कांग्रेसया ल्हातय् संवैधानिक समिति

तसकं चर्चाय् वःगु संवैधानिक समितिया अध्यक्ष पदय् अन्ततः नेपाली कांग्रेसया उम्मेदवार निलाम्बर आचार्य हे त्याःगु दु। आचार्यया थ्व विजय नेपाली कांग्रेसया कुटनीतिक सफलता जक मखु आः संविधानयात फयांफछि थःगु इच्छा कथं निर्माण यायेगु ज्याय् चूलाःगु छगू अवसर नं खः। तर संवैधानिक समितिया थ्व चुनावया नापनापं देशय् अप्वया वनाच्वंगु असमझदारी व राजनीतिक ध्रुवीकरण नं अझ तब्याना वनीगु धाःसा निश्चित जूगु दु ।

संवैधानिक समितिया अध्यक्ष पदय् थः मनूयात त्याकेधुंकाः कांग्रेसं वंगु चुनावय् निगूगु स्थान जक हासिल याःगु खःसां सत्ता व सदनय् धाःसा अझ यक्व उपलब्धी चूलाकूगु दु। खास यानाः वामपन्थी पार्टी खयां नं माओवादी व एमाले दथुइ कायम जुयाच्वंगु मनमुटावया लबः कयाः कांग्रेसं थथे धमाधम छगूयां लिपा मेगु उपलब्धी चूलाकाच्वंगु खः। थ्व स्वयां न्ह्यः कांग्रेसं गणतान्त्रिक नेपाःया न्हापांम्ह राष्ट्रपति पद थःगु पक्षय् लाकूगु खःसा आः संविधान दयेकीगु महत्वपूर्ण अंग संवैधानिक समितिया अध्यक्ष पद नं त्याकूगु दु। माओवादी-एमाले ल्वापुया हे लबः कयाः सत्ताय् साझेदार ला जुयाच्वंगु हे जुल। निगू शक्तियात थवंथवय् ल्वाकाः दथुं लबः कायेगु थ्व कांग्रेसया गजबगु खुबी खः।
संवैधानिक समितिया अध्यक्ष पद नं थःगु ल्हातं चुलुइधुंकाः संविधानसभाया चुनावय् दकलय् अप्वः सीट त्याकूगु माओवादी आः पूर्ण रुपं याकःचा लाःवंगु दु। थुकिं मेगु पार्टी व माओवादीया दूरी अझ अप्वयेका बी गुकिया लिच्वः बांमलाइगु निश्चित खः ।

More Stories Like this