थौं अबुया ख्वाः स्वयेगु न्हि
थ्व संसारय् मनू मां व बौया माध्यमं जक हे वइगु खः । बौनं थम्हं सक्व स्यानाबिइ, फुथें माःगु पुरेयानाः ब्वलंकी । अज्याःम्ह पुज्यायेबहम्ह बौयात हनेत दछिइ छक्वः बौया ख्वाः स्वयेत विशेष न्हि खः - थौं गुंलागा आमाइ ।
बौया सदां भिं जुइमा, बौनं थःत न्ह्याबलें मतिना यानाः तयातःगु लुमंकाः बौयात यःगु उपहार, मह्रिचह्रि, फलफुल, धौ लःल्हानाः ख्वाः स्वइगु याः । गुलि गुलिस्यां ख्यें, वः, न्या, ला, अय्लाः तयाः सगं बिइगु नं चलन दु ।
अथेहे बौ मदये धुंकूपिंसं सुथय् म्वः ल्हुयाः सुचिनिचि यानाः, बौनं खंकाब्यूगु कर्म लुमंकुसें बजि, मह्रिचह्रि, फलफुल, धौ, चि व पालु तयाः कुल पुजारी ब्रम्हू वा गुभाजुयात निसलाः बिइ । भोजन याकेगु ल्याखं जाकि, केँ, तरकारी, चि, हलू, घ्यः व सिँ न्यायेत दक्षिणा तयाः सिधा बिइ ।
गुलि गुलिंलाः येँया गोकर्ण तिर्थ वनाः बागमति दोभानय् म्वःल्हुयाः, गोकर्णेश्वर महाद्यः दर्शन यायेगु व फु थेँ छायेगु, निसलाः बिइगुम सिधा बिइगु, जलदान व सराद्ध नं यायेगु याः ।
नारायणद्यःया घाँय् अवतार कुश थुकुन्हु जक पुइज्यूगुलिं थ्व न्हियात कुशेऔँसी धकाः नं धायेगु याः ।
More Stories Like this
मेरिल्याण्डय् लाखय् व पुलुकिसिलिसे हन येँयाः स्यस्यः समाजं सत्यमोहन जोशीयात हन मूलयात ग्वाहालि लःल्हात मेहेन्दी च्वयेगु कासा जुइगु मचातयत मां भाय् स्यनेगु संस्था नीस्वन
