सक्वया पञ्चदान व खड्गयोगिनी देवी

अमृतानन्द वज्राचार्य

परापुर्वकालय् नेपालमण्डल स्थापना जुइ न्ह्यः मणिशैल डाँडाय् पदममाला गुँविहारय् वज्राचार्यपिनिगु कुलय् विभिन्न तान्त्रिक योग, चर्यायोग, मन्त्र, तन्त्र विद्यां निपूर्ण मन्जुदेव बज्राचार्य सक्व मणिशैल पर्वतं पिने सँदेशय् बिज्यानाः थःगु धर्म प्रचार यानाः सँदेया म्ह्याय्मचा विवाह यानाः पदममाला बिज्याःबलय् थःगु रिती कथं विवाह मजूगु कारणं श्री श्री श्री उग्रतारा वज्रयोगिनी देवीयागु पुजारी जुयाबिज्यायेगु ह्वःताः चूमलात। थनं लिपा मन्जुदेवं वज्रयोगिनी देवीयागु ध्यान कयाः तन्त्र साधनं सिद्धि लाभ यानाः वंगु झ्वलय् वसपोलयात खड्गयोगिनी देवीं दर्शन बियाबिज्यात। थः व थः जहानपिं नापं च्वनाः तान्त्रिक महा अहोरात्री महाहोम यानाः खड्गयोगिनी देवीयागु प्रत्यक्ष दर्शन व संवाद यासें पञ्चदान जात्रा न्ह्याकाबिज्यात ।

पञ्चदान जात्रा उगु इलय् दुथुमाला, पदममाला, नागार्जुन पर्वतया अपभ्रंस जुयाः नागाचा जूगु थाय् जोगेश्वर चैत्यया लिउने व सिद्ध गुफाया जःखः वज्राचार्यपिनि वासथानय् थुगु पंचदान जात्रा मन्जुदेवं थः निम्ह जहानपिं धुम व प्यासि कुल पुत्रपिं नापं विभिन्न तान्त्रिक स्लोक, चर्या नृत्य व नाम संगति तुतः ब्वनाः थुगु जात्रा मणिशैल पर्वतय् चले जुयाच्वंगु धकाः थीथी धार्मिक ग्रन्थय् वर्णन जुयाच्वंगु खनेदु। अथे हे येँया मन्त्र सिद्धि महाविहारया कुलपुत्र रत्न कुलेशा वज्राचार्यं रचना यानाबिज्याःगु 'गुरु महामन्जुश्री' धाःगु चचाय् पदमगिरी धर्मधातु महाविहारय् जन्म कया बिज्याःम्ह मन्जुदेव धकाः थौं स्वयां ५०० दँ न्ह्यः चिनातःगु चचाय् वर्णन यानातःगु दु। अथे हे मखं बहाःया कुलपुत्र प्रा. मदनसेन वज्राचार्यं च्वयाबिज्याःगु छपु च्वसुइ नं नेपाःया प्रथम गायक संगीतकार महामन्जुश्री खः धकाः उल्लेख यानाबिज्याःगु खनेदु। सक्वया पञ्चदान जात्रा थौंकन्हय् मणिशैल पर्वतय् मयासे सक्व देशय् जुइगु परम्परा दु। सक्व गुँबहाया कुलपुत्र हिरण्यदेवया निम्ह काय जयदेव व ज्ञानदेव सक्व देशय् कुहां बिज्यानाः ओको बहालय् च्वनाबिज्यात। जयदेवं थः म्ह्याय्मचा देवकीया डोला जिलाजं बरेयात थःगु श्री संपत्ति बियाबिज्यात। 'इथु' कवःया बरे सिद्धिदेवया पालंनिसें थुगु पञ्चदान सक्व देशय् चले जुल। तर थनयापिं नेवाःतय्सं थौं तक नं धायेगु याः, गुँबहाःया गुभाजुपिं थौं कुहां बिज्याइ, फक्व दान धर्म यायेमाः। थज्याःगु थन सक्ववासीपिनि धारणा दु व थन वज्राचार्यपिं गुलि कुल परिवार दु व फुक्क दुजःपिनिगु नामय् पञ्चदान कायेगु परम्परा ल्यं दनि, बीगु परम्परा नं दनि ।

