उपराष्ट्रपतिया लिउलिउ सर्वोच्च

उपराष्ट्रपति परमानन्द झा विरुद्ध सर्वोच्च अदालतं हानं मेगु आदेश जारी याःगु दु। न्हय्न्हुया दुने खय् भासं शपथ मकाःसा वय्कःया उपराष्ट्रपति पद खारेज जुइगु ख्याच्वः सहित थ्व आदेश बिया हःगु खः ।

उपराष्ट्रपतिया लिउने सर्वोच्च अदालत ब्वाँय् जुयाच्वंगु स्वयेबलय् थथे भान जू मानौं खय् भासं शपथ मकाइपिं मनूत सर्वोच्चया 'जानी दुश्मन' हे खः। सर्वोच्चय् वनाच्वंगु मुद्दाया चांग हे जक स्वयेगु खःसां अन उपराष्ट्रपति जक राष्ट्रपतिं प्रधानसेनापति प्रकरणय् याःगु ज्याया विरुद्ध नं रिट लानाच्वंगु दु। तर सर्वोच्चं आः तक उकिया फाइल तक हे पुइकूगु मदुनि। उपराष्ट्रपतिया मामिलाय् धाःसा वंगु साउनंनिसें आः तकया दुने स्वंगू आदेश जारी यायेधुंकल। खय् भासं शपथ ग्रहण मयायेगु राष्ट्रघाती, मुलुकयात गम्भीर आघात लाइगु, देय्या अखण्डताय् लिच्वः लाकीगु प्रकृतिया घटना मखु। बरु राष्ट्रपतिया पलाखं देशय् द्वैध शासनया संकेत बिसें तःधंगु द्वन्द्वयात आमन्त्रण यानाच्वंगु दु। वहे कारणं यानाः थौं तक संसद चले याये फयाच्वंगु मदु। थज्याःगु मुद्दाय् आः तक सर्वोच्चं सुनुवाई तक हे याःगु मखुनि। तर खय् भासं शपथ मकाः धइगु कट्टर ब्राम्हणवादीतय् लागिं जक सरोकारया विषय जुयाच्वंगु मामिलाय् धाःसा निरन्तर आदेशमाथि आदेश जारी यानाः सर्वोच्च अदालतं थःत नं वहे ब्राम्हणवादी कित्ताय् स्थापित याःगु आभास बिउगु दु। गुगु जाति भाषाया खँय् थौं मुलुक विभाजित अवस्थाय् लानाच्वंगु खः सर्वोच्चं उकियात समन्वय यायेगु सिबें ग्वाकेगु जकं यानाच्वंगु मदुला ?

More Stories Like this