भारत भ्रमणं ब्वलंकूगु शंका

कृष्ण प्रजापति

प्रधानमन्त्री माधव नेपाल नकतिनि न्यान्हुयंकंया भारत भ्रमण क्वचायेकाः नेपाः लिहां झाःगु दु। उगु भ्रमणयात माधव नेपालं तसकं हे उपलब्धीपूर्ण धकाः दावी नं यानादीगु दु। भारतीय ब्यापारीत नापं नेपालय् लगानी यायेत खुल्ला यानावःगु व स्वीनिगू अर्ब दां भारतं नेपाःयात ग्वाहालि याइगु सन्धि जूगुयात हे थुगु भ्रमणया उपलब्धी धाःगु खःसा उगु उपलब्धी पाय्छि नं जू। तर पत्रकार सम्मेलनय् उलि अप्वः छुं दावी याये फुगु मदु। भारत भ्रमण वने न्ह्यःनिसें चर्चाय् वयाच्वंगु असमान सन्धि खारेज यायेगु माग, पञ्चेश्वर परियोजना व मेमेगु असमान सन्धि सम्झौता खारेज यायेगु खँय् धाःसा थ्व भ्रमणय् प्रधानमन्त्री माधव नेपालं भ्याः भचा हे सः तःगु खने मंत। खालि थः झुके जुया वयागु मदु धायेगु ल्याखं जक छुं न्हूगु कथंया उपलब्धी मदयेक भ्रमण क्वचायेका वःगु खनेदत। थ्व स्वयेबलय् म्हिगःया राष्ट्राध्यक्ष व सरकार प्रमुखतय्सं याइगु भारत भ्रमण व वर्तमान गणतान्त्रिक नेपाःया सरकार प्रमुखं यानावःगु भारत भ्रमणय् हाम्वः ग्वःछि हे पाःगु खने मंत। खालि भारत लय्तायेकेगु लागिं जक नेपाःया प्रमखु ब्यक्तित भारतय् वनेगु परिपाटी विकास जुल धाःसा कन्हय् नेपाःया शासक न्ह्याम्ह हे जूसां भारतं आशिर्वाद मबीकं शासक जुइ मफइगु अवस्था विकास जुइ ।

म्हिगः गथे देशया थीथी थासय् सीमा अतिक्रमण व अति वर्षाय् जलमग्न जुइगु खः। थौं नं थ्व नितां समस्या झीगु न्ह्यःने यथावत दनि। छुं न्हि न्ह्यवंनिसें मदिक्क वा वयाच्वंगु कारणं तराईया गुलिं जिल्ला जलमग्न जुयाच्वंगु दु। थ्व प्राकृतिक प्रकोप जक मखु छगू ल्याखं राजनीतिक प्रकोप नं खः। सीमा लागाय् स्वीकृति मदयेक हे भारतं बाँध दयेकेगु यानाच्वंगु कारणं हे वा वइबलय् नेपाःया जिल्ला जिल्ला हे डुबानय् लाइगु खः। सर्गतं वःगु वा यदि सहज रुपं जक तराईया मैदान जुयाः न्हापा न्हापा वनाच्वंगु हे लँ जुयाः भारतय् वने खंगु खःसा नेपालय् डुवानया समस्या हे जुइ मखु। थ्व ल्याखं सीमा अतिक्रमण व बाँधया बारे प्रधानमन्त्री माधव नेपालया भ्रमण मौन च्वंगु खनेदु। मू समस्या हे सीमा अतिक्रमण व बाँधया कारणं दँय्दसं मनूत जलमग्न जुयाः सीगु खः। तर उगु मूल समस्यायात थुगु भ्रमणय् छुं हे उपलब्धी यानावःगु खने मदु। अन्तर्राष्ट्रिय नियम व निगू राष्ट्रया सन्धि व भावना अःखः बाँध दयेकेगु व एकतर्फी रुपं तटबन्द दयेकाः नेपाःया भूमि जलमग्न यानाच्वंगु हे समस्या खः। तर उगु समस्यायात कयाः भारतीय पक्षलिसे थुगु भ्रमणय् प्रधानमन्त्री माधव नेपालं छुं चिउताः क्यंगु खने मदु ।

