आचार्य हे त्याइगु निश्चित
माओवादीं पदया लागिं आन्दोलन मत्वःतीगु
येँ(सन्ध्या टाइम्स)/संवैधानिक समितिया अध्यक्ष बारे सहमति कायम यायेत थौं सुथय् च्वंगु स्वंगू दलया बैठकय् सहमति कायम जुइ मफयेवं अन्ततः थौं अध्यक्षया निंतिं चुनाव जुइगु जूगु दु ।
थौंया चुनावय् सत्तारुढ दलपाखें कांग्रेस सभासद् निलाम्बर आचार्य व माओवादीपाखें संसदीय दलया उपनेता नारायणकाजी श्रेष्ठं उम्मेदवारी बियादीगु दु ।
थौं सुथय् जूगु वार्ताय् माओवादीं प्रधानसेनापति प्रकरणयात कयाः न्ह्याकाच्वंगु आन्दोलन दिकल धाःसा थःपिंसं माओवादीयात समर्थन यायेगु धकाः एमाले व कांग्रेसं प्रस्ताव तःगु खःसा माओवादीं छगू समितिया अध्यक्षया निंतिं थःपिंसं नागरिक सर्वोच्चतायात दाउलय् तये फइ मखु धकाः अडान काःगु खः। थौं सुथय् सभामुख सुवास नेम्वाङया कार्यकक्षय् च्वंगु उगु बैठकय् एमालेपाखें प्रधानमन्त्री माधव नेपाल, पार्टी सभापति झलनाथ खनाल, कांग्रेसपाखें गिरिजाप्रसाद कोइराला व माओवादीपाखें अध्यक्ष पुष्पकमल दाहाल 'प्रचण्डं' ब्वति काःगु खः ।
