संविधानसभाय् प्रतिनिधित्व यानाच्वंपिं नेवाः सभासद्पिनिगु मंकाः प्रतिवद्धता

दस्तावेज

येँ, नेपाः

नेपाःया छगू मू आदिवासी जनजाति नेवाःतय् प्रति म्हिगःया एकात्मक, केन्द्रीकृत व सामन्ती राजतन्त्रात्मक राज्य सत्तापाखें साम्प्रदायीक नीति नालाः जातीय, भाषिक, धार्मिक, सांस्कृतिक, सामाजिक नापनापं राजनीतिक व आर्थिक रुपय् अतिवादी, विभेदपूर्ण व उत्पीडनया व्यवहार याना वयाच्वंगु खँयात लुमंकुसें,

वंगु निसःत्या दँ थुखेया राज्य सत्ता व राजनीतिक हिउपाःपाखें नेवाःतय्गु हक, अधिकारयात गुगु नं कथं सुनिश्चित याये मफुगु यथार्थयात नुगलय्तसें,
राज्यया विभेदकारी नीति व उत्पीडनपाखें मुक्ति व समान अधिकार प्राप्तिया तातुसें नेवाःतय्सं तःदँ न्ह्यवंनिसें शान्तिपूर्ण अले सशस्त्र आन्दोलनय् ब्वति कयाः न्ह्यथना वयाच्वंगु थीथी मागयात खः कथं संवोधन यायेगु पाय्छिगु राजनीतिक लँपु धइगु हे संविधान सभापाखें न्हूगु संविधान च्वयेगु व उकिया हे लिधँसाय् नेवाः स्वायत्त राज्यया अधिकारयात सुनिश्चित यायेगु आवश्यक जूगुलिं,
नेपाःया राज्य सत्ता संघीय लोकतान्त्रिक गणतन्त्रया ल्याखं न्हूधाः जुइत स्वयाच्वंगु थौंया इलय् सकल नेवाःत छप्पँ व छधी जुसें नेवाः आदिभूमिइ स्वशासनया अधिकार दुगु नेवाः स्वायत्त राज्य धस्वाकेगु तातुनाः आन्दोलित जुयाच्वंगु खँयात वाःचायेकाः,

सकल नेवाःत सांस्कृतिक, भाषिक अले भावनात्मक ल्याखं छप्पँ छधी खः, थःगु मूल्य व मान्यतायात धस्वाका तयेगु निंतिं सकलया उतिग्यंक भाला दु धइगु खँयात नालाकासें,
नेवाःतय् एकता व नेपाः देय्या राष्ट्रिय स्वतन्त्रता, स्वाधिनता, सार्वभौमिकता, भौगोलिक अखण्डता व अविभाज्यतायात धस्वाकाः तयेगुलि बःबिसें, संविधानसभाय् दुथ्याःपिं सकल आदिवासी जनजाति सभासद्पिंसं थ्वहे १७ जुन २००९ (३ असार २०६६) कुन्हु संघीय लोकतान्त्रिक गणतन्त्र दुने आत्मनिर्णयया अधिकार, जातीय स्वशासन अधिकार नापया स्वायत्तता, राज्यय् समानुपातिक प्रतिनिधि, अल्पसंख्यक आदिवासीपिनिगु अनिवार्य प्रतिनिधित्व, आदिवासी जनजाति मिसातय् विरुद्ध जातीय व लैङ्गिक विभेदया अन्त्य, आदिवासी जनजातितय् भाषा, धर्म, संस्कृतियात राज्यय् समान हैशियत व मान्यता बीकेगुया नापनापं अन्तर्राष्ट्रिय श्रम संगठन महासन्धी १६९ व आदिवासी अधिकार सम्बन्धी संयुक्त राष्ट्र संघीय घोषणापत्रयात संवैधानिक व कानूनी व्यवस्था यानाः नालायंकेगु अले जल, जङ्गल, जमिन व प्राकृतिक श्रोतय् आदिवासी जनजातितय् अग्राधिकाया सुनिश्चितता, समुदायगत पहिचान व सामूहिक अधिकार सहित राष्ट्रिय एकता धइगु मुद्दायात न्ह्यथनाः मंकाः कथं क्यंगु प्रतिवद्धताय् ऐक्यबद्धता क्यंसें, संविधानसभाय् प्रतिनिधित्व यानाच्वनापिं जिपिं नेवाः सभासद्पिंसं:


- नेपाःयात संघीय लोकतान्त्रिक व समावेशी गणतन्त्र देय् कथं धस्वाकेत संविधानसभापाखें क्वःछिनातःगु ईया दुने देय्या न्हूगु संविधान च्वयेगु ज्याय् नेवाःतय्पाखें माःगु सकरात्मक भूमिका म्हितेत,

- नेवाःतय् हक, अधिकार धस्वाकेगु नितिं थःगु जीवन फ्यानावंपिं सकलया कुतः व त्याग अले वलिदानयात सम्मानयासें वयकः पिनिगु उगु कुतःयात सितिं मछ्वयेत,

- भावनात्मक रुपं जक मखसें ऐतिहासिक अनुभव अले श्रोत, साधन व आर्थिक संभाव्यताया लिधँसाय् नं स्वायत्त नेवाः राज्यया संभाव्यता दुगुलिं,

- सकल नेवाःतय् तातुना कथं नेवाःतय् आदिभूमि फुक्क दुथ्याकाः आत्मनिर्णयया अधिकार व जातीय स्वशासनया अधिकार दुगु नेवाः स्वायत्त राज्य धस्वाकाः आदिवासी नेवाःतय् अधिकारयात सुनिश्चित यायेत,

- नेपाः देय् दुनेया गुगु नं कथंया विभेद मदुगु अले मानव अधिकार सम्बन्धी विश्वव्यापी घोषणापत्र, राजनीतिक व नागरिक अधिकार सम्बन्धी अन्तर्राष्ट्रिय महासन्धी व सामाजिक, सांस्कृतिक व आर्थिक अधिकार सम्बन्धी अन्तर्राष्ट्रिय महासन्धीपाखें प्रत्याभूत यानातःगु मानव अधिकारया मूल्य व मान्यता दुने च्वनाः समता मूलक, असमानता मदुगु छगू आदर्शमयी नेवाः स्वायत्त राज्य नीस्वनेत,

- संविधानसभा थुज्वःगु राजनीतिक अवसरयात नेवाःतय् हक, अधिकार सुनिश्चित यायेगु नेवाः सभासद्पिनिगु ऐतिहासिक दायित्व पूवंकेत,

- संविधानसभाय् दुथ्यानाच्वंपिं जिपिं सकल नेवाः सभासद्पिं छप्पँ व छधी जुसें नेवाःतय् हक, अधिकारया मंकाः मुद्दाय् संविधानसभा दुने व पिने मंकाः कथं पलाःछीत सहमत जुयागु जुल ।

११२९ यंलाथ्व ६ (९ भदौ २०६६)

प्रवद्धता प्वंकादीपिं सभासद्त:

नां राजनीतिक दल ल्हाःचिं

More Stories Like this