भ्रमण प्रमया, चर्चा प्रचण्डया

चीनया प्रभाव पनेत माधव हे माः

येँ (सन्ध्या टाइम्स)/अन्तिम इलय् वयाः परराष्ट्र मन्त्री सुजाता कोइरालां भ्रमण रद्द याःगुलिं झ्यातुगु नुगः ज्वनाः भारत भ्रमणय् वंम्ह प्रधानमन्त्री माधव नेपालं आखिर न्हूदिल्ली थ्यंकाः नं छुं लसताया खँ धाःसा न्यने मखं। वय्कः न्हूदिल्ली थ्यनेवं अन वय्कः व नेपाःया बारे सिबें नं माओवादी व उकिया अध्यक्ष प्रचण्डया बारे जक न्यनाः वय्कःयात 'हैरान' याःगु खँ सूत्रं धाःगु दु ।

वय्कःया भ्रमण दलय् दुथ्याःम्ह छम्ह दुजलं बियाहःगु जानकारी कथं भारतय् नेपाःया प्रधानमन्त्रीयात तःधंक लसकुस यायेगु छुं हे तयारी मदु। वय्कःयात भलाकुसारी बांलाक याःसां राज्यस्तरपाखें बीगु सम्मान धाःसा छुं हे बिउगु खने मदु। उकिसनं परराष्ट्र मन्त्री सुजाता कोइरालां अन्तिम इलय् वयाः भ्रमण रद्द याःगुलिं उकिया बारे चर्चा थ्यंक मजूसां गाइँगाइँ धाःसा व्यापक रुपं जुयाच्वंगु दु।
भाजु नेपाल भारत थ्यने न्ह्यः नं वय्कःया भ्रमणया तयारी यानाच्वंपिं पदाधिकारीतय्सं नेपालय् माओवादीत थौंकन्हय् छु यानाच्वन व प्रचण्डं छु बिचाः यानाच्वन धकाः जक न्ह्यसः तयेगु यानाच्वंगु खः। भाजु नेपाल म्हिगः न्हूदिल्ली थ्यने सातकि वय्कःयात भाकपा (मा.) या नेता सिताराम यचुरी वयाः नापलाःगु खः। उगु इलय् नं वय्कःपिनि दथुइ माओवादीयात गुकथं 'ट्राय्कं' पिने मतयेगु धइगु विषयय् सल्लाह जूगु खँ सूत्रं धाःगु दु ।

नेपाः मामिला स्वइपिं भारतीय अधिकारीतय् बिचाः थ्व इलय् नेपालय् माधव नेपालया सरकार हे टिके जूसा जिउ धइगु खनेदु। उमिसं खास यानाः नेपालय् शान्ति कायम जुइमा धइगु ल्याखं सिबें नं नेपालय् चीनया प्रभाव म्हो जुइमा धइगु ल्याखं माधव नेपालया सरकारयात टिके यायेमाः धइगु बिचाः बीगु यानाच्वंगु खँ धाःगु दु। थ्व स्वयां न्ह्यःया माओवादी सरकारं चीनलिसे अप्वः स्वापू तःगु कारणं भारत तम्वःगु खःसा आः चीनया अज्याःगु प्रभावयात म्हो यायेगु लागिं नं नेपालय् माधवया सरकारयात टिके याना तयेमाः धइगु विश्लेषण भारतय् जुयाच्वंगु खनेदु। भारतय् प्रम नेपालं गुलि नं नेतात नापलाइ, करिब फुकस्यां वय्कःयात थ्व चिउताः क्यनीगु अनुमान नं सूत्रं याःगु दु।
भ्रमणय् परराष्ट्र मन्त्री सुजाता कोइराला मवःसां उकिया मनोवैज्ञानिक बाहेक मेगु छुं कथंया लिच्वः मलाःगु खँ नं सूत्रं धाःगु दु ।