नेवाः सभासद्तय् प्रतिवद्धता
नेवाः स्वायत्त राज्य हयेत छप्पँ जुयाः ल्वाये
येँ (सन्ध्या टाइम्स)/ नेवाःतय् आदिभूमिइ नेवाः स्वायत्त राज्य कायम यायेगु निंतिं थीथी राजनीतिक पार्टीया नेवाः सभासदतय्सं मंकाः प्रतिवद्धता प्वंकूगु दु ।
नेवाः स्वायत्त राज्य मंकाः संघर्ष समितिया ग्वसालय् म्हिगः जूगु छगू ज्याझ्वलय् नेवाः सभासद्तय्सं उगु मंकाः प्रतिवद्धताय् सही याःगु खः ।
संघर्ष समितिया अध्यक्ष नरेन्द्र भक्त हाडाया सभापतित्वय् जूगु उगु ज्याझ्वलय् एमालेया सभासद् डा. मंगलसिद्धि मानन्धरं नेवाः सभासद्तय् प्रतिवद्धतापौ ब्वनाः न्यंकादीगु खःसा उकियात कयाः नेवाः देय् दबूया संरक्षक मल्ल के. सुन्दरं ध्वाथुइकेगु ज्या यानादीगु खः ।
उकियात कयाः जूगु सहलहय् माओवादीया हिसिला यमि व एमालेया सपना मल्ल प्रधानं प्रतिवद्धता पत्रय् मगाःमचाःगु खँ कुलादीगु खः ।
झिंच्याम्ह नेवाः सभासद्तय्सं ब्वति काःगु उगु ज्याझ्वलय् एनेकपा (माओवादी)या हितमान शाक्य, हिसिला यमि, तारानारायण श्रेष्ठ, राजकाजी महर्जन, दिलीप महर्जन, महालक्ष्मी श्रेष्ठ, भिक्षु आनन्द, उमा कपाली व सत्यलाल मूल, नेपाली कांग्रेसया तीर्थराम डंगोल, रामकृष्ण चित्रकार व कृष्णा अमात्य, नेकपा (एमाले)या डा. मंगलसिद्धि मानन्धर, सपना मल्ल व शिला कटिला, नेपाः राष्ट्रिय पार्टीया बुद्ध साय्मि व नेकपा (संयुक्त)या राघववीर जोशी (न्हाय्पं मताःम्ह) पिंसं प्रतिवद्धता पती हस्ताक्षर यानादीगु खः।
नेपाली कांग्रेसया सभासद् ध्यानगोविन्द रंजितं धाःसा ज्याझ्वलय् सहभागी जुयाः नं उकी हस्ताक्षर यायेत पार्टीयाके न्यनेमानि धासें हस्ताक्षर यायेत अस्वीकार यानादीगु खः ।
नेमकिपापाखें धाःसा ब्वनापौ बियां नं छम्ह हे सभासदं ब्वति काः मवः। वर्तमान संविधानसभाय् ३२ म्ह नेवाः सभासद्त दु ।
प्रतिवद्धता पती नेवाः स्वायत्त लागाया ग्यारेन्टी जुइ कथं समावेशी संघीय गणतान्त्रिक संविधान याकनं च्वयेगु ज्याय् नेवाः सभासद्तय्सं संविधानसभाया दुने व पिने च्वनाः माःगु सः थ्वयेकेगु प्रतिवद्धता प्वंकातःगु दु ।
उगु प्रतिवद्धताय् फयांफछि अप्वः नेवाः सभासद्तय्गु हस्ताक्षर याकाः लिपा छगू घोषणासभा हे यासें सार्वजनिक यायेगु खँ धाःगु दु ।
