शपथ प्रकरणय् मधेशी छप्पँ
प्रधानमन्त्री समक्ष तमलोपाया असन्तुष्टी
येँ (सन्ध्या टाइम्स)/उपराष्ट्रपतिया शपथ प्रकरण जटिल जुया वनेवं थौं तराई मधेश लोकतान्त्रिक पार्टीया नेतातय्सं प्रधानमन्त्री माधव नेपालयात नापलानाः थुकिया बारे सहलह ब्याकादीगु दु ।
प्रम निवास बालुवाटारय् जूगु उगु सहलह ज्याझ्वलय् प्रम नेपालं संक्रमणकालया अवस्थायात थुइकाः सर्वोच्च अदालतया आदेश कथं उपराष्ट्रपतियात हाकनं छक्वः खय् भासं शपथ कायेकेत इनाप यानादीगु खँ धाःगु दु ।
प्रम नेपालं मन्त्रिपरिषद बैठकं तकं उपराष्ट्रपति झायात खय् भासं शपथ कायेत इनाप यायेगु व लिपा मेगु भासं शपथ याये जीक संविधान संशोधन यायेगु निर्णय जुइधुंकूगुलिं उपराष्ट्रपतिं उकियात ग्वाहालि यायेमाःगु खँ धयादीगु खः।
लिसलय् तमलोपाया नेतातय्सं थःपिं उपराष्ट्रपतियात हाकनं शपथ कायेकेगु पक्षय् मदु धायेवं प्रम नेपालं मेगु दलतलिसे सहलह यानाः निकास मालेगु खँ कनादीगु खः। तमलोपा अध्यक्ष महन्थ ठाकुरया नेतृत्वय् वंगु उगु पुचलय् ह्दयेष त्रिपाठी लगायत मेपिं नेतात नं दुगु खः ।
वंगु आइतवाः जक सर्वोच्च अदालतं उपराष्ट्रपति झां छवाःया दुने खस भासं शपथ मकाल धाःसा वय्कःया पद निष्कृय जुइ धकाः आदेश जारी याःगु खःसा उगु आदेशयात मधेशवादी दलतय्सं आपत्ति प्वंकूगु खः ।
उखे उपराष्ट्रपति प्रकरण बारे सहलह यायेत थौं मधेशी जनअधिकार फोरमया बैठक च्वनेत्यंगु दु। थौंया बैठकं उपराष्ट्रपतियात हाकनं शपथ कायेकेगु वा राजीनामा बीकेगु धइगु विषयय् सहलह जुइगु खँ धाःगु दु ।
उखे उपराष्ट्रपति परमानन्द झां नं थम्हं खय् भासं शपथ नयेमालीगु खःसा पदं हे राजीनामा बी धकाः मनस्थिति दयेकाच्वंगु खँ सी दुगु दु। उपराष्ट्रपति झां मधेशवादी दलतलिसे थौं वा कन्हय् दुने सहलह यानाः राजीनामा बीगु बारे बिचाः ब्याकादीगु खँ धाःगु दु ।
उखे राष्ट्रपति कार्यालययात नं सरकारपाखें शपथ सम्बन्धी ज्याझ्वःया लागिं छुं धया महःनिगु खँ प्रेस सल्लाहकार राजेन्द्र दाहालं 'सन्ध्या टाइम्स'यात कनादिल ।
