दिगुख्यः गुथिया न्हापांगु लिपि स्यनेज्या

पुष्परत्न ताम्राकार 'स्वीटहर्ट'

श्रीदिगुख्य गुथि पकनाय्ज्वःया ग्वसाः व भाजु विद्यासागर तुलाधरया संयोजकत्वय् वंगु ने.सं. ११२९ दिल्लाथ्व गुरुपुन्हि निसें गुथिया गुथियाःपिंत प्रचलित नेपाल लिपि स्यनेज्या न्ह्याकल। दकलय् न्हापां गुरुपुन्हिया न्हि लिपि स्यनेगु ज्याझ्वःया उलेज्या दिगुख्यः गुथिया हे छेँसं जुल। खय्त ला श्री दिगुख्यः गुथिं इलय्ब्यलय् थीथी कथंया ज्याझ्वःत याना वयाच्वंसां नेवाःतय् मौलिक लिपियात संरक्षण व संवर्द्धन यायेगु ताः तयाः लिपि स्यनेगु ज्या याःगु धाःसा थ्वहे न्हापांखुसी खः। झीसं नेवाः जुयाः गर्वं म्वायेगु लँपु धइगु हे थ्व लिपि खः गुकियात झी नेवाःतय्सं मसयेकुसें मगाः। थौं दिगु ख्यः गुथिं गुगु ताः तयाः लिपि स्यनेगु ज्याझ्वः तल उकियात लसकुस मयासें मगाः ।

झीगु लिपि छताजी जक मखु तःताजि हे दु। गथे कि रंजना लिपि, भुजिंम्वः लिपि, क्वँय्म्वः लिपि, पाचुम्वः लिपि, लितुम्वः लिपि, हिंम्वः लिपि, कुंम्वः लिपि गोलम्वः लिपि, प्रचलित नेपाल लिपि। थुकी दकलय् बांलाःगु लिपि रञ्जना खः गुगु लिपिं यानाः नेपाः संयुक्त राष्ट्र संघय् दुथ्यायेत तकं सफल जुल। तर थौंकन्हय् अप्वः छ्यलाबुलाय् वयाच्वंगु धाःसा प्रचलित नेपाल लिपि खः। छगू अजूचायापुगु खँ थ्वहे खः कि थुलिमछि झीगु लिपि दुसां मेपिं सुयागुं लिपिनाप ज्वःलानाच्वंगु खने मदु। उकिं विदेशीत अजूचायाच्वनी। झीपिं थुलिमछि लिपिया तःमि जुयां नं छता हे लिपि मसयेकाच्वन धाःसा व थेंज्याःगु दुर्भाग्य मेगु छु दइ? श्री दिगुख्यः गुथिं थ्वहे खँयात वाःचायेकाः उगु लिपि कक्षा न्ह्याकेगु निर्णय याःगु खः। थुगु ज्यापाखें झीगु मेमेगु जातीय खलः पुचःतय्सं नं शिक्षा कायेमाःगु आवश्यकता खनेदु।
उगु कक्षाया उलेज्या कुन्हु नेपाल लिपि गुथिया प्राज्ञ नापं स्यनामि शरद कसाःयात दिगुख्यः गुथिया संरक्षक भाजु कुलवीर सिंह तुलाधरं बुद्धया मूर्ति लुमन्तिया चिं कथं लः ल्हानादिल। गुथिया न्वकु भाजु लक्ष्मी तुलाधरं लसकुस यानादिल ।

नेपाल लिपि गुथिया नायः शरद कसाः 'कसाःछेँ'जुं नेपाल लिपि झीसं छाय् स्यनेमाःगु, थुकिया महत्व छु खः धइगु विषयय् न्ववानादीगु खःसा झीगु मौलिक लिपि कन्हय् वयाः जातिय स्वशासन, धर्म, संस्कृति व परम्परायात मदयेकं मगाःगु खँ ध्वाथुइकादिल। अथे हे प्राज्ञ सभाया दुजः एवं स्यनामि शरद कसाःजुं झीगु पुलांपुलांगु थ्यासफू, ल्वहं पतिइ कियातःगु लिपिया बारे कनादिलसा उकिया नापनापं न्हू भाय्लचं, वर्णमाला पिथनेगु व युनिकोडय् लिपि पिथनेगु बारे नं कनादिल। दिगुख्यः गुथिया नायः स्वयम्भुरत्न तुलाधरं सुभाय् प्वंकादिल। संयोजक भाजु विद्यासागर तुलाधरं नेवाःतय्सं थः मस्तय्त थःगु भाय् त्वःताः कतः भाय् स्यनेगु याना वयाच्वंगु थौंया इलय् नुगः क्वसायेकाः प्रचलित नेपाल लिपि स्यनेत सक्रिय जुयादीगुलिं लसता प्वंकादिल ।

उगु प्रचलित नेपाल लिपि स्यनेगु ज्याझ्वः उलेज्यां निसें
स्यनेज्या क्वमचाःतले थुगु पंक्तिया च्वमिं नं ग्वाहालि कथं ज्या सना जुइ खंगुलिं तसकं लय्ताः। थुकी १२ दँ दुपिंनिसें कयाः ६१ दँ दुपिसं तकं ब्वति कयाः लिपि सयेकूगु खःसा मेखे मुक्कं उदाय्तय् दथुइ ग्वाहालि याये खनाः मन नं लुधं। धात्थें ला थुलिमछि लिपि कक्षा न्ह्यायेधुंकल तर जितः दकलय् न्ह्याइपुगु धइगु थुकी हे खः ।

स्यनेज्या क्वचायेधुंकाः शैक्षिक भ्रमण कथं लाय्कूया हनुमानध्वाखाया पिने च्वंगु झिंन्हय्गू लिपिं च्वयातःगु ल्वहंपौ ब्वंकेगु, नासःचुकया महत्व बारे ध्वाथुइकेगु, हाथु द्यःया न्ह्यःने च्वंगु ताःहाकःगु थामय् लिपिं कियातःगु स्तम्भ शिलापत्र ब्वंकेगु नापं च्यासिं देगलय् च्वंगु ल्वहंपौ ब्वंकेगु ज्या जूगु खः। अन क्वचायेकाः आशा सफूकुथिइ च्वंगु थीथी लिपिया थ्यासफूत ब्वनेज्या नं जूगु खः ।

श्री दिगुख्यः गुथिं दकलय् न्हापां ग्वसाः ग्वःगु लिपि कक्षा अतिकं ताःलाःगु खनेदु। स्यनेज्या क्वचायेकाः क्ववाले जुल। उगु क्ववाले ज्याय् दक्वं हे ताःलाःवंगु दु। ताःलानादीपिं सकलसितं थुगु पंक्तिया च्वमिपाखें भिंतुना देछायाच्वना ।

More Stories Like this