हाकनं खनेदत लाय्कू लागाय् विकृति

नरेन्द्रमान श्रेष्ठ 'गोंगजु'

छत्रपाटीय् च्वनाच्वंम्ह धरानया कल्पना गुरुङयात थः ब्याय्फ्रेण्ड नाप न्हूसतकय् तयातःगु ठेलाया फास्टफुड पसलय् वया मःम नयेगु न्ह्यइपुसेच्वं हँ। अथे बाग बजाःया सत्य मानन्धरयात न थः पासापिं नापं वयाः न्हूसतकया ठेलाय् तयातःगु फास्टफुड पसलय् चाट मःम नयेगु न्ह्यइपुसे च्वं हँ। येँया नुगःचु न्हूसतक दमकल न्ह्यःनेया सतकय् करिब झिंन्यागूति ठेला फास्टफुड पसःत दु। निभाः लुकुंबिया सन्ध्या ई जुल कि अन ठेलाय् फास्टफुड पसःत धमाधम खने दयावइ। न्हूसतक थेंज्याःगु व्यस्त सतक क्वत्यला नं ठेला फास्टफुड पसःत तयेगु यानाच्वंगु दु। बहनी जुल कि अन ठेला फास्टफुड पसःया चहल पहल शुरु जुइ। थौंकन्हय् न्हूसतक लागाय् जक मखुसे स्वनिगःया थीथी थासय् थज्याःगु ठेला फास्टफुड पसःत पानीपुरी पसः, चटपट चाट पसःत अव्यवस्थित रुपं सतक नापं क्वत्यलाः पसः तयेगु यानाच्वंगु दु ।

स्वनिगलय् थज्याःगु फास्टफुड पसःत न्यना वनाच्वंगु दु। अले थज्याःगु फास्टफुड पसलय् मःम चाटनिसे चिकेन रोस तकं न्यायेगु दु। थज्याःगु फास्टफुड पसलय् बहनी जुल कि ल्यासे ल्याय्म्हतय् भीड खनेदइ। थज्याःगु पसलं यानाः न्हूसतक लागाय् ट्राफिक व्यवस्था नाप अस्तव्यस्त जुइगु जुयाच्वंगु दु। मोटर चले जुइगु सतकय् ठेला फास्टफुड पसःत न्ह्यनेलाथय् तया तःसां सम्बन्धित निकाय सरोकारवालातय् धाःसा ध्यान वंगु खनेमदु ।

ट्राफिक जामं यानाः ल्वगि ज्वनावःगु एम्बुलेन्स तकं लँय् दथुइ जामय् लानाः च्वनेमाःगु अवस्था दु। न्हूसतक लागाय् थज्याःगु अवस्था वयाच्वंगु कारण खः अन तयातःगु ठेला फास्टफुड पसःत व अनया नाइट मार्केट खः ।

बसन्तपू लागाय् तयातःगु नाइट मार्केटय् चहलपहल शुरु जुइ अले न्हूसतकय् ठेला फास्टफुड पसःत धमाधम खनेदइ। खास यानाः न्हूसतकया फास्टफुड पसःत ग्राहक धाइपिं मध्यम वर्गया ल्यासे ल्याय्म्हपि हे खः अले बजाः चाःहिउ वइपिं अप्वः धइथें थनय् ग्राहकत खः धाःसा जिउ। खास यानाः बसन्तपू लागाय् सञ्चालन जूगु नाइट मार्केटं यानाः थज्याःगु ठेला फास्टफुड पसःत नं धमाधम खने दयावःगु धाःसां जिउ ।

शुरु शुरुइ थज्याःगु ठेला फास्टफुड पसःत लाय्कु लागाय् तयेगु यानाच्वंगु खः। थज्याःगु पसःत यानाः हे लाय्कुया बसन्तपु लागाय् ल्यासे ल्याय्म्हतय्गु चहलपहल खने दयावःगु ख धाःसा जिउ ।

अन तयातःगु ठेला फास्टफुड पसःतय्सं याना लाय्कू लागा अस्तव्यस्त फोहोर, दुर्गन्धित जुयाः अनया वातावरण नाप दुषित जुया वःगुली अनया स्थानीय वासीपिंसं बसन्तपू लागां ठेला फास्तफुड पसःत चीकूगु खः ।

