नेवाः देय् दबूया छगूत्या दशक

नेवाःतय् राष्ट्रिय संस्था कथं नीस्वंगु नेवाः देय् दबू म्हिगः झिंन्यादँय् क्यन । छगू जीवित संस्थाया छगूत्या दशक अवश्य नं न्ह्यथनेबहः जुइ। उकिसनं प्रारम्भया दशक आपालं थथ्याःक्वथ्याःया दथुइ न्ह्यानाच्वंगु दइ। नेवाः देय् दबू नं अज्याःगु हे आपालं आरोह अवरोहया दथुं थौंया अवस्था तक थ्यंगु खः ।

थौं नेपाः इतिहासया हे दकलय् जटिल मोडय् थ्यनाच्वंगु दु। मुक्कं राज्य हे न्हूधाः जुयाः न्हूगु युगया लुखाखलुइ थौं झीपिं दनाच्वना। आःया न्हूगु युग सदियौं निसें राज्यया जातिवादी नीतिपाखें दमन जुयाच्वंपिं नेवाः थेंज्याःपिं उत्पीडित जातिं मुक्ति प्राप्त याइगु युग खः। देय्यात संघीय प्रणालीइ यंकाः गन गुगु जातिं आदिकालंनिसें बसोबास याना वयाच्वंगु खः अन उमित हे शासक दयेकेगु तयारी आः जुयाच्वंगु दु। थज्याःगु इलय् नेवाःतय्सं गज्याःगु राज्यया कल्पना यायेगु, गुगु लँपु लिनाः न्ह्याः वनेगु व गुकथंया तयारी यायेगु धकाः रणनीति दयेकेगु अतिकं आवश्यक जू। उकिं थ्व घडीइ सम्पूर्ण नेवाःतय् नेतृत्व याइगु नेवाः देय् दबू थेंज्याःगु संस्थाया भूमिका गहन व जिम्मेवारपूर्ण जुइगु खँय् शंका मदु। थनिं झिंन्यान्हु न्ह्यः नेवाः देय् दबू गुगु उद्देश्य ज्वनाः नीस्वंगु खः, आः देय् दबूया भूमिका व स्वयां नं विस्तार जूगु दु। नेवाःतय्त छप्पँ यायेगु जक आः देय् दबूया कर्तव्य मखु। नेवाःतय्त राज्यया हकदार जुयाः थःगु भूमिइ थःपिंसं हे शासन न्ह्याकेत तयार यायेगु दायित्व आः नेवाः देय् दबूया ब्वहलय् वःगु दु। झिंन्यादँया दुने देय् दबूया भूमिकाय् वःगु थ्व छगू न्ह्यथनेबहःगु हिउपाः खः, थुकियात नेतृत्वं थुइकूगु हे दयेमाः ।

More Stories Like this