उकिया निंतिं संसदपाखें माःगु प्रक्रिया न्ह्याके मानि। तर थौकन्हय् संसद धाःसा चले जुयाच्वंगु मदु। यदि संसद चले यायेगु खःसा अन उपराष्ट्रपति जक मखु राष्ट्रपतिया खँ नं वइ। वय्कःयात संसदं चीकेगु ज्या मयाःतले देशय् न्हूम्ह उपराष्ट्रपति हयेगु स्थिति नं मदु ।

उखे वय्कःयात खय् भासं शपथ ग्रहण मयाःगु हे कारणं पदमुक्त यायेगु सरकारी निर्णयया कारणं तराईलय् आन्दोलन तच्वयेका बीगु यक्व खतरा दु। आः हे अन मधेशी विद्यार्थीतय्सं सतक क्वाकेगु शुरु याना हयेधुंकूगु दु। थ्व ल्याखं स्वयेबलय् सरकार नं आः तसकं मछिंगु अवस्थाय् लाः वंगु दु ।

न्ह्यागुसां उपराष्ट्रपतिया थुगु शपथ ग्रहण प्रकरणं देशय् तज्याये मफयाच्वंगु भाषाया विवादयात पूवंक हे तछ्याना बिउगु दु। थ्व देशय् खस बाहेक मेगु भासं शपथ ग्रहण याइपिंत उपराष्ट्रपति हे जूसां सजाय बीगु जुयाच्वन धइगु दसि थुकिं क्यना बिउगु दु। नेपाःयात बहुभाषिक मुलुक धयां नं थन भाषिक एकाधिकार राज्यया स्वंगुलिं हे अंगय् कायम दनि धइगु खँयात नं थुकिं उजागर याना बिउगु दु।

More Stories Like this