अले ... ... गय् संभव जुइ ?

प्रा. नर्मदेश्वर प्रधान

टिभी छगू दृश्य खना। दुःखद् दृश्य। शुद्ध लःया सिलप्याय्क बोटल। पसलय् ब्वयातःगु। मीत। बोटलया लः म्हासुसे म्हासुसे च्वं। धःया लः थें। दूषित खने दु। लःया रंगं सी दइ। व शुद्धगु लः मखु। बरु घाटक। थज्याःगु लः बजारय् वइ खुल्लारुपय्। प्याःचाइ। लः न्याइ। यंकी। त्वनी। खतरनाक लः। त्वनीपिंत। उपभोक्तया स्वास्थ्ययात हानी याइ। आश्चर्य ! बजारय् थज्याःगु लः गय् वल? उत्पादककर्ताया गज्याःगु साहस थ्व। चाति। नाःति थज्याःगु फोहोर लः। बजारय् हयाः मीफु। शुद्ध लःया दावा यानाः। थ्व सरासर अपराध खः। जघन्य अपराध। समाज प्रति। मानवताया विरोधय्। थज्याःगु घृणित अपराध। तर थौं थन व्यापारीतय्सं छाती फुले याइ। दण्डया भय मदु उमित। गुगुं प्रतिरोधया चिन्ता मदु। थन खँ। फोहोर लःया मखु। देश थौं गुगु अराजक स्थिति थ्यन। सूचक जुइ थ्व दसु ।

जाजरकोटय् झाडावान्ताया प्रकोप जुइ। मनू भुजिं, इमू थें सी। येँय् होहल्ला जुइ। कठित मन्त्री नेतातय् भाषण थ्वइ। प्रकोपयात मानवीय सम्वेदनशीलताया विषय म्हो खंकी। राजनीतिक कासा, दाउपेचया अवसर तायेकी। स्वास्थ्य विशेषज्ञतय्सं निष्कर्ष बी। ल्वय्या कारण दूषित लः खः। दूषित लखं अन भयानक प्रकोप हइ। भकाभक मनू सी। न्हिया न्हिथं अखवारय् बुखँ वइ। टिभीं धयाच्वनी। क्यनाच्वनी। विषालु लखं मनूतय्गु ज्यान कयाच्वंगु दु। स्थिति अनियन्त्रित तिनि ।

दूषित लःया लिच्वः। जाजरकोटया प्रकोप। मनूत की थें सिनाच्वंगु दु। छखेर थज्याःगु सत्यतथ्य। मेखेर स्वनिगः। देशया राजधानी। सम्पूर्ण राजनीतिक प्रशासनिक वुद्धिजीवीतय् केन्द्र। अन नाःति थेंज्याःगु लःया खुल्ला बिक्री वितरण। जनस्वास्थ्ययात खुलमखुल्ला हाथ्याः। थज्याःगु लःया कारणं थन नं झाडावान्ताया प्रकोप वयेफु। मनूत इमू, भुजिं थें थन नं सी फु। तर थ्व खँया चिउताः तइपिं सु? जिम्मेवारी काइपिं सु? छु थनया मनूतय्सं विषाक्त लः त्वंसां उमि स्वास्थ्यय् हानी जुइ मखुला? पचये याइ ला? स्वास्थ्य मन्त्रालय थ्व निर्ष्षकय् थ्यन ला? गुणस्तर विभागयात थज्याःगु चेतना जुल ला? फोहोरी दूषित लः खुल्ला बजारय् वइ। सम्बन्धित सरोकारवालातय्सं चिउताः तइ मखु। उकिं हे खः ला? अथवा फोहोरी दूषित लः बजारय् हयेके। झाडावान्ता महामारी वयेके। स्वनिगःया अनियन्त्रित जनसंख्या वृद्धियात पने। सन्तुलित याये। सरकारया अघोषित नीति खः ला थ्व? मखुसा सरकारं छाय् मिखा तिसित। बजारय् दूषित लःया बिक्री वितरण जुइ। छाय् थ्वयात सरकारं मखंछु यात ?

