'उसाँय् मदयाः हे मवनागु'
पत्रकारतय्त सुजाताया स्पष्टीकरण
येँ (सन्ध्या टाइम्स)/परराष्ट्र मन्त्री सुजाता कोइरालां थः स्वास्थ्यया कारणं हे भारतय् मवनागु खँ कनादीगु दु।
थौं सुथय् छगू पत्रकार सम्मेलन यासें वय्कलं उगु खँ धयादीगु खः ।
प्रधानमन्त्री माधव नेपाल भारत भ्रमणय् वंगु इलय् परराष्ट्र मन्त्री मवनेवं स्वयम् वय्कःया पार्टी दुने हे वय्कःया आलोचना तच्वया वयेवं थौं सुथय् वय्कलं पत्रकार सम्मेलन यानाः थःगु खँ स्पष्ट यानादीगु खः ।
मन्त्री कोइरालां थम्हं उप-प्रधानमन्त्री मफ्वनागु खँ धासें थःगु विरुद्ध गलत प्रचार जुयाच्वंगु दावी नं यानादिल।
थम्हं प्रधानमन्त्री माधव नेपालया भ्रमणया निंतिं फुक्कं पूर्वाधार तयार याना थकागु दावी यासें लिपांगु अवस्थाय् स्वास्थ्यया कारणं थः भ्रमणय् मवनागु खँ वय्कलं धयादिल।
थौंकन्हय् थः चिकित्सकतय् सल्लाह कथं छेँय् हे आराम यानाच्वनागु खँ नं वय्कलं कनादिल ।
वय्कलं प्रधानमन्त्री नेपालया भ्रमण सफल जूगु दावी नं यानादीगु दु । परराष्ट्र मन्त्री भारत भ्रमणय् मवनेवं कांग्रेसया केन्द्रीय समितिया बैठकय् नं उकियात कयाः कडा आलोचना जूगु खः
।
थ्वहे झ्वलय् थौं च्वनीगु कांग्रेस संसदीय दलया बैठकय् परराष्ट्र मन्त्री कोइराला प्रमलिसे भारत मवंगु खँयात कयाः हे विशेष सहलह याइगु खँ सीदुगु दु। बैठकय् परराष्ट्र मन्त्री भारत भ्रमणय् मवंगुलिं उकिं राष्ट्रयात लाकीगु प्रभावयात कयाः सहलह ब्याकीगु खँ धाःगु दु। बैठकय् मेमेगु नं एजेण्डा दुसां थुकी हे विशेष सहलह जुइगु खँ धाःगु दु ।
अथे हे बैठकय् परराष्ट्र मन्त्री भारत भ्रमणय् मवंगु कारणया बारे पार्टीं पत्रकार सम्मेलन वा प्रेस विज्ञप्ति पिकयाः जूसां थःगु धापू स्पष्ट यायेमाःगु माग यासें छगू प्रस्ताव नं दर्ता याइगु जूगु दु ।
बैठकं राज्य पुनर्संरचना समितिं तयार याःगु प्रतिवेदनयात कयाः नं सहलह याइ धाःगु दु ।
