नेवाः सभासद्तय् मंकाः प्रतिवद्धता

संविधानसभाय् दुथ्याःपिं नेवाः सभासद्तय्सं नेवाः आदिभूमिइ नेवाः स्वायत्त राज्य पलिस्था यायेगु लागिं संविधानसभा दुने व पिने निथासं संघर्ष यायेगु धकाः अतिकं सकारात्मक मंकाः प्रतिवद्धता प्वंकूगु दु। नेवाः सभासद्तय् थ्व प्रतिवद्धतां नेवाः आन्दोलन जक मखु मुक्कं आदिवासी जनजाति आन्दोलनयात उत्साहित व उर्जासम्पन्न याना बीगु खँय् शंका मदु ।

नेपाःयात राज्य पुनर्संरचना यानाः समावेशी आधारया संघीय व्यवस्थाय् यंकेगु धकाः फुक्क राजनीतिक पार्टीतय्सं प्रतिवद्धता प्वंकेधुंकूसां नं उकियात व्यवहारय् लागू यायेगु खँय् धाःसा अझ नं दुने दुने षडयन्त्र जुया हे च्वंगु दनि। उकिं उमित मेगु मखुसां कम से कम थःगु हे पार्टीं घोषणा यानातःगु लाइन ज्वनाः न्ह्याः नु धकाः सचेत यायेगु जक खःसां नं नेवाः सभासद्तय्गु थज्याःगु मंकाः दबुलिं यक्व ग्वाहालि याइ। उकुन्हु तिनि संविधानसभाय् दुथ्याःपिं जनजाति सभासद्तय्गु ककस दयेकाः न्ह्याः वनेगु ज्या जूगु खः। आः उकी दुने नं नेवाः सभासद्तय्सं सार्वजनिक प्रतिवद्धता हे जाहेर याःगुलिं थःपिनि एकता क्यनेगु व सम्पूर्ण जनजाति आन्दोलनयात हे जीवन्त हःपाः बीगु ज्या याःगु दु। थ्व इलय् यदि जनजाति सभासद्तय्सं थज्याःगु मंकाः शक्ति मक्यनेगु खःसा आदिवासी जनजातिया माग अझ नं पू वनीगु खँय् शंका हे दयाच्वनी ।

मंकाः प्रतिवद्धताय् सही यायेत अझ नं छुं नेवाः सभासद्त लिचिउगु बुखँ नं वःगु दु। वय्कःपिंसं चाहिं कन्हय् थःपिं कलंकित जुयाच्वनेगु स्वयां इलय् हे भिंगु पलाः छिनादीसा बांलाइ ।

More Stories Like this