देशघाती नेतातय्त मौका बी मजिल

डी. आर खड्गे

झीगु देय विकास मजूगु जक मखु यक्व स्यनाच्वंगु कारण खः, नेतात विदेशी शक्तिया न्ह्यःने पुलिं चुइगु। झीगु देय्या प्राकृतिक श्रोत व सम्पदाया अपार भण्डार खनाः जःलाखःला देयया इर्ष्या जुयाच्वंगुलिं खय्फु राजनीतिइ अप्वः चलखेल यानाच्वंगु थें च्वं। विशेष यानाः भारतया नेतातय्सं नेपालय् चलखेल यानाच्वंगु दु धयागु दसुया रुपय् भारतया राजदूतं पार्टी नेतातनाप माःगु सिबें नं अप्वः भेटघाट यानाच्वंगुयात कायेफु। मेगु जःलाखःला देय् चीनया राजदूतपाखें नं नेतातलिसे भेटघाट यानाच्वंगु दु। चीनया राजदूत व भारतया राजदूतपाखें नेतातनाप भेटघाट यानाच्वंगु दु। चीन व भारतया राजदूततय्सं नेपाःया नेतातनाप यानाच्वंगु थ्व भेटघाटया कारण थीथी हे खनेदु। चीनया राजदूतपाखें गबलय् तिब्बती पृथकतावादीतय् गतिविधि तच्वइ अबलय् जक नेतात नाप लायेगु ज्या याइ। राजदूतपाखें नेतातय्त दवाव बियाच्वनी पृथकतावादी तिब्बतीतय्त नेपाःया भूमि प्रयोग याके मजिल धकाः। अथे हे भारतया राजदूतं याइगु भेटघाटया लक्ष्य खः, नेपाःया सरकारय् थः कतांमरि नेतात छ्वयाः भारतया स्वार्थ पूवंकेगु। झीगु धापू राजदूतपाखें नेतातय्त नापलाये हे मजिउ धयागु मखु। राजदूतया भेटघाट निगू देय्या कल्याण जुइगु मुद्दा ज्वनाः ज्या याकेगु कथं जूसा ठीक जू। तर भारतया राजदूतपाखें खालि थःगु देशया हित याइपिं नेतातय्त सत्ताय् छ्वयाः ज्या कायेगु मनसाय ज्वनाः ज्या यानाच्वंगुलिं थ्व ठीक मजू थें च्वं, थुलि जक झीगु धापू खः ।

थ्व दँय् छगू हूगु राजनीतिक खँ विकास जुल धायेमाः। व खः, गुलि नं नेतात सत्ताय् थ्यनी उपिं भारतया इशाराय् प्याखं हुलीपिं खः धकाः विपक्षी पार्टीं नं द्वपं बीगु यात। द्वपं बीगु झ्वलय् विपक्षी माओवादी पार्टीं थथे तकं धाल कि माधव नेपालया मन्त्रिमण्डलयात भारतया कतांमरि सरकार जक खः। न्हापा न्हापा जूसा जनतापाखें जक थथे धाइगु खः, नेपाःया नेतात भारतीय दलाल जुल। थुगुसी मेगु छगू राजनीतिक संस्कार नं विकास जुल धायेमाः। व खः, कतांमरि सरकारं भारतनाप राष्ट्रघाती सन्धि याये दइ मखु धकाः सचेत तकं यात। थ्व खँयात जनतां सकारात्मक पलाः खः धयाच्वंगु दु। भारत सरकारं नेपाःया प्रधानमन्त्रीयात सःतूगुया कारण राजनीतिक व आर्थिक विषयय् खँल्हाबल्हा यायेत मखु। भारत सरकार थम्हं हे पाहां सःताः नेपाःया भ्रमण टोलीयात महत्व मबिउगु जक मखु अझ फ्वगिं देय्या प्रतिनिधि वल धकाः घृणा व अपमान याना हःगु चर्चा जुयाच्वंगु दु। घृणा व अपमान याःगु कारण नं स्वयम् थनया नेतातय्गु च्यः मानसिकताया कारणं खः। यदि नेतातय्के च्यः मानसिकता मदुगु खःसा भारतया उच्च अधिकारीतय्सं घृणा व अपमान यायेगु आँट याइ मखु। झीगु देय् सिबे चीधंगु भूटानया नेतात भारत भ्रमणय् वन धाःसा घृणा व अपमान मखु सम्मान यानाच्वनी। भूटानया नेतातय्के राष्ट्रभक्ति व विवेक दु। उकिं उगु देय् बर्वाद मखु विकास जुयाच्वंगु दु। भूटानया आर्थिक स्थिति झन झन क्वातुया वनाच्वंगु दु। देय् दुने नं शान्ति, अमन चयन व कानुनी राज्य दु। भूटानी नेतातय्गु लक्ष्य खः भूटानयात गथे यानाः विकास, शान्त व वातावरण स्वच्छ मुलुक दयेकेगु। थुकी हे ध्यान केन्द्रित यानाः उमिसं ज्या यानाच्वंगु दु। भूटानया राष्ट्रिय स्वार्थय् भारत सरकारं नं हस्तक्षेप यायेगु मस्वः बरु बिकासया ज्याय् तिबः बियाच्वंगु दु। भूटानया नेतातय्सं नं भारतनाप खुल्लारुपं राष्ट्रिय मुद्दायात न्ह्यःने तयाः भारतपाखें लबः कयाच्वनी। भूटानया सरकारं थःगु संस्कृति रक्षाया लागिं धकाः विदेशी च्यानल तकं बन्द याना बिल। भूटानं थःगु देय्या छगू इन्च भूभागय् तकं विदेशी हस्तक्षेप याके मबिउ, देश बिखण्डन यायेत स्वइपिं पार्टीतय्त बन्देज यानाबिल। भारत सरकारपाखें नं जलश्रोत सम्झौता यानाः यक्व फाइदा कयाच्वंगु दु ।

