पेजथ्री पिपल्स च्वाइस एवार्ड

दर्शनवीर शाक्य

नेपालभाषाया मनोरञ्जन ख्यः छुं म्वायेक विवादया बिषय जुइगु याः। तर चर्चाया विषय जुइगु अवसर थुगु ख्यलय् म्हो जक दु। थुज्वःगु हे चर्चाया अवसर नेपालभाषाया मनोरञ्जन ख्यलं छगू चुलाकूगु दु गुगु खः 'पेजथ्री नेपालभाषा पिपल्स च्वाइस एवार्ड ।'

न्हापांखुसी सुनां नं थुगु पेजथ्री नेपालभाषा पिपल्स च्वाइस एवार्डया नां न्यंनेवं पलख वाताहां नं जुइफु। तर नेपालभाषाया मनोरञ्जन ख्यलय् योगदान यानाच्वंपिं वा थुगु क्षेत्रय् नुगः ब्वयाच्वंपिं खःसा उपिं सकलें लय्ताइ। नेपालभाषाया मनोरञ्जन ख्यलय् पेजथ्री न्हूगु नां मखु, अले सकल मनोरञ्जनकर्मी वा नेवाः भाय्या मतिनामिं नेपालभाषाया मनोरञ्जन ख्यलय् मचाःमगाःगु तायेकाच्वंगु खँ छगू प्रतिष्ठित एवार्ड हे खः ।

नेपालभाषाया छगूयां छगू जक रंगीन बाःछिपौ 'पेजथ्री' थौं प्यदँ क्यनेधुंकूगु दु। प्यदँ दुने थुगु वाःछिपौ पाखें ७५ अंक मदिक्क पिहां वयेधुंकल। थ्व हे प्यदँ दुने पेजथ्रीपाखें थीथी ज्याखँ जुइधुंकूगु दु। थुगु बाःछिपतिं याःगु 'स्वप्न सुन्दरी लिसे छझाः' ज्याझ्वः अतिकं सफल जूगु खः। मुक्कं भोटिङ्गपाखें जक थः यःम्ह स्वप्न सुन्दरी नोयो सिं, भिंतुना जोशी व सुमिका वज्राचार्यलिसें लन्चया ज्याझ्वः जूगु खः। बाःछिया जक प्रचारया ई दुगु थुगु ज्याझ्वलं बाःछि दुने हे १७००-१८०० भोट खाकूगु खः ।

पेजथ्रीपाखें नेपालभाषाया मनोरञ्जन ख्यलय् एवार्ड बीगु परिकल्पना थौं स्वयां निदँ न्ह्यः हे शुरु जुइधुंकूगु खः। तर मेमेगु संस्थापाखें नं थुज्वःगु एवार्डया घोषणा जुयाच्वंगुलिं थुकिया स्वरुप हीकुहीकुं पेजथ्री नेपालभाषा पिपल्स च्वाइस एवार्ड जूवंगु खः। उकिं आः थुगु एवार्डया नां कथं हे पिपल्स च्वाइस अर्थात् झीसं ययेकापिं धइगु अर्थ पिहां वइ। छगू प्रणाली अन्तर्गत न्ह्याइगु थुगु एवार्डया स्वरुप ममेगु ज्यूरी एवार्ड वा क्रिटिक्स च्वाइस एवार्ड सिबें बिस्कं जुइ।
प्रकृयागत रुपं स्वयेगु खःसा थुगु पेजथ्री नेपालभाषा पिपल्स च्वाइस एवार्ड अतिकं हे तप्यं। पेजथ्री नेपालभाषा पिपल्स च्वाइस एवार्डया निंतिं दुहां वःगु संकिपा वा म्येँ पेजथ्री नेपालभाषा पिपल्स च्वाइस एवार्डया ज्यूरीपाखें मार्किङ्ग वा जाँच यानाः अंक बीगु ज्या जुइ। अले हरेक ज्यूरी प्रतिनिधिया अंक मुंकाः औसत पिकायेकेगु ज्या जुइ। दकलय् अप्वः अंक मुंकूगु प्यंगू दुतिनायात नामांकनय् दुथ्याइ। थ्व हे नामांकनयात झी सकलें जानाः भोट बीगु खः। दकलय् यक्व भोट वःगु नामांकनयात छगू ज्याझ्वः यासें पेजथ्री नेपालभाषा पिपल्स च्वाइस एवार्ड लःल्हायेगु जुइ।
थुगु पेजथ्री नेपालभाषा पिपल्स च्वाइस एवार्डया निंतिं वैध ई धाःसा नेपाल संवत् ११२४ निसें ११२८ तक नाला कासें मुक्कं न्यादँया दुने पिहां वःगु सामग्रीयात दुथ्याकेगु जुइ। थुकिया मू कारण खः नेपालभाषा मनोरञ्जन ख्यःया पुनर्जागरण नेपाल संवत् ११२४ निसें शुरु जूगु खः। तर अथे धायेवं ११२८ लिपाया मनोरञ्जन ख्यः छु जुइ धकाः नं न्ह्यसः वइ। थुकिया लिसः खः पेजथ्री नेपालभाषा पिपल्स च्वाइस एवार्डया निगूगु संस्करणय् उकियात दुथ्याकेगु जुइ ।

अन्तय् थुगु एवार्डया विषयय् थुइकेमाःगु खँ थ्वहे खः कि थ्व पेजथ्री नेपालभाषा पिपल्स च्वाइस एवार्ड झीगु सः खः। थुकी ज्यूरी केवल नामांकनया निंतिं जक खः। एवार्ड विजेता झी सकलसिया भोटं जक त्याइगु खः। छुं नं प्याखं वा म्येँ बांलानां जक मगाः सकसिनं स्वयाः ययेकूगु नं जुइमाः। उकिं मनोरञ्जन ख्यःया झी सकसिनं थ्व खँ नं थुइकेमाः कि थ्व एवार्ड प्याखं वा म्येँया बजार विस्तारया जिम्मेवार प्याखं दयेकूपिं वा म्येचाः पिकाःपिं हे जुइ। लिसें आः पेजथ्री नेपालभाषा पिपल्स च्वाइस एवार्डया दर्ता फारम छुं दिं लिपा जक पिहां वइ। प्रकृयागत रुपं न्ह्याः वनेत सकसिगुं ग्वाहालिया आशा यानाच्वना ।

More Stories Like this