विश्व सम्पदाय सूचीकृत जुयाच्वंगु सम्पदा स्थलय् थज्याःगु कथंया छु नं फुटपाथ पसः तयेगु ज्या निषेध यायेमाः धकाः धाइपिं न यक्व हे दु। विश्व सम्पदास्थल अस्तव्यस्त, अव्यवस्थित फुटपाथ पसःत सञ्चालन याके मजिउ धकाः स्थानीयवासी, महानगरपालिका व प्रशासनं अन तयातःगु फास्टफुड पसःत नाप बसन्तपू लागाय् चायेकातःगु नाइट मार्केटयात छगू इलय् चीकेधुंकूगु खः। तर नेपाःया कमजोर कानुन, राजनैतिक हस्तक्षेप, थीथी राजनैतिक पार्टीतय्गु थः कार्यकर्तात लहीगु छगू माध्यम फुटपाथ पसःत जुयाच्वंगुलिं नं राजनैतिक पार्टीतय्गु प्रत्यक्ष हस्तक्षेपं यानाः बसन्तपू लागाय् स्थानीय वासीत जाना चीकेधुंकूगु नाइट मार्केट नाप फुटपाथ पसःत हाकनं तयेहःगु खः। येँया लाय्कू लागाय् तयातःगु फुक्क पसःत नाइट मार्केट चीकेधुंकाः अन छुं ईया निंतिं सफा स्वच्छ, शान्त सुन्दर खने दयेधुंकूगुलि हाकनं अनया फुक्क धइथे फुटपाथ पसःत तये हयेवं हाकन अन भीडभाड अप्वया वनाच्वंगु दु। थुकीया नापनापं लाय्कु लागाय् फोहोर अप्वया वनाच्वंगु दुसा अन थीथी विकृति विसंगतित खने दयाच्वंगु दु ।

जब बहनी जुइ अले हनुमानध्वाखा लाय्कू लागाय् ल्यासे ल्याय्म्हतय्गु भीडभाड खने दयावइ। अले सु सु चरित्र मदुपि ल्यासे ल्याय्म्हतय्सं अश्लिल क्रिया यानाच्वंगु नं दइ। थज्याःगु ज्या याना अन विकृति अप्वया वनाच्वंगु दुसा अनया वातावरणत दुषित जुयाच्वंगु दु। अनय् स्थानीय क्लबया स्वयम सेवकतय्स देगः देगलय् च्वनाः सुलाः सुलाः अश्लिल क्रियाकलाप यानाच्वपिं ल्यासे ल्याय्म्हतय्त अन चीकेगु ज्या याना मच्वंगु नं मखु तर नं अय्नं थज्याःगु ज्याया नियन्त्रण धाःसा जूगु खनेमदु ।

विश्व सम्पदा सूची सूचीकृत सम्पदास्थल हनुमानध्वाखाः अले विश्वय् म्वाःम्ह देवी कुमारी धकाः माजुया थाय् गन विदेशी पर्यटकत दँय्दसं ग्वाःग्वाः वइगु येँया एतिहासिक थाय्, सांस्कृतिक धरोहर लाय्कू लागा सफा स्वच्छ, शान्त सुन्दर व व्यवस्थित यायेगु झी सकस्या कर्तव्य खः। स्थानीयवासी, महानगरपालिका, प्रशासन, राजनैतिक पार्टीत, स्थानीय क्लबत, सामाजिक संघ संगठनत, सञ्चारकर्मीतय्गु सकस्या दायित्व खः। देया राजधानी येँया नुगःचु, ऐतिहासिक, सांस्कृतिक, धार्मिक, पर्यटकीय नगर सम्पदास्थलय् छु नं कथंया फुटपाथ पसःत हेभी सवारी साधनत, ध्वनी प्रदुषण जुइगु छु नं कथंया सभा समारोह मेला इत्यादियात निशेष याना तयेमाःगु मखुला? थुकी सम्बन्धित सरोकार वालातय्सं चिउताः तयाः याकनं पलाः न्ह्याकेमाःगु खनेदु ।

More Stories Like this