सक्वया पञ्चदान परापूर्वकालय् सक्व देशय् यायेगु चलन दुबलय् द्वादशी तिथि कुन्हु गुँबहालय् बेस, कार्की व जोशी गुपिं वज्रयोगिनी देवीयागु धर्म परम्परा कथं थनयागु रीतिथितिं यानाः च्वनादीपिं भक्तजनपिं थुगु कवःयापिं नेवाःत वनाः वज्रयोगिनी देवीया लिउने विराजमान याका तःम्ह खड्गयोगिनी (बसुन्धरा) यात देशय् कुहां बिज्याकी। उगु चछि बसुन्धरा फल्चाय् विराजमान याका तइ। तुतिया तिथि कुन्हु पुष्पक विमान खःचाय् तयाः जवपाखे धुम व खवपाखे प्यासि निम्ह जहानपिं विराजमान याकाः न्याम्ह थकालि कुलपुत्र व शाक्य परिवार सहित स्वाला टोलं जात्रा शुभारम्भ याइ। देय् चाःहीकाः बसुन्धरा आगंछेँय् विराजमान यानाः चौथि कुन्हु गुँबहालय् तुं लित यंकी ।

ई हिलावं कथं थौंकन्हय् खड्गयोगिनी देवी तृतिया कुन्हु सुथय् गुँबहालं हयाः बसुन्धरा फल्चाय् विराजमान याकाः सकलें न्याम्ह थकाली व गुँबहाःया वज्रयोगिनी पुजारी देशय् कुहां बिज्यानाः थुगु जात्राय् सरिक जुइ। थ्वकुन्हु पुजारी कुहां बिज्याइगुयात हे गुभाजु कुहां बिज्यात धाइगु थें च्वं। खड्गयोगिनी देवीया पुष्पक विमान खःयात सिंगार यानाः धुम व प्यासि जवं खवं विराजमान यानाः सकल सक्व देय्या वज्राचार्यपिंपाखें मंगल गान, चचा, मन्त्र, तान्त्रिक श्लोक, नाम संगती स्तोत्र व वज्राचार्यपिनि मन्त्र धारणा यानाः प्याखंया भावय् चाःहीकीगु परम्परा खनेदु। उगु थाय्यापिं भक्तजनपिंसं पञ्चदान बियाः थुगु जात्रा क्वचायेकी। जात्राय् सक्वया वज्राचार्यतय्सं जक पञ्चदान कायेगु परम्परा खनेदु। छाय्धाःसां थनयापिं थकालींनिसें पञ्चदान काइगु जूगुलिं मेगु थाय्यापिं वज्राचार्यपिंत थाय् मदुगु खनेदु ।

सक्वया पञ्चदाननाप ज्वःलाःगु बौद्ध परम्परा, सक्वया वज्रयोगिनी देवीयागु जात्रा नं थ्वहे पञ्चदान कथं यायेगु चलन दु। स्वाला टोलं वज्राचार्य कुलपुत्रपिं वज्रयोगिनी देवीयागु खतय् विराजमान जुयाः च्याचा गुन्हु कुन्हु शाक्य कुलपुत्र क्वब्वानाः 'बरे क्वब्वायेगु ' धकाः विसर्जन याइगु परम्परा दु ।

येँ, यल, ख्वप, थिमियागु देय् आचाग १८ बहाःया कुलपुत्रपिंसं जक काये खनीगु दान परम्परा नं थ्वहे सक्व देय्यागु पञ्चदानलिसे ज्वःलाःगु खनेदु ।

पनौतिया नमःबुद्धयागु जात्रा नं थ्वहे पञ्चदान कुन्हु यायेगु चलन व महासुति जुजुया बाखं व मणिचुड जुजुया बाखंनाप ज्वःलाःगु खनेदु ।

फम्पिया ह्याउँम्ह वज्रयोगिनी देवी (खड्योगिनी देवी) या जात्रा थ्वहे पञ्चदान कुन्हु यायेगु परम्परा खनेदु। गुगु बौद्ध धर्म कथं खड्गयोगिनीया प्रत्यक्ष दर्शन कयाबिज्याःम्ह मन्जुदेव वज्राचार्यं न्यायेका बिज्याःगु खः ।

येँ देशय् न्यायेकाच्वंगु पञ्चदान जात्रा बौद्ध भक्तजनपिंसं न्यायेकीगु न्याः पन्जरां नं थ्वहे सक्व देय्या पञ्चदाननाप ज्वःलाःगु खनेदु। दुतिया तिथि कुन्हु स्वयम्भु दिपंकर क्वत हयाः देय् चाःहीकाः तृतिया कुन्हु पञ्चदान बियाः चौथि जुगः चःर्‍हे कुन्हु गोपुच्छ गिरी थहां बिज्याकेगु परम्परा दु। व सक्व देशय् शाक्य पुत्रयात सकल वज्राचार्यया कुलपुत्र धुंकाः च्वनेगु परम्परा थ्व फु बरेयागु परम्परानाप ज्वःलाःगु खनेदु ।

More Stories Like this