प्रमयात माओवादीया पौ
ब्वाँय् वँवं हे नाराबाजी याये मखन
येँ(सन्ध्या टाइम्स)/प्रधानमन्त्री माधव नेपालया भारत भ्रमण परराष्ट्र मन्त्री सुजाता कोइरालाया 'बहिष्कारं' यानाः भद्रगोल ला जूगु हे जुल, उकिसनं माओवादीपाखें भारतया न्ह्यःने छ्यों क्वछुकाः छुं हे ज्या याये दइ मखु धकाः छ्वयाहःगु छपु पौया कारणं अझ दवावय् नं लाःगु दु।
प्रम नेपालयात भारत भ्रमण वने न्ह्यः माओवादीपाखें छपु लिखित पौ हे बियाः थ्व सचेत याःगु जुयाच्वन। माओवादीं छ्वयाहःगु पती प्रधानमन्त्री नेपालं भारतय् वनाः न्हापा न्हापायापिं प्रधानमन्त्रीतय्सं थें पुलिं चुयाः छुं हे सम्झौता याना वये मते धकाः इनाप यानातःगु खँ सीदुगु दु। नेपाःया राष्ट्रियता व सार्वभौमसत्ता रक्षाया लागिं भारतया न्ह्यःने पुलिं चुयाः जूसां न्ह्यागुं सम्झौता याना वयेगु चलनयात प्रधानमन्त्री माधव नेपालं त्वाःथलेमाः धासें माओवादीं थ्व सचेत याःगु खः ।
माओवादी सूत्रं धाः कथं प्रम नेपाल भारत भ्रमणया लागिं प्रस्थान याःगु न्हि कुन्हु एअरपोर्टया पिने च्वनाः नाराबाजी यायेगु व भारतय् वनाः राष्ट्रघाती ज्या याये दइ मखु धकाः सचेत यायेगु छगू ज्याझ्वः नं माओवादीं दयेकेधुंकूगु खः। एअरपोर्ट पिने धर्ना बीगु लागिं माओवादीया छथ्वः कार्यकर्तात छगः बसय् च्वनाः उखे वंगु नं जुयाच्वन। तर उपिं वनाच्वँच्वं हे प्रम नेपालया गाडी एअरपोर्ट प्रवेश जुइधुंकूगु कारणं अज्याःगु धर्ना व विरोध ज्याझ्वः धाःसा याये मखन ।
थ्वहे झ्वलय् प्रम माधव नेपाल भारत भ्रमण क्वचायेकाः नेपाः वयेवं हे रक्षा मन्त्री विद्या भण्डारी भारत वनीगु जूगु दु। उसाँय् मदयाच्वंम्ह मय्जु भण्डारी थप स्वास्थ्य उपचार यायेत उखे वनेत्यंगु खः। वय्कः उकुन्हु भारत वंबलय् पुलिया अपरेशन याना वःगु खः ।
कांग्रेसय् कचवं
परराष्ट्र मन्त्री सुजाता कोइराला प्रम माधव नेपाललिसे भारत भ्रमणय् मवंगु खँयात कयाः उखे कांग्रेसय् धाःसा कचवं पिहां वःगु दु। कांग्रेसया छथ्वः केन्द्रीय दुजःतय्सं सुजातायात सरकारं लित सःतेमाः धकाः माग याःगु दुसा थौं थुकिया बारे हे सहलह यायेत छथ्वः केन्द्रीय दुजःतय्सं पार्टी सभापति गिरिजाप्रसाद कोइरालालिसे वार्ता याइगु खँ नं सीदुगु दु। सुजाताया कारणं वर्तमान सरकारयात क्वःथले मजिउगु निष्कर्ष नं कांग्रेस नेतातय्सं पिकाःगु दु ।
