क्वचाःगु प्रमया भारत भ्रमण

प्रधानमन्त्री माधव नेपाल भारतया भ्रमण क्वचायेकाः म्हिगः नेपाः लिहां झाःगु दु। नेपाः थ्यनाखतं वय्कलं थःगु भ्रमण अतिकं सफल जूगु दावी ला यानादिल तर सफल जुल धकाः क्यनेगु छुं नं दसि धाःसा वय्कलं क्यने फुगु मदु। धायेत ला वय्कलं नेपाः-भारत वाणिज्य सन्धि यायेत ताःलाःगुलिं थःगु भ्रमण सफल जूगु खः धयादीगु जुइमाः, तर उगु सन्धिइ आःयात सचिवतय्सं जक हस्ताक्षर जूगु कारणं थुकियात पूर्ण रुपं सफल जुल धकाः धायेगु ई धाःसा अझ नं मत्यःनि। उकियात पूर्ण यायेगु ज्याय् अझ नं छुं ई काइतिनि। नेपाःया प्रधानमन्त्री भारत वन कि लय्तायेकेत भचाभचा ध्यबा ज्वंका हइगु पुलांगु हे चलन खः। वहे चलन कथं ३२ अर्ब तका दां बीगु धाःगु दु। तर व ध्यबा नं न्हूगु वःगु मखु कि न्हापा हे बी धया तयेधुंकूगु, ध्यबा बियाः परियोजना शुरु जुयाः दथुइ थानाच्वंगु आदि ज्याया लागिं बीत्यंगु ध्यबा खः। उकी प्रम नेपालं थम्हं कया हयागु ध्यबा धकाः गर्व यायेगु थाय् मदु।
परराष्ट्र मन्त्री सुजाता कोइराला समावेश मजुइसातकि शुरु जुइ न्ह्यः हे असफलताया संकेत चूलाये धुंकूगु थ्व भ्रमण अन्तिम इलय् वयाः अथे हे जुल गथे कि न्हापा आशा यानातःगु खः ।

नेपाःया प्रधानमन्त्रीयात थःगु देशय् सःताः नेपाःया भूमि भारत विरुद्ध प्रयोगु जुयाच्वंगु दु, उकियात नियन्त्रण या धकाः छक्वः सम्झे याना हयेगु भारतया मुख्य रुची खः। आःया भ्रमणय् नं जूगु उलि हे जक खः। यदि नेपालं अथे मयात धाःसा प्रधानमन्त्रीया कुर्सी हिलीगु सम्भावना वया बी। थ्व भ्रमण उद्देश्य थुलि हे जक खः।

More Stories Like this