थ्व सहमति कि लुटमति ?

अनाम

थौंकन्हय् नेपाःया नेतातय्सं धया वयाच्वंगु सहमति व सहकार्यया अर्थ छ्यायेगु खःसा सहमति धइगु सकलें मिले जुयाः सहलहपाखें ज्या यायेगु धइगु अर्थ मजुसे सकलें मिले जुयाः सुनां गुलि फु उलि लुटे यानाः कायेगु वा धम्की बियाः चेतावनी बियाः ख्यानाः कायेगु धइगु अर्थ जूवनी। मति धइगु बांलाःगु जुइमाः। यचुगु जुइमाः। सकसियां यःगु जुइमाः। मति मभिन धाःसा अन छुं नं भिनी मखु। नेपाःया नेतातय्के आःतक भिंगु मति वःगु खने मदु। धाइ नेतात अनुभवी जुयावंलिसे देशय् बांलाक ज्या यायेफइ। सकसितं मिले यानाः यंके फइ। अज्याःपिं अनुभवी नेतातय्सं धाःगु सकसिनं माने याइ। नेपाःया सन्दर्भय् स्वयेगु खःसा नेपालय् आःतक अज्याःपिं अनुभवी बुद्धिमानीपिं नेताया उदय हे मजूनि। दकलय् बुराम्ह नेता गिरिजा खः। थन वहे दकलय् लोभी पापी। मतिकुराम्ह। अथे हे तंु सकल पार्टीया अप्वः धइथें नेतातय् मति मभिं। एमाले दुने स्व, मन्त्री पदया लागिं तुति सालेगु आःतक मत्वःतूनि। नेतातय् गुटबन्दी झन झन ब्वलना वःगु खनेदु। अले माओवादी नेतातय् मति ला गथे यानाः जिउ नेपालय् थःगु एकतन्त्रीय शासन नीस्वनेगु हे जक खः। यमित ल्हाइ धाइया मतलब नं मदु। अझ नकतिनि ब्वलंपिं तराई मधेशया नेतातय् खँ ल्हाये धाःसा उपिं बुयाः दछि तक नं नापं च्वने मफु। माजु भौ थें ल्वाना जुइगु। छखे च्वने हथाय्पिं, तःधंगु भाग काये हथाय्पिं।
नेपाः नेपाःमितय्गु देय् खः। थन राज्य संचालनया लागिं पिनें नेतात वयाः ल्वापु छिने माःगु आवश्यकता मदये माःगु खः। तर नेतातय् थ्व भागबन्डा ज्यंकेया लागिं आः नं दक्षिणपाखें नेता वइगु हं। गुलि मछाः मजूगु? थः देशया नेतातय् खँ मन्यँसे विदेशी नेतातय् खँ न्यनीपिं। थःगु देशया भागबन्डाय् विदेशीत वयाः ज्यंके माःगु। थज्याःपिं नेतातय्त ख्वाः छपातं जाय्क थुकलं बीम्वाः ला? माः, अवश्य
माः। थुइक नकचरा ! थ्व मन्त्रीमण्डल नीस्वनेया लागि थीथी पार्टीतय्सं थुलि हे मन्त्री माः, थ्व थ्व हे मन्त्रालय माः धकाः गुगु जिद्दि यानाच्वंगु दु। काका च्वंगु दु। थ्व सरासर गलत खः। लुटमति खः। असहमति खः। सहमति धइगु खःसा प्रधानमन्त्रीं स्वयाः बिउगु भाग सहर्ष स्वीकारे यायेमाः। प्रधानमन्त्रीयात ज्याछिंक ज्या याके बीमाः। हानं प्रधानमन्त्रीं नं स्वयाः स्वयाः इना बीमाः। हानं एमालेया सरकारय् गिरिजां हस्तक्षेप यानाच्वंगु झन तःधंगु असहमति खः। गिरिजां धाल धकाः वं धाःम्ह मनूयात वं धाःगु मन्त्रालय बिल धाःसा थ्व सरकार एमालेया मखु गिरिजाया निजी सरकार थें जुइ। गिरिजां सहयोग यात धायेवं सरकार ला वं धाःथे न्ह्याके फइ मखु नि। कन्हय् न्हापा मनमोहनयात मेचं कुर्का बिउ थें थ्व सरकारयात नं क्वःथलेत गिरिजां आइतवार पियाच्वनी मखु ।

खबरदार ! आः थ्वःगु थ्व सः नेपाली जनताया आक्रोशया सः खः। नेपाली जनता हीमीचाःगु सः खः। नेपाली जनतां नेतातय्त विश्वास यायां आन्दोलन यायां थौं गणतान्त्रिक लोकतन्त्र ल्हातय् लःल्हाये धुंकाः नं नेतातय्सं जनतायात सुख शान्ति बीमफु। छुं सुविधा बी मफु। थःथः जक मोज मज्जा यानाः जनतायात अझ न्हापा स्वयां अप्वः दुःख पीडा बियाच्वंगु दु। जनताया सह यायेगु सीमा फुइन। जनतां आः ला थुपिं भिनी धइगु आशा भरोसा तकं मकायेधुंकल। वर्तमान नेतातय् सरकारय् वनेया लागिं म्हिताच्वंगु थ्व घचायापुगु कासा खनाः सह याये मजीधुंकल। जि जक जिउसा त्वाकलय् तयाः चदंक पाले मास्ति वयेधुंकल। आजीवन झ्यालखानाय् कुने मास्ति वयेधुंकल। छम्ह छम्ह लोभी पापीपिं ल्ययाः नेपाः मांया नामय् बलि बी मास्ति वयेधुंकल। चाः ला मचाः ला नेतातय्सं? थू ला मथू ला नेपाली जनताया भावना? लिबाक जूसां नेतातय्सं थुल धाःसा सहमति सहकार्य जुल धाःसा लाःनि जनतां माफी बी तिनि। अन्यथा जुल धाःसा छन्हु अज्याःगु दिं वइतिनि नेतात स्वयां जनतां ल्यत्तु ल्ययाः नेपाःमांया नामय् बलि बी तिनि। नाप नापं आः नीस्वनेगु संविधानय् जनतां ल्यया छ्वःपिं नेतातय्त मभिन धाःसा हानं जनतां लित सःते फइगु प्रावधान तयेमाः। अले जक नेतातय्त जनतां कजे यायेफइ। नेतात जनताप्रति बफादार जुइ। अन्यथा नेतातय् ताल सदां थथे हे जुयाच्वनी ।

More Stories Like this