भाय् सयेकु सयेकुं संगीतय्

सुनिता मानन्धर

नेवाः म्येँ हालेया लागिं जिं नेवाः भाय् मसयेकुसें मगाः। थ्व गायिका ललिता मानन्धरया अनुभव खः। नेपालभाषाया संगीत ख्यलय् थनिं न्यादँ न्ह्यः वय्कः पिलू झाःगु खः।
अथे ला वय्कः छम्ह नेपाःमि जूसां लण्डनय् ब्वलंम्ह खः। वय्कः नीदँ लण्डनय् च्वनादिल। मां वीरगंजयाम्ह, अबु राजविराजयाम्ह। मां नेवाःभाय् सः। अबु मसः। उकिं वय्कःपिनि छेँय् ल्हायेगु भाय् खस। बःचाधिकः जुइवं लण्डन वंगुलिं वय्कलं नेवाः भाय् जक मखु नेपाःया बारे हे उलि बांलाक सीके मखन। धयादी 'नेपालय् फुकसिनं खय् भासं हे खँल्हाइ धकाः च्वनागु। लिपा तिनि सिल थन ला यक्वं भाषा दुगु जुयाच्वन ।'

वय्कःपिं लण्डन झाःगु इलय् अन नेपाःमित उलि मदुनि। वयां झिदँ ति लिपा धमाधम नेपाःमित वयेगु शुरु जुल। लण्डनया नेवाःत बारे कनादी, 'नेवाःत मध्यय् महर्जन जाति आपाः दत। इमिसं थः मस्तय्त खय् भाय् मस्यं। कि नेवा भासं खँ ल्हाइ, कि अंग्रेजी हे छ्यली। उमिसं नेवाः भासं खँल्हाःगु खनेवं दकलय् न्हापां जि अजू चाल। जिं न्हापांगु नेवाः भाय् उपिंपाखें हे सयेका ।'

लिपा लण्डनं वय्कःयात हाकनं नेपालय् हे साला हल। वय्कःया इहिपा थन जुल। इहिपा सकसिनं नेवाः भाय् सयेकेत बः बिल। वय्कलं नं बुलुहुँ छगू निगू यायां नेवाः भाय् सयेकेगु कुतः यानादिल। शुरुइ ला थाकुल। वय्कःनाप नेवाः भासं खँ ल्हाइपिं नं उलि मदु। अथे खःसां वय्कःया नेवाः भाय् सयेकेगु कुतः धाःसा अझ नं जारी हे दनि। धयादी, 'जिं इनाप याये जिं खय् भासं खँ ल्हाःसां सकसिनं जिनाप नेवाः भासं हे खँ ल्हानादिसँ। छाय्कि नेवाः भाय् सयेकेगु थ्व जिगु लागिं छगू अवसर जुइ ।'

लण्डन च्वनादीगु इलय् वय्कलं नारायणगोपालया म्येँ अप्वः न्यनीगु। अले नारायणगोपालया म्येँयात थम्हं हालाः रेकर्ड यात। उगु रेकर्ड वय्कःया अबुं न्यनेवं म्येँ हालेत प्रेरणा बियादिल। दकलय् न्हापां वय्कलं सन् १९८९ य् खय् भाय्या सपना बसै चुडि गए म्येँचा पिकयादिल। अनं झिंन्यादँ लिपा वय्कः नेपालभाषा संगीतय् नं दुहां झायादिल। नेपालभाषाया संगीतय् वयागु प्रेरणाया श्रोत वय्कलं शुलिन्द्र शाक्ययात कयादी ।

'छन्हु जुजुकाजी रंजितजुया म्येँचाः विमोचनय् वनागु इलय् शुलिन्द्र शाक्यं जितः म्हसीकादिल। वय्कलं जितः नेवाः म्येँ हालेमाल धयादिल। वय्कलं जिगु हौसला बढे यायेत गैर नेवाःतसें ला नेवाः म्ये हालाच्वन धाःसा छिं छाय् हाले मफइ धयादिल। थुकिं हे जितः नं नेवाः म्येँ हाले मास्ति वल।' वय्कलं कनादी ।

आः तक नेपालभाषां वय्कःया नुगः मिखा व छन्त पियाच्वना निगू म्येँचाः पिहां वयेधुंकल। थ्व बाहेक मेमेगु यक्व हे म्येँचालय् नं वय्कःया म्येँ दुथ्यानाच्वंगु दु। नेपालभाषाया संगीत ख्यः धमाधम बांलाना वयाच्वंगु वय्कःया अनुभव दु। तर थ्व छखा छेँ दुने जक सीमित जू थें नं वय्कःयात च्वं। गुलि विकास जुइमाःगु खः उलि जुयाच्वंगु खनेमदु। छेँय् दुने न्हूपिं दुहां वःसां थुकी द्रुत गतिं विकास मजू ।

More Stories Like this