थौं भारतीय पक्षं यकःति रुपं तटबन्द दयेकाच्वंगु कारणं हे जक नं देशया थाय् थासय् नेपाली भूमि डुबानय् लानाच्वंगु दु। द्वलंद्वः मनूत छेँबुँ हे मदयाः अलपत्रय् लानाच्वंगु दु। नापं द्वलंद्वः विघा जग्गाय् लगे यानातःगु बाली नं नष्ट जूगु दु। थज्याःगु तःधंगु समस्या ब्वलनाच्वंगु इलय् जूगु भ्रमणं तकं भविष्यय् थथे मजुइकेगु निंतिं छुं यायेगु स्वयेमाल धकाः भारतीय पक्षलिसे नेपाःया प्रधानमन्त्रीं चुं तक हे मयाःगु धाथें दुर्भाग्य खः। भारतीय विस्तारवाद व अमेरिकी साम्राज्यवादया विरोध यायेगु आँट मदुपिं हे जक शासक जुइगु थ्व देशय् न्ह्याबलें धइथें भारतया विपक्षय् च्वनीपिंत ध्याकुनय् लाकेगु यानाच्वंगु दु। सत्ताय् कम्यूनिष्ट वा कांग्रेस न्ह्याम्ह हे वःसां व भारतीय इशाराय् हे चले जुइगु परिपाटी विकास जुयाच्वंगु नं थथे हे मौका वलं नं इज्जतपूर्वक थःपिनि सः तये मफुगुलिं खः। म्हिगःनिसें हे भारतीय एकाधिकार पुँजी व अन्तर्राष्ट्रिय शक्ति केन्द्रतय्सं नेपालय् थीथी कथं सीदयेक मदयेक हल्ला याना वयाच्वंगु खः। तर माधव नेपाल थेंज्याःम्ह छम्ह कम्यूनिष्ट नेता प्रधानमन्त्री जुयाच्वंगु इलय् तकं उगु शक्ति केन्द्रया न्ह्यःने क्वछुना जूगु धाःसा सकसियां निंतिं हे मछाला पुसेच्वंगु खँ खः ।

खास यानाः नेपाली पुचलं भारतय् वनाः थःपिंत जुयाच्वंगु मगाःमछिंया खँ तयेमाःगु खः। अथेहे नेपालं वनीगु लःयात निर्वाध रुपं छ्वयेगु निंतिं नेपाली पक्षं सीक वा मसीक दयेकातःगु बाँधत थुनेगु बारे खँ तयेमाःगु खः। तर अथे छुं नं कथंया राष्ट्रियताया मामिलाय् ज्या वःगु खँ नेपाली पक्षं थ्व इलय् तःगु खने मंत। दयेकूगु इलय् हे अन्तर्राष्ट्रिय मापदण्ड कथं बाँधत दयेकूगु जूसा उकियात नेपाली पक्षं थुनेमाल वा स्यंकेमाल धकाः हाः जुइ म्वाःलीगु खः। लिपा लिपा दयेकीगु फुक्कं बाँधत अन्तर्राष्ट्रिय मापदण्ड कथं दयेकेगु स्वयेमाःगु खः। तर नेपाली पक्षं थथे खँ तये मफुगु कारणं आः नं नेपालय् बारम्बार जुइगु हत्या, लुटपात जारी हे जुइगु, भूमि अतिक्रमण कायम हे जुइगु व सीमा अतिक्रमण नं पने मफइगु निश्चित दु। थथे जुया वन धाःसा कन्हय् भारतं नेपाःयात नुना हे छ्वइगु स्थिति तकं वइगु शंका याये मालेफु। उकिं प्रधानमन्त्री नेपाःया भारत भ्रमण तसकं हे उपलब्धीपूर्ण जुल धकाः सरकारी सञ्चार माध्यमं तसकं हे बय्बय् यानाक्यँसां थुगु भ्रमण सदभाव भ्रमण जुइफु तर उपलब्धीमुलक भ्रमण धाःसा कदापी मखु ।

म्हिगः नं भारतं नेपाःयात हेपाहा दृष्टिं हे स्वयाच्वंगु खः। आः नं नेपालय् गन्जागोल यानाः भारतया थःगु स्वार्थ पूरा यायेगु स्वार्थ ल्यं हे दयाच्वंगु दु। अझ स्वंगूगु देश अमेरिकां तकं भारत मार्फत नेपाःयात 'ट्रान्जिट प्वाइन्ट' दयेकाः तिब्वत वा चीनय् उथलपुथल यायेत स्वयाच्वंगु ला राजनीतिक विश्लेषकतय्सं धया हे च्वंगु दनि। थथे फुक्कं खँयात ध्यानय् तयाः स्वयेगु इलय् नेपालय् गुलि नं उपलब्धी व सरकार परिवर्तन मार्फत कम्यूनिष्ट वल धाःसां थ्व देशया लागिं उपलब्धी मखुसें भारतया लागिं हे जक उपलब्धी जुइफु। थन माओवादी हे वःसां भारतीय पक्षयात फाइदा जुयाच्वंगु दु। कम्यूनिष्ट हे धाःम्ह मनू माधव नेपाल प्रधानमन्त्री जूसां नेपाःयात स्वयां अप्वः भारतयात ठिक्क खःसा थन सत्ता परिवर्तन वा राज्य सत्ता परिवर्तनं नेपाली जनतायात स्वयां भारतीय शासकतय्त हे जक उपलब्धी चूलाः थें च्वनावःगु दु। म्हिगःया प्रधानमन्त्रीतय्सं गथे पूरा अवधि शासन याये मखंगु खः। आः वयाच्वंम्ह व वइपिं प्रधानमन्त्रीतय्सं नं अथेहे थःगु पूर्ण अवधि शासन याये मखनिगु खःसा नेपाः नां जकया नेपाः जुयाच्वनी। शासन फुक्कं भारतं धाःथें चले जुइगु देश नं जुइगु शंका याये मालेफु ।

More Stories Like this