परराष्ट्र मन्त्रीपाखें प्रमया अपमान

परराष्ट्र मन्त्री सुजाता कोइरालां अन्तिम इलय् वयाः प्रधानमन्त्री माधव नेपालया भारत भ्रमणय् सहभागी मजुइगु निर्णय यानाः नेपाःयात हानं छक्वः विश्व दबुली बदनाम याना बिउगु दु। सरकार प्रमुखया विदेश भ्रमणय् परराष्ट्र मन्त्रीया उपस्थिति अनिवार्य चलन थें जुया वयाच्वंगु दु। आः नं प्रम नेपालया भारत भ्रमणया लागिं भारत वनाः माःगु तयारी परराष्ट्र मन्त्री कोइरालां हे यानादीगु खः। तर प्रमया भ्रमण जुइगु इलय् धाःसा वय्कलं थः उकी सहभागी जुइ मखु धासें प्रमयात मछिंका बिउगु जक मखु देय्या राजनीतिक, कुटनीतिक मर्यादायात नं हद थ्यंक हे वनाः ध्वस्त याना बिउगु दु ।

चर्चाय् वः कथं वय्कलं प्रमलिसे भारत वने मखु धकाः निर्णय याःगुया मुख्य कारण थःत वर्तमान सरकारय् उपप्रधानमन्त्री मदयेकू धकाः खः। यदि थ्व अथे खःसा थ्व वय्कःपिनि आन्तरिक मामिला खः। थुकियात विदेशीतय्सं तकं सीके बीमाःगु आवश्यकता मदु। वय्कलं यानादीगु थ्व ज्या छम्ह क्यानिबेट मन्त्रीया रुपय् अनुशासनया घोर उल्लंघन नं खः। प्रधानमन्त्रीया भ्रमणय् वने मखु धकाः याःगु थ्व असहयोगया लागिं प्रधानमन्त्रीं वय्कःयात कारवाही नं यायेफु। तर विडम्बना, वर्तमान सरकार प्रमया अधिनय् नं मदु। अथे खःसां कोइरालां याःगु थ्व अपमानपूर्ण व्यवहारं वर्तमान सरकारया गठबन्धनय् धक्का लाकीगु खतरा धाःसा ब्वलंका बीफु। आः सुजातायात उपप्रधानमन्त्री मदयेकू धकाः कांग्रेसं घूर्की क्यनी लाकि प्रमया भ्रमणय् वया मबिउ धकाः एमालें कारवाही याइ, ल्वापु थनं हे शुरु जुइगु खनेदु ।

More Stories Like this