सचिवं तकं व्यंग्य नकल

सन्धिया खँय् व्यापारी दथुइ विवाद

येँ (सन्ध्या टाइम्स)/न्हूदिल्लीइ भारतीय प्रधानमन्त्री मनमोहन सिंहं सःतूगु बेलि भ्वय्। नेपाःया छम्ह सचिवं थम्हं त्वनाच्वंगु जुस क्यँक्यं धाल, ! जुस भचा फाकु थें च्वं का हला ?'

नापसं दुम्ह छम्ह भारतीय सचिवं लिसः बिल, 'उकी दुई चार हजार क्विण्टल चिनी तया बिल कि चाकुइ का !'

भ्रमण जःछि नेपाली प्रतिनिधि मण्डल दथुइ थ्व व्यंग्यपूर्ण टिप्पणी चर्चित जुयाच्वन। वास्तवय् नेपालं न्ह्याबलें भारतयाके फ्वँ जक फ्वनीगु प्रवृत्तियात व्यंग्य यासें याःगु टिप्पणी खः थ्व ।

निगू पक्षीय वार्ताया झ्वलय् आः भारतयाके छु फ्वनेगु ले धकाः खँ पिहां वःबलय् राष्ट्रिय योजना आयोगया उपाध्यक्ष युवराज खतिवडां ला धया हे दिल, 'गुलि फ्वनेगु, आः ला मछाःसे हे च्वनेधुंकल ।'

भारतय् राजनीतिक नेतात सिबें ब्युरोक्रेसी तसकं शक्तिशाली जुयाच्वन। अनया ब्युरोक्रेसीया चुस्तता खनाः नेपाःया मुख्यसचिवं हे मेपिं सचिवत सःताः धयादिल, 'आः झीसं नं थज्याःगु हे ब्युरोक्रेसी दयेकेमाः। सचिवतय्सं निर्णय यायेगु, मन्त्रीतय्सं सही यायेगु ।'

तर सचिवतय्सं अथे धाःसां दिल्लीं लिहां वयेत्ययेकाः भ्रमण दलया सभासद्तय्सं धाःसा कर्मचारीया घोर विरोध यात। विमान दुने सचिवत फुक्क न्ह्यःनेया सिटय्, सभासद्त लिउनेया सिटय्। थुकियात कयाः सभासद्तय्सं विमान दुने हे प्रधानमन्त्रीया न्ह्यःने वनाः विरोध यात, 'थ्व छु पहः ? सभासद्तय्त थथे अपमान यायेगु खःसा जिमिसं ला संसदय् सः थ्वयेकेगु जुइ।' वयां लिपा हानं सिट एरेन्ज यानाः सभासद्तय्त मन्त्रीतय् नापनापं तये हल ।

दिल्ली भ्रमणय् वाणिज्य सन्धिइ हस्ताक्षर जुल धकाः प्रधानमन्त्रीं यानादिल तर उकी निगू देय्या सचिवतय्सं जक हस्ताक्षर याःगु जूगुलिं थ्व तत्काल लागू मजुइगु व लागू याकेत अझ नं ताकेता याके मानिगु खँ धाःगु दु। सचिवतय्सं जक हस्ताक्षर याःगु थ्व सन्धियात उपलब्धीपूर्ण धायेगु लाकि धायेगु धइगु खँय् व्यापारी व उद्योगपतितय् दथुइ दिल्लीइ हे विवाद जूगु खः ।

सूत्रया कथं निगू देय्या वार्ताय् नेपालं वाणिज्य सन्धिइ बः बिउगु खःसा भारतं चीन व पाकिस्तानं नेपाः मार्फत थःगु देशय् पिकाये फइगु समस्या बारे खँ ल्ह्वंगु खः ।