चर्चा पंचेश्वर परियोजनाया
प्रधानमन्त्री माधव नेपालं थनिंनिसें यानादीत्यंगु भारत भ्रमणया झ्वलय् थनिं झिंस्वदँ न्ह्यः जूगु नेपाः-भारत महाकाली सन्धिया छगू अंगया रुपय् दुथ्याःगु पञ्चेश्वर परियोजना विशेष चर्चाया विषय जुयाच्वंगु दु। प्रम नेपालया थ्व भ्रमणय् पञ्चेश्वर परियोजना शुरु याकेगु बारे छुं कथंया सहमति जुइगु आशा जुयाच्वंगु खःसां अन्ततः नेपालं थुकियात विशेष रुपं मल्ह्वनेगु निर्णय याःगु दु ।
थनिं झिंस्वदँ न्ह्यः महाकाली सन्धि पारित याःबलय् नेपाःया राजनीतिइ तःधंगु हे उथलपुथल वःगु खःसा उकिया हे लिच्वः कथं एमाले थेंज्याःगु तःधंगु पार्टी विभाजन समेत जुल ।
विवादया कारणं सन्धि जुइधुंकूसां नं उकियात न्ह्यःने न्ह्याकेगु सवालय् नेपालं छुं हे पहल काये मफुत। नेपाःया थ्व कमजोरीया लबः धाःसा भारतं कयाच्वन। छाय्धाःसां भारतं टनकपुरय् बाँध दयेकाः फुक्क लः थम्हं उपभोग याना हे च्वंगु दु। थ्व परियोजना न्ह्यःने न्ह्यात धाःसा नेपाःयात बछि लःया अधिकार बीमाली। अय् जुयाः भारतं सन्धि जूगुयां झिंस्वदँ तक नं छुं हे न्वमवासे च्वनाच्वन। अबलय् पञ्चेश्वर परियोजनापाखें लय् खर्बौं तका आम्दानी जुइ धकाः जनतायात झंगः लाःपिं नेतात थौं नं मौन जुयाच्वंगु दु। सन्धि जूबलय् खुलाया दुने डीपीआर तयार जुइ धकाः सही याःगु खःसां थौं झिंस्वदँ दत, थुकिया बारे आखः छगः च्वयेगु ज्या जूगु मदुनि ।
थौं नेपाःयात सिंचाईया लागिं लः व उद्योगया लागिं विद्युतया तःधंगु आवश्यकता जुयाच्वंगु दु। थज्याःगु इलय् राष्ट्रिय सहमति दयेकाः पञ्चेश्वर शुरु यायेगु व नेपालं उकियापाखें कायेमाःगु पूर्ण अधिकार व लबः नं कया हे छ्वये माःगु आवश्यकता खनेदु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
