थौं सर्वदलीय बैठक
प्रधानमन्त्रीं भारत भ्रमणया जानकारी बीगु
येँ (सन्ध्या टाइम्स)/प्रधानमन्त्री माधव नेपालं थःगु भारत भ्रमणया उपलब्धियात कयाः थौं सर्वदलीय बैठकय् जानकारी बियादीत्यंगु दु ।
प्रधानमन्त्री तथा मन्त्रिपरिषद्या ज्याकुथिइ प्रम नेपालं संविधान सभाय् प्रतिनिधित्व यानाच्वंगु २४ दलयात सःताः जानकारी बीत्यंगु खः। प्रधानमन्त्रीया भारत भ्रमणयात कयाः थीथी कथंया खँ चर्चाय् वयाच्वंगुलिं सर्वदलीय बैठक हे सःताः जानकारी याकेत्यंगु खः ।
बैठकय् माओवादीं सदन अवरुद्ध यानाच्वंगु खँय् नं सहलह यायेगु तयारी यानाच्वंगु दु। माओवादीं सदन अवरुद्ध यानाच्वंगुलिं वार्षिक बजेटय् तकं सहलह जुइ फयाच्वंगु मदु।
बैठकय् संविधान च्वयेगु निंतिं स्वनातःगु थीथी समिति व राजनीतिक पार्टी दथुइ ब्वलनाच्वंगु मतान्तरयात कयाः नं सहलह ब्याकीगु ज्याझ्वः दु ।
बैठकय् संवैधानिक समितिया अध्यक्ष ल्ययेगु बारे नं सहलह जुइगु खँ धाःगु दु। संवैधानिक समितिइ सत्तारुढ कांग्रेस व प्रमुख प्रतिपक्षी माओवादीं दावी याना वयाच्वंगु दुसा राजनीतिक सहमति कायम यायेगु निंतिं वंगु भदौ २ गते जुइ धाःगु चुनाव तकं स्थगित याःगु खः ।
संवैधानिक समतिया चुनाव थ्वहे वइगु भदौ १२ गते यायेगु क्वःछिनातःगु दु । थौंया बैठकय् उपराष्ट्रपतिया शपथ प्रकरणय् जूगु भाषा विवादयात कयाः नं सहलह याइगु जूगु दु ।
म्हिगः च्वंगु एमालेया स्थायी समितिया बैठकय् प्रमया भारत भ्रमणयात उपलब्धीपूर्ण जूगु निष्कर्ष पिकाःगु खःसा उखे माओवादीं धाःसा प्रमया भ्रमण असफल जूगु टिप्पणी याःगु दु। माओवादी अध्यक्ष प्रचण्डं प्रधानमन्त्रीया भारत भ्रमण कामचलाउ जक जूगु खँ धयादीगु दु ।
क्रान्तिकारी पत्रकार संघ बाँकें थौं सुथय् ग्वसाः ग्वःगु पत्रकार सम्मेलनय् न्ववासें वय्कलं उगु खँ धयादीगु खः। प्रधानमन्त्रीया भ्रमणयात अनया संचार क्षेत्र व भारतीय अधिकारीतय्सं चिउताः मक्यंगुलिं असफल जूगु टिप्पणी वय्कलं यानादीगु खः ।
वय्कलं राष्ट्रपति बारे सदनय् सहलह याकेबिल धाःसा वर्तमान राजनीतिक समस्या याकनं ज्यनीगु खँ नं धयादिल ।