थौं हत्या हिंसाया विरोध जुइ। चौतर्फी। हिंसाया विरोध। थौं सिद्धान्त कथं जक मखु। फेशन नं जुइ। धूर्तपिनि रणनीति जुइ। कठोर ज्यानमारातय्सं नं अहिंसाया वकालत याइ थौं। छद्मभेषय्। हिंसा धयागु छु? छुरां कयेका स्यायेगु? बम मुइका, गोलीं कयेका, हत्या यायेगु। थ्व हे जक हिंसा खः ला? सी दयेक हत्या, हिंसा, गोली, छुरा, बम छ्यला याइ। तर थ्व परिभाषा आंशिक जुइ। अपूर्ण। विषालु लः त्वंकी। दूषित पदार्थ नकी। प्राण घाटकतत्व चिकं, घ्यलय् ल्वाक छ्याइ। जनतायात स्लोप्वाइजन नकी। व्यापार उद्योगपतितय् थज्याःगु कुकृत्यं परोक्षरुपं लखं लख मनू सी। असाध्य रोगं ग्रस्त जुइ। थ्वयात छु धायेगु? व्यापारी उद्योगीतय्सं थःगु कुकृत्ययात जनताया सेवा धाइ। ध्यबा आर्जन याइ। विलासी जीवन हनी। उमिगु जनस्वास्थ्य प्रतिया खेलवाद। छु धात्थें जनसेवा खः ला? व हिंसा मखु ला? हत्या मजू ला? सीदयेक जनताया ज्यान काइपिं उमित। ज्यानमारा धाये म्वाः ला? हत्यारा खंके म्वाः ला ?

नक्कली वासः बजारय् वइ। मिति फुइधुंकूगु खाद्य पदार्थय् चांचां न्हूगु मितिइ खनेदइ। शरीर दुने किड्नी, लिभर तुरुन्त क्षतविक्षत जुइगु विषाक्त पदार्थ। घ्यः चिकनय् ल्वाकछ्याइ। थ्व फुक्क थौं। ओपनसेक्रेट जुइ। दूषित लःयात कया। टिभीं गुणस्तर विभागया हाकिमलिसे सम्पर्क तइ। छाय् ध्यान मबियागु? वयाके न्यनी। हाकिम साहेबया लिसः। प्रशासनिक वा प्राविधिज्ञया थें जुइ मखु। कविया थें जुइ। वं खेद प्रकट याइ। दूषित लः स्वया धाइ। अपराध ! घृणित अपराध ! दण्डनीय कुकृत्य ! थज्याःपिंत छूट बी मजिउ। गुणस्तर विभागया हाकिमं झसुका तइ। धाइ। नाटक। देश थौं थज्याःगु विसंगत नाटकया मञ्चन गृह जुइ ।

उखुन्हु छन्हु वरिष्ठ डाक्टरं धाःगु जिं ताल। बजारय् स्वास्थ्ययात हानिकारक खाद्य पदार्थया जगजगी। नसा मखु थ्व, जनताया ल्वय्। तर छु याये? खाद्य पदार्थया गुणस्तरया परीक्षण जुइगु विश्वसनीय थाय् मदु। सरकारं गुणस्तर विभाग तयातःगु दु। अन घूस नयाः गुणस्तरया प्रमाण बी। विषालु खः बा मखुया खँ जुइ मखु अन। इमान्दारी परीक्षकं खः कथं गुणस्तरया परीक्षण यायेत स्वइ। वया जागिर जोखिमय् लाइ। कि जागिर चब्बुइ। कि सरुवा। गुणस्तर परीक्षण यायेत माःगु यन्त्र, रसायनत हे गुणस्तरीय जुयाच्वनी मखु। कमिशनया चक्रं यानाः थौं गुणस्तरीय रसायन गुगुं प्रयोगशालाय् दइ मखु। अले गुणस्तर परीक्षण गय् संभव जुइ !

narapradhan@yahoo.com

More Stories Like this