एमाले मत बीत तयार
..तर माओवादीं आन्दोलन दिकेमाःगु शर्त
येँ (सन्ध्या टाइम्स)/कन्हय् जुइगु संवैधानिक समितिया अध्यक्ष ल्यइगु चुनाव बारे सहमति कायम यायेत थौं नं स्वंगू दलया मंकाः बैठक च्वनेत्यंगु दु। म्हिगः च्वंगु स्वंगू दलया बैठकय् माओवादी व कांग्रेसं अडान कायेवं बैठक बिना निर्णय क्वचाःगु खः ।
थौं च्वनीगु बैठकय् नं निष्कर्ष पिहां वइगु सम्भावना म्हो जक दुगु खँ सम्बन्धित सूत्रं धाःगु दु ।
थ्वहे झ्वलय् थौं सुथय् एनेकपा (माओवादीं) चीधंगु झिंनिगू दल नाप सहलह याःगु खः । उगु सहलहय् दुथ्याःगु फुक्कं दलं माओवादीयात समर्थन यायेत सहमत जूगु खँ सीदुगु दु ।
उखे थौं संवैधानिक समितिया अध्यक्ष चुनावया निंतिं नां दर्ता यायेगु ई क्वःछिनातःगु दु। थौं सुथय् १० बजेनिसें ५ बजे तक उम्मेदवारी दर्ता यायेगु ई क्वःछिनातःगु खः ।
यदि थौं स्वंगू दलया दथुइ सहमति कायेम जुइ मफुत धाःसा निर्वाचन जुइ। उगु निर्वाचनया निंतिं माओवादीं डा. बाबुराम भट्टराईयात उम्मेदवार कथं न्ह्यःने हयाच्वंगु दुसा कांग्रेसं संविधानविद् निलाम्बर आचार्ययात प्रस्ताव याःगु खःसां वय्कः हे कांग्रेसया आधिकारिक उम्मेदवार खः मखु सी मदुनि ।
यदि छुं गथे जुयाः थौं स्वंगू दल दथुइ सहमति कायम मजुयाः निर्वाचन यायेगु स्थिति वल धाःसा एमालें बीगु मत निर्णायक जुइ। तर एमालें सुयात मत बी धइगु खँ आः तक स्पष्ट मजूनि। एमालें यदि माओवादीं आः न्ह्याकाच्वंगु आन्दोलन दिकल धाःसा माओवादीयात भोट बीगु प्रस्ताव तयाच्वंगु दु ।
