मांभासं शपथ ग्रहण याये दइगु अधिकार

राष्ट्रपति व उपराष्ट्रपतिं समेत थःपिनि पद व गोपनीयताया शपथ काइबलय् थःथःगु मांभासं काये दइगु व्यवस्था यानाः वर्तमान अन्तरिम संविधानय् न्हय्क्वःगु संशोधन यायेगु लागिं सरकारं संसदय् प्रस्ताव दर्ता याःगु दु। सरकारपाखें जूगु थ्व बांलाःगु ज्या खः। यदि थ्व प्रक्रिया न्ह्यःने वन धाःसा संसदय् छुं हे विवाद मजुसे पारित जुइगु खँय् सम्भवतः शंका मयाःसां जी। छाय्धाःसां वर्तमान सरकारय् २२ गू दल दुथ्यानाच्वंगु दुसा विपक्षी माओवादी ला झन् थ्व मामिलाया राजनीतिक न्ह्यलुवा हे जुल। संसदय् थुकियात याकनं छलफल यानाः पारित याःसा बांलाइगु खनेदु।
सरकारपाखें थ्व पलाः न्ह्याकेधुंकाः आः उपराष्ट्रपति परमान्द झां सर्वोच्चया आदेशयात पालना यासें खस भासं शपथ ग्रहण याःसां जिउ धकाः नं सरकारं आग्रह याःगु दु। आः चाहिं उपराष्ट्रपति झां खस भासं शपथ याःसां छुं मपात। यद्यपि वय्कःयात खस भासं शपथ याये हे माः धकाः दवाव बीगु धाःसा अझ नं मजिउनि। तर खस भासं शपथ कयां आः उपराष्ट्रपति झाया मानमर्दन धाःसा जुइ मखुत। वय्कःया शपथ ग्रहण प्रकरणय् सर्वोच्चं वय्कःयात बुका बिउसां वय्कलं गुगु मुद्दा ल्ह्वनादीगु खः व मुद्दा धाःसा त्याःगु दु ।
सरकारं संविधान हे हिलेगु धकाः गुगु पलाः न्ह्याकूगु खः व धइगु हे उपराष्ट्रपति झाया मुद्दाया विजय खः। सर्वोच्चं वय्कःयात खस भासं शपथ ग्रहण याये हे माः धकाः आदेश बिउसां वय्कः धुंकाःया उपराष्ट्रपतितय्सं धाःसा आः थःथःगु मांभासं शपथ ग्रहण याये दइगु जूगु दु। थुकिया मुक्कं श्रय भाजु झायात हे वनी। थम्हं ल्ह्वंगु मुद्दा त्याःगुलिं आः थःगु व्यक्तिगत पराजय स्वीकार यायेत वय्कः लिचिलेम्वाःल ।

More Stories Like this