अन्तर माध्यामिक विद्यालय नेपालभाषा न्ह्यसः लिसः कासा-११२९
सन् साय्मि
दकसिबे न्हापां अन्तर माध्यामिक नेपालभाषा न्ह्यसः लिसः कासा ने.सं. १०९२ सं मंगलोदय मा.वि. थानकोटं तःजिक न्यायेकूगु खः। प्रधान अध्यापक वंशीदास अमात्यजुं शिल्डया व्यवस्था यानाः दँय्दसं न्यायेकेत नेपालभाषा न्ह्यसः लिसः कासा सञ्चालन समितियात लः ल्हाना थकूगु खः। १०९२ सं न्ह्याःगु थुगु न्ह्यसः लिसः कासाया उपाधि त्याकूगु बहुउदेशीय आदर्श मा.वि. थिमिं खः। दकलय् लिपांगु अर्थात च्याकःगु अ.मा.वि. न्ह्यसः लिसः कासा ने.सं. १११४ य् दिल्लागा ७ शुक्रवाःनिसें ३० आइतवाः तक सिद्धार्थ वनस्थली इन्स्टिच्यूट मा.वि. ल्हुतिं तःजिक न्यायेकल उपाधी श्री महांकाल मा.वि, महाबुं त्याकल। ने.सं १११४ दिल्लागा ३० कुन्हु बिजं कासा क्वचायेवं राष्ट्रिय सभागृहया दबुली सिद्धार्थ वनस्थली इन्स्टिच्यूटया प्रिन्सिपल लक्ष्मण राजवंशीं हिमालय मा.वि.या प्रधान अध्यापक विजयरत्न वज्राचार्ययात बेतालीं चिकाः पाःब्व लःल्हात। हिमालय मा.वि. ने.सं. १११५ य् गुकःगु कासा न्यायेकूगु धकाः ब्वति कायेत इनाप यासें थीथी ब्वनेकुथिइ पौ व्छया हयाः नां दुकाल। तर प्राविधिक कारण क्यनाः लिछ्याःगु थौं १५ दँ दयेधुंकल कासा न्ह्याःगु मखु छाय् खः? अथे हे थुगु खँय् नेपालभाषा न्ह्यसः लिसः सञ्चालन समितिं स्कूलय् जक मखु क्याम्पसय् नं विद्यार्थीतय् दथुइ नेपालभाषाया साहित्य, इतिहास, धर्म संस्कृति आदि ध्वाथुइकेत न्ह्यसः लिसः कासा न्ह्याकेत अलग्ग अलग्ग शिल्डया व्यवस्था यानाः न्ह्याका वयाच्वंगु ताः ई दत, क्याम्पसय् नं दिनाच्वंगु छाय् थें मसिउ? थथे दिनाच्वंगु नेपालभाषा न्ह्यसः लिसः कासा सञ्चालन समिति व पाःब्व लःल्हाना कयातःगु स्कूल व क्याम्पसयात न्ह्यलं चायेका बीत श्री महांकाल मा.वि., महाबुं थःगु स्वर्ण जयन्तीया लसताय् अन्तर माध्यामिक विद्यालय नेपालभाषा न्ह्यसः लिसः कासा-११२९ ग्वसाः ग्वःगु खः।
गुलांगा ५ व ६ निन्हुयंकं कासा तःजिक न्ह्याकेत दिल्लागा नवमिनिसें येँया ३६ गू ब्वनेकुथि पौ छ्वया गुंलाथ्व १४ तक नां दुथ्याकेत इनाप याना। तर निगू ब्वनेकुथि शान्ति निकुञ्ज मा.वि व नेपाल आदर्श मा.विं. जक नां दुथ्याकल। अप्वः ब्वनेकुथिया प्रअतय्सं मस्तय् वं नेवाः भाय् ल्हाये मसः मथू धयां जिल ला, मस्तय्गु जाँच धयां जिल ला, पत्र जिमिगु ल्हातय् मथ्यं धयां जिल ला ब्वति कायेकेत इच्छा मयाः। जिमि प्र.अ. नं व्यक्तिगत रुपं स्वापू तलं नं प्र.अ.तय्सं मस्त व्छया हयेगु खँ मल्हाःगुलिं दिक्क जुयाः कासा मयायेगु धाये धुंकल। विद्यालय व्यवस्थापना समितिया अध्यक्ष विपेन्द्र प्रकाश महर्जनजुं यायेमाः धकाः वः बिउगुलिं थुगु कासा न्ह्यात। न्ह्यकुन्हु तक १० गू ब्वनेकुथि धकाः ब्वति कायेगु बचं नं बिल तर ५ गू स्कूलया नां दुथ्यात। गुलांगा पञ्चमि सुथय् १०३० तक पियां नं ५ गू स्कूल बाहेक मवःगुलिं छक्वलं बिजं कासा यानाः कासा सिधयकेत हिसि मदुगुलिं उघि्रमय् जिपिं हिमालय् मा. वि. वनाः हाःवना। बल्ल बल्ल विजय सर क्लासय् ब्वनाच्वंपिं निम्ह मस्तय्त व्छया हल। कासा न्ह्यायेत्यंबलय् जगत सुन्दर ब्वनेकुथि नं वयेमखु धाःपिं थ्यंकः वल। न्ह्यगू स्कूलं ब्वति काःगुलिं गोला प्रथा कथं 'क' पुचलय् स्वंगू व 'ख' पुचलय् प्यंगू स्कूल दुथ्याकाः छधौ लिपा कासा न्ह्याका ।
'क' पुचलय् सिद्धार्थ वनस्थली इन्स्टिच्यूट (मा.वि.), विश्व निकेतन उमा.वि व त्यौड मा. वि. दथुइ धेंधेंबल्ला कासा जुल। कासा न्ह्याये न्ह्यः जिपाखें नेपालभाषा न्ह्यसः लिसः कासाया बःचाहाकःगु खँ तयाः प्र.अ बिजया वदन श्रेष्ठजुं न्ह्यसः छुत। 'अ.मा.वि नेपालभाषा न्ह्यसः लिसः ११२९ उलेज्या यानादिल। जज जगत सुन्दर ब्वनेकुथिया शान्ति मानन्धर, ग्वसाः खलः स्कूलपाखें शुष्मा बज्राचार्य, न्ह्यसः न्यनामि वीरेन्द्र वज्राचार्यजु जुयादिल। १० गू राउण्ड न्ह्यसः कासामितय्सं ल्यःगु ल्याः कथं क्लक वाइज व एण्टी क्लक वाइज कथं नेपाः व अन्तर्राष्ट्रिय बारे सामान्य ज्ञान १) भाषा साहित्य २) व्यक्ति व्यक्तित्व ३) इतिहास ४) भूगोल ५) श्रव्य दृश्य ६) धर्म संस्कृति ७) विज्ञान ८) गणित ९) समसामयिक राष्ट्रिय व अन्तर्राष्ट्रिय घटना व १०) कासा बारे न्यनागुलि सिद्धार्थ वनस्थली १९ गू ल्याः, विश्व निकेतनं १३ गू ल्याः कागुलिं विजय जुल ।
'ख' पुचःया कासाय् हिमालय मा.वि, जगत सुन्दर ब्वनेकुथि, नेपाल आदर्श मा.वि व शान्ति निकुञ्ज मा.वि.या दथुइ धेंधेंबल्ला कासा जूबलय् हिमालय मा.विं ३० गू ल्याः, जगत सुन्दर ब्वनेकुथिं १६ गू ल्याः कयाः बिजं कासाय् थ्यन। नेपाल आदर्श मा. वि व शान्ति निकुञ्ज मा.वि १५/१५ गू ल्याः काःगुलिं बिजं कासां पिने लात। थुगु कासाया न्ह्यसः न्यनामि हरिकृष्ण महर्जन, जज सिद्धार्थ वनस्थलीपाखें चन्द्र लक्ष्मी वज्राचार्य व ग्वसाः खलःपाखें सिद्धिलक्ष्मी तुलाधर च्वनादीगु खः ।
निन्हु यंक कासा न्ह्याके धकाः प्रचार याःसां ब्वति काःगु स्कूल म्हो जूगुलिं उकुन्हु हे बिजंकासा यायेमाल। बिजं कासाय् न्ह्यसः न्यनामि थ्व च्वसुया च्वमि, जजपिं ग्वसाःखलः पाखंे श्रृजना शाक्य व खगेन्द्र प्रसाद दाहाल च्वनादीगु खः। बिजंकासाय् Rapid fire round य् १ गू मिनेट दुने १० गू लिसः बीमाःगु १ गू लिसःया ३ गू ल्याः दइगु नं दुथ्याः। बिजं कासाय् हिमालय मा.वि ३८ गू ल्याः कयाः न्हाप, विश्व निकेतन उमावि ३५ गू ल्याः कया लिउ जगत सुन्दर ब्वनेकुथि ३० गू ल्याः कयाः लियांलिउ व सिद्धार्थ वनस्थली इन्ष्टिच्यूट उमावि १५ गू ल्याः कया हःपाः सिरपाः त्याकेत ताःलात। विद्यालयया स्वर्ण जयन्तीया लसताय् जूगु थुगु कासा यंलाथ्व पारु खुन्हु राष्ट्रिय सभागृहय् स्वर्ण जयन्ती ज्याझ्वलय् सिरपाः कायेत तालाःपिं विद्याथीतय्त ट्रफि व दसिपौ, अथे हे ब्वति काःपिन्त दसिपौ इनी ।
अन्तर माध्यमिक विद्यालय न्ह्यसः लिसः कासा-११२९ य् १० गू राउण्ड व र्यापिड फायर राउण्डय् २८ निसें ३० प्रतिशत नेपालभाषा साहित्य, इतिहास, धर्म संस्कृति, सिरपाः आदि न्ह्यसः दुथ्याः। लसताया खँ नेपालभाषा सम्बन्धी न्ह्यसःया २५ प्रतिशत मयाक लिसः वःगु दु मात्र सममामयिक विषय भचा धाये थाकुल। झीसं गर्व यायेमाः, ताः ई तक नेपालभाषा न्ह्यसःलिसः कासा मजूसां विद्यार्थी किजा केहेँपिंके नेपालभाषा इतिहास, धर्म संस्कृति साहित्यया ज्ञां म्हो मजू। ई कथं कासाय् हिउपाः वःगुलिं कासामि निम्ह ३० सेकेण्ड लिसः बीमाःगु मौका न्ह्यसःया लिसः १०/१० सेकेण्डं न्हापां न्यंगु न्ह्यसःयात ३ गू ल्याः व मौका न्ह्यसःयात २ गू ल्याः बिजं कासा र्यापिड फायर राउण्ड दुथ्याःगु आदि।
थौं झीगु देशय् संघीय गणतन्त्र वयेधुंकल तर झी नेवाःतय्के अझ नं भाषिक जातीय चेतना खने मदु धइगु खँ ग्वसाः खलकं खाइगु अनुभव याःगु दु। मा.वि तगिमय् ९ गू ब्वनेकुथि नेपालभाषा विषय ब्वनेदु, वंगु दँनिसें येँ महानगरपालिकाया अनुदानं २० गू स्कूलय् प्रा.वि. तगिमय् नेपालभाषा विषय ब्वंकाच्वंगु दु। अथे हे अप्वः धइथें सामुदायिक स्कूलय् नेवाः प्रधान अध्यापक दु सलंसः विद्यार्थी मध्यय् निम्ह नेवाः मस्त माले मफु थ्व गजाःगु दुःखया खँ। थुकिं झी नेवाःत छवाः जुइ फइ ला? आशा याये ताःईनिसें दिनाच्वंगु 'अन्तरमाध्यामिक नेपालभाषा न्ह्यसः लिसः कासा' थ्वहे दँय् ग्वसाः ग्वःगु स्वये दयेमाः न्यने दयेमाः ।
More Stories Like this
जातीय संघीयताया खँय् नेमकिपा प्राडो, पाजेरो ब्वाकेगु ख्यः मखु राष्ट्रपति प्रणाली बारे विवाद नेवाःतय्त जागृत याइगु 'नेपाःमिया नुगः सः' खँ स्वनिगःया