नेपाःया नेतातय् च्यःबुद्धिं यानाः जनता निराश व आक्रोशित जुयाच्वंगु दु। नेतातय्सं गुलि नं भारतनाप सम्झौता याना वइ व सन्धिं देशयात यक्व हानी जुयाच्वंगु दइ। थुलि जक मखु देय्या सीमा अतिक्रमण यानाच्वंसां नं सुम्क च्वनी। देय् विखण्डन यायेत वःपिं नेतातय्गु पार्टीयात नं खुल्ला रुपं ज्या याकाच्वंगु दु। थनया नेतातय्गु गतिविधि व प्रवृत्ति स्वयेबलय् उमित राष्ट्रघाती धायेत बाध्य जुइ। भाद्र ६ गते शनिवाः प्रधानमन्त्रीया पुचः भारत भ्रमण यानाः लिहां वयेगु झ्वलय् विमानस्थलय् पत्रकारया न्ह्यःने फूर्ति यानाः धाल, थ्व भ्रमण सफल जुल। प्रधानमन्त्रीं न्ह्याक्व हे फूर्ति यानाः धाःसां जनतां विश्वास यानाच्वंगु मदु। छाय्धाःसां नेपाःया नेतातय्सं फय्गं खँ ल्हानाः जनतायात झंगः लाइगु सकस्यां सिउ। नेपाःया जनतां थ्व खँ नं सिउ कि प्रम भारत भ्रमणया निंतिं वंगु कारण - क) आतंककारी नियन्त्रण यायेगु नाम भारतया फौज नेपाःया भूमिइ च्वनाः गतिविधि न्ह्याकेगु, ख) नेपाःया गांगामय् मदरसा (मुश्लिम स्कूल) या नामय् मुस्मां आतंकवादी तयार यानाच्वंगु दु धकाः न्यंकेगु, ग) नेपाःपाखें नक्कली भारु भारतय् वयाच्वंगु दु धकाः धायेगु, घ) चीनया गतिविधि नेपालय् बढे जुयाच्वन उकियात नियन्त्रण या धकाः दवाव बीत खः। थ्व फुक्क मुद्दाय् नेपाःयात न्यंकेगु लागिं भारतं प्रधानमन्त्रीयात सःतूगु खः।

झीसं भारतया नेतातय्त थथे यात अथे यात धकाः भारत सरकारया विरोध यायेगु बेकार खः। छाय्धाःसां प्रत्येक देय्या थःथःगु राष्ट्रिय स्वार्थ दइ व उकियात पूरा यायेत अनेक रणनीति दयेकाः कुटनीति म्हिता हे च्वनी। भारतं नं थःगु राष्ट्रिय स्वार्थ पूरा यायेत खेल म्हितीगु स्वाभाविक खः। बदमास ज्या झी हे नेतात खः गुपिंसं सत्ताय् च्वनेगु लागिं भारतं छु छु धाल व फुक्क पालना यायेगु पलाः न्ह्याकी ।

More Stories Like this