एमाले दुने हानं ब्वलंगु विवाद

न्हुछेकाजी महर्जन

नेकपा (एमाले) या च्याक्वःगु महाधिवेशन क्वचाःगु नं खुला दयेधुंकूगु दु। खुलाया दुने केन्द्रीय कमिटीया मुँज्या निक्वः च्वनेधुंकूगु दु, स्थायी कमिटीया मुँज्या माःकथं च्वनाच्वंगु दु। तर पोलिटब्यूरोया मुँज्या थौं तक मच्वंनि। महाधिवेशन क्वचाःगु खुला दयेधुंकल तर व महाधिवेशनं पास जूगु प्रतिवेदनत कायकर्तां काये मफुनि। बल्ल बल्ल विधान पित बिल तर व विधान पिथनाय् विवाद जुल, छाय् ?

नेकपा (एमाले) या च्याक्वःगु महाधिवेशनय् ओली पक्षया राजनीतिक, संगठनात्मक (बहुपदीय व्यवस्था) लाइन पास जूगु खः तर पदीय हैसियत खनाल पक्षय् वंगुलिं जकं राजनीतिक प्रतिवेदनत याकनं पिहां मवःगु खः कि? विधान धाःसा पिहां वल तर महाधिवेशनया भावना अःखः पिहां वल धकाः केन्द्रीय दुजःतय्सं हे धायेगु यानाच्वंगु दु। दसुया निंतिं महाधिवेशनया भावना धइगु आवंलि पार्टी पद्धति दुने अनिर्वाचित कमिटी मतयेगु खः। अर्थात हरेक कमिटीत अधिवेशन मार्फत निर्वाचित हे जुयाः वयेमाःगु व्यवस्था यायेगु खः। तर पिहां वःगु विधानय् धाःसा समन्वय कमिटी मनोनितपाखें गठन यायेगु प्रावधान तयातःगु दु। थ्व गनं वल ?

नेकपा (एमाले) दुने आः तक थीथी विषयय् न्ह्यागु हे जूसां वइगु विवाद कार्यकर्तापाखें मखुसें न्ह्याबलें नं नेतृत्वपाखें हे पिहां वयेगु यानाच्वंगु दु। थ्व छगू पार्टीया निंतिं दुर्भाग्य खः। पार्टीया जग धइपिं कार्यकर्ता खः तर उमिसं जक हे जस अपजस अनमेल सम्झौताया लिच्वः फया च्वनेमाःगु दु। उकिं गबलय् तक नेतात जिम्मेवार जुइ मखु अबलय् तक पार्टीइ थज्याःगु विवादं थाय् कया हे च्वनी ।

जि छम्ह नेकपा (एमाले) येँ जिल्ला कमिटीया दुजः जूगु नातां नकतिनि जुयाच्वंगु येँ जिल्ला कमिटी पुनर्गठन रुपान्तरणयात न्ह्याग्गु हे परिभाषा बिउसां थ्व छगू अवैधानिक पलाः खः धइगु जिगु बिचाः खः। उपत्यका समन्वय कमिटीं छ्यःगु थ्व छगू गलत पलाः खः। छाय्कि आः पिहां वयाच्वंगु विधान सर्वसम्मत मखु। महाधिवेशनया भावना कथं नं मखु। उपत्यका समन्वय कमिटीया ज्या धइगु उपत्यकाय् दुने च्वंगु जिल्ला कमिटीतय्त समन्वय यायेगु जक खः। थ्व खँ आः पिहां वःगु विधानया धारा २१ या उपधारा (ख) या बुँदा ५ य् व्यवस्था याना तःगु खः। विशेष अवस्थाय् जक गठन पुनर्गठन यायेत नं केन्द्रीय कमिटीं व्यवस्था याना तःगु दु। उकिं आःयागु येँ जिल्ला कमिटी संकेगु अधिकार उपत्यका समन्वय कमिटीयात मदु।
सुं नं क्वय्या कमिटीइ च्वंम्ह मनू च्वय्यागु गुगुं कमिटीइ निर्वाचित (पदेन बाहेक) जुइधुंका क्वय्यागु पद स्वतः दइ मखु धइगु उपत्यका समन्वय कमिटीया धापू पिहां वःगु सन्दर्भय् विधानय् व्यवस्था यानातः कथं जिल्ला कमिटीया छगू अधिवेशनं मेगु अधिवेशनया अवधि स्वदँ खः। थुकथं येँ जिल्ला कमिटीया प्यक्वःगु अधिवेशन २०६३ माघं जूगु खःसा थ्वयागु अवधि धइगु २०६६ पौष मसान्त तक खः। थज्याःगु अवस्थाय् विधानया धारा ३९ या उपधारा (ग) लय् दक्व तहया कमिटीयागु अधिवेशन वहे कमिटी आयोजक कमिटी जुइ धकाः व्यवस्था जुयाच्वंगु दुसा धारा ३३ (क) य् निर्वाचित कमिटी मदुसा, निर्वाचित कमिटीया अवधि फुइधंुकूगु अवस्थाय् जूसा जक च्वय्यागु कमिटीं मनोनयन यानाः संगठन कमिटी दयेकेगु अधिकार दइ। उकिं येँ जिल्ला पार्टी कमिटी थुगु विधानय् व्यवस्था जू कथं छुं नं धारा उपधारा कथं पिने मलाःगुलिं उपत्यका समन्वय कमिटीं याःगु ज्या अवैधानिक खः धइगु प्रमाणित जू ।

थुकथं हे उपत्यकाया छुं नेतातय्सं केन्द्रीय कमिटीया अन्तर पार्टी निर्देशन-२ या हवाला बियाः कमिटी भंग मखु कि रुपान्तरण जक यानागु धयाच्वंगु सन्दर्भय् नं उगु हे अन्तर पार्टी निर्देशन-२ लय् नं. ५(ख)या निगूगु बुँदाय् ''कमिटीया पुनर्व्यवस्थापन'' छ्यों तयाः महाधिवेशनं भूगोलयागु ज्यायात च्वछासें पार्टी दयेकेगु झ्वलय् निर्वाचित कमिटी व कार्यकर्तातय् भूमिकायात नं च्वछासें कमिटीत नायः नापया बहुपदीय संरचनाय् यंकेगु निर्णय जूगु दु। थुकथं कमिटीत पुनर्व्यवस्थापनया लागिं खुलाया दुने क्वय् न्ह्यथना कथंया ज्या क्वचायेके माःगु खँ न्ह्यथना तःगु दुसा 'क्वय् न्ह्यथना कथंया ज्या' धइगुली (थ्व विषयनाप स्वापू दुगु जक) पुलांगु विधान कथं अधिवेशन जूगु दक्वं जिल्लाय् न्हूगु विधान कथं अधिवेशनया ग्वसाः ग्वयेगु आःयागु जिल्ला कमिटी संगठन कमिटी वा अधिवेशन आयोजक कमिटीइ रुपान्तरण यानाः थ्व निर्देशन जारी जूगु (न्हिल्याः २०६६ असार ५ गते) यां खुलाया दुने अधिवेशन यायेधुंकेमाः। विशेष जिल्ला कमिटी दुथाय् आःयागु विधानं अनुमति मबिउगु जिल्लाया हकय् अञ्चल समन्वय कमिटीनाप परामर्श यानाः विधान सम्मत ढंगं कमिटी दयेकेगु धकाः अन्तरपार्टी निर्देशन-२ जारी याःगु खः। थथे गनं नं गुगुं नं दस्तावेजय् निर्वाचित कमिटीयात समयावधि बाँकी दनिबलय् हे छम्ह व्यक्ति (येँ जिल्ला कमिटीया छ्यांज्ये) च्वय्यागु कमिटीइ (केन्द्रिय कमिटी) निर्वाचित जुइवं हे वा उम्ह मनू क्वय्या कमिटीइ च्वने मदयेवं दक्व कमिटी हे भंग वा पुनर्गठन याये माःगु छाय्? गनं थ्व पंचायतकालया विधि दनावःगु खः कि? उगु इलय् संविधानयात ऐनं काटे याइगु, ऐन यात नियमं काटे याइगु, नियमयात परिपत्रं काटे याइगु, परिपत्रयात फोनं काटे याइगु धाइगु खः। आः थन नं विधानयात अपानिं काटे याइगु, अपानियात नेतातय्सं काटे यायेगु ज्या जुयाच्वंगु दु। थज्याःगु तालं पार्टी गबलय् लक्ष्यय् थ्यनी ?

थुकथं छगू सत्य थ्व नं खः - येँ जिल्ला कमिटीया मुँज्या केन्द्रीय कमिटीया सदस्य व उपत्यका समन्वय कमिटीया संयोजक भाजु राजेन्द्र श्रेष्ठया हे मू पाहांसुइ न्हि ल्याः २०६