ख्वपय् धस्वात टोनी हेगन हाउस

कृष्ण

टोनी हेगन नेपाः वःगु ख्वीदँ दयेधुंकल। उगु इलय् बुलुहुँ बुलुहुँ नेपालय् नं पश्चिमी देशय् थें हे कंक्रिटया छेँ दनेगु शुरु जुयाच्वंगु खः। वय्कः ख्वपय् थ्यंकः वःगु इलय् नं ख्वप नगरपालिका वडा नं.- ३ गःछेँ त्वालय् छखा तखागु छेँ अथेहे सिमेन्टं धस्वाकातःगु खः। सकसितं इर्ष्या हे लगे जुइ कथं निर्माण जुयाच्वंगु उगु भवनं स्वीस नागरिक टोनी हेगनया धाःसा मन क्वतुंवन। वय्कलं उगु छेँ स्वये धुंकाः 'नेपाल' नांगु थःगु सफुली उगु भवनया फोटो नापं तयाः नेपालय् नं विकृति दुहाँ वयेधुंकल धकाः च्वयादीगु जुयाच्वन। उगु हे पाठ ब्वने धुंकाः नमूना घर दयेकाः यूनेस्को सिरपाः त्याकूम्ह ख्वपया रविन्द्र पुरीं उगु छेँयात पुलांगु हे शैलीं तयार याये दुसा जिउ धइगु मतिइ तःगु जुयाच्वन। मनय् तयेवं हे ज्या पूवनी धइगु नं मदु। थःगु अध्ययनया झ्वलय् रविन्द्र पुरी टोनी हेगन लिसे नं सतिना वन। थ्वहे झ्वलय् जर्मनीइ आखः ब्वनेधुंकाः लिहां झाःगु इलय् टोनि हेगनपाखें भाजु रविन्द्र पुरीयात वय्कःया जर्मन भाषाया ज्ञान व संस्कृति संरक्षणय् यानादीगु ज्यां प्रभावित जुयाः 'नेपाल' नांगु वय्कःया थःगु हे सफू हस्ताक्षर यानाः बिउगु जुयाच्वन। उगु हे सफुली अथे थ्व छेँया बारे चर्चा यानातःगु खनेवं थीथी कथं उगु भब्य छेँयात पुलांगु शैलीया छेँ गथे यानाः दयेकेगु धइगु बिचाः वःगु जुयाच्वन। मल्लकालीन छेँया हुलय् धस्वाकातःगु उगु छखा छेँपाखें शहरया सांस्कृतिक धरोहर हे बुलुकाच्वंगु खः।
टोनी हेगन नेपाः झाःगु इलय् थुगु छेँ सिमेन्टं निर्माण जुयाच्वंगु न्हापांगु छेँ मध्येया हे छखा खः। टोनी हेगनयात हे अजू चायेकीगु ल्याखं रविन्द्र पुरीं थःत उपहार स्वरुप बिउगु उगु सफुली न्ह्यथनातःगु खँपाखें प्रभावित जुयाः ख्वपया सांस्कृतिक सम्पदा बचे यायेगु निंतिं अज्याःगु छेँयात मदयेकेगु हे अभियानय् लगे जुयादिल। थ्व झ्वलय् वय्कलं नमूना घर तयार यानाः मेमेपिंत नं प्रभावित यानाः पुलांगु शैलीं छेँ दनेगु परिपाटी हे बसे यायेधुंकूगु खः। निम्ह स्पासिनस पासापिं होसे व फर्नाण्डोया ग्वाहालिं उगु छेँ रविन्द्र पुरीं न्याना नं काल। थ्वहे झ्वलय् टोनि हेगनया कलाः व व थःहे मदुगुलिं यानाः उगु ज्या भचा अथें लानाच्वंगु खः। लिपा फरनाण्डो धाःम्ह स्पानिस पासालिसे जानाः रविन्द्र पुरीं आर्टे नमूना हाउजिङ धइगु कम्पनी चायेकेधुंकाः धाःसा रविन्द्र पुरीं उगु छेँया स्वरुप हे परिवर्तन यायेगु शुरु यानाहःगु खः। थुगु छेँय् प्लाष्टर यानातःगु सिमेन्टयात अप्पाय् छुं मजुइ कथं लिकायेत ल्वहँतय् बुट्टा कीपिं कालिगढतय्त खटे याःगु खःसा सिँइ पानातःगु इनामेल लिकायेत धाःसा जर्मनीनिसें हे ज्याभः हयेमाःगु खँ रविन्द्र पुरीं 'सन्ध्या टाइम्स'यात कनादिल ।

थुगु छेँय् आः सिमेन्टया बार्दलीया थासय् सिँया बार्दली तयातःगु दु। लुखा व झ्यालय् बुट्टा कियाः बांलाकेगु कुतः यानातःगु दु। अथेहे थुगु छेँय् जस्ताया पौ तयातःगु लिकयाः उकिया थासय् पलि आँय्पा छ्यलाः पौ तयातःगु दु । ब्यापारिक दृष्टिकोणं तयार याःगु थुगु छेँय् प्रत्येक तल्लायात अपार्टमेन्ट कथं विकास यानातःगु दु। निर्माणाधीन अवस्थाय् हे माग अप्वःगुलिं थुगु छेँयात थम्हं हे न्यानाः टोनी हेगन प्रति समर्पण यायेगु थःगु पुलांगु म्हगस पूवंकेत रविन्द्र पुरी तन, मन व धन बियाः लगे जुयादिल। टोनी हेगन नेपालय् झोलुंगे पुल दयेकेगु निसें थीथी कथंया विकास निर्माण यायेगु ज्याय् पोख्तम्ह नेपाल विज्ञ खः। वय्कलं हे छम्ह भूगोलबेत्ताया ल्याखं नेपाःया विकास निर्माणया लागिं आपालं ज्या यानादीगु खः। थ्व हे ज्यायात सम्मान यानाः छगू आभार प्वंके कथं रविन्द्र पुरीं उगु छेँया नां हे 'टोनी हेगन हाउस' धकाः तयादिल। यदि भाजु टोनी हेगन आः तक म्वाना हे च्वंगु खःसा वय्कःया हर्षया सीमा हे दइ मखु जुइ। टोनी हेगन प्रति छेँ समर्पण यानाः मेमेगु नं कंक्रिट छेँयात थुकथंया मेमेगु नमूना घर कथं विकास यानाः मेपिंत नं थज्याःगु छेँ दनेत प्रेरणा बीगु कथं थ्व ज्या जूगु खः ।

More Stories Like this