जिं पुनः शपथ काये मखु: झा

उपराष्ट्रपतिं शपथ नं मकाइगु, राजीनामा नं मबीगु

येँ (सन्ध्या टाइम्स)/उपराष्ट्रपति परमानन्द झां थम्हं खय् भासं शपथ नं मकायेगु व राजीनामा नं मबीगु घोषणा यानादीगु दु। वय्कःयात थौं तकया दुने पुनः खय् भासं शपथ कायेत सर्वोच्च अदालतं आदेश बियातःगु खः। तर थौं छगू पत्रकार सम्मेलन यासें वय्कलं थ्व घोषणा यानादिल। थम्हं हानं शपथ कायेगुया छुं नं औचित्य मदु धासें वय्कलं मातृभाषां शपथ याये दइगु सम्बन्धी संविधान संशोधनया प्रस्ताव संसदं पारित जुल धाःसा थम्हं हानं शपथ कायेगु खँ नं वय्कलं कनादिल ।

यदि वय्कलं थौं ४ बजे तक नं खय् भासं शपथ मकाल धाःसा वय्कःया उपराष्ट्रपति पद स्वतः मदइगु फैसला सर्वोच्चं यानातःगु दु ।

थौं सुथय् च्वंगु मन्त्रिपरिषदया बैठकं वय्कःयात सर्वोच्चया आदेश कथं खय् भासं शपथ नयेत औपचारिक पौ छ्वःगु दु। उगु पतिइ थौं सनिलया ४ बजे शपथया ई क्वःछिनातःगु दु। थुगु निर्णय याःगु थौंया मन्त्रिपरिषद् बैठक मधेशवादी मन्त्रीतय्सं धाःसा बहिष्कार याःगु खः। सरकारं उपराष्ट्रपतियात खय् भासं हे शपथ कायेत इनाप याइगु खँ सीवं मधेशवादी मन्त्रीतय्सं बैठक बहिष्कार याःगु खः ।

अथे हे शपथ ग्रहण ज्याझ्वःया निंतिं माःगु व्यवस्था यायेत राष्ट्रपति ज्याकूयात नं पौ छ्वयेत्यंगु दु। अथे खःसां थ्व पौ उपराष्ट्रपतिया आधिकारिक धापू वयेधुंकाः जक छ्वइगु खँ धाःगु दु ।

सरकारं व राष्ट्रपतिं उपराष्ट्रपति झायात खय् भासं शपथ कायेत सुझाव बियाच्वंगु इलय् मधेशवादी दलत व भाषिक अधिकारवादीतय्सं धाःसा खय् भासं शपथ मनयेत इनाप यानाच्वंगु दु ।

उपराष्ट्रपतियात खय् भासं शपथ कायेमाः धकाः सर्वोच्चं याःगु फैसला विरुद्ध थौं नं मधेशीवादी विद्यार्थी संगठनतय्सं तराईया थीथी जिल्ला बन्द याःगु दु। विद्यार्थीतय्सं थौं जनकपुर, राजविराज, सर्लाही, सप्तरी, महोत्तरी, रौतहट, भैरहवा आदि जिल्लाय् लँय् टायर च्याकाः प्रदर्शन यानाच्वंगु दु। उमिसं उगु लागाय् पसः, बजाः, शिक्षण संस्था, कलकारखाना आदि फुक्क ठप्प याना तःगु दु। बन्द यानाच्वंपिं निम्ह सभासद् सहित झिंन्याम्ह कार्यकर्तायात प्रहरीं ज्वंगु दु ।