दुर्भाग्य जुयाच्वन झीत मौसम

मनसुनी मौसम नेपाःया लागिं दुर्भाग्यया मौसम जुयाच्वंगु दु। नेपालय् सामान्य तया जेठ-असारपाखे वा पीगु याइ। तर वा पीगु थ्व इलय् वा मवयाः तसकं समस्या जुया बी। बुँ थाराथारा गनीगु जक मखु वा पीत पिनातःगु पुवाचा तकं गनाः वाली यायेत हे समस्या पिकया बी। थुगुसी थज्याःगु समस्या अप्वः हे पिहां वल ।

अले वा वःसां हानं थज्याःगुनक्सां वया बी कि उकिं यानाः तराईलय् खुसिबाः व पहाडय् चलः वनाः आपालं धनजनया क्षति याना बी। वंगु वाःजःछि वःगु वां यानाः ब्वलंगु खुसिबाः व चलखय् लानाः आः तक झिम्ह स्वयां अप्वः मनू सीधुंकूगु दु। गबलें मगाक्क वा वयाः समस्या, गबलें अप्वः वा वयाः समस्या। उखे थुलिमछि वा वयां नं नेपाःया छगूयां छगू जक पुखू सहितया जलविद्युत परियोजना कुलेखानीया इन्द्र सरोवर आः तक जाःगु मखुनि। थुकिया दुःख मेगु दु।
थ्व ल्याखं मौसम झी नेपाःमिया निंतिं शौभाग्य स्वयां नं दुर्भाग्य जुयाच्वंगु दु। खतुं उकिया कारण प्रकृति मखु, स्वयम झी मनूत खः। प्रकृतियात माक्व स्वयां अप्वः अव्यवस्थित रुपं दोहन यात धाःसा थज्याःगु मार फये हे माली। अथे धकाः प्राकृतिक प्रकोपय् लानाः दँय्दसं मनूतय् ज्यान वंकेगु, अन्न मदयाः सुकूप्वाः च्वनेगु नं उचित मखु। थ्वपाखे मुक्त जुइगु खःसा आः झीसं नं अन्न उत्पादनय् प्रकृतिप्रति जक निर्भर जुइ म्वाःगु विधित नाले माल। खुसिबाः व चलः पनेत न्हून्हूगु स्यल्लाःगु सुरक्षा प्रवन्ध यायेमाल। सुम्क च्वनाच्वन धाःसा मार ला हानं हानं वया हे च्वनी ।

More Stories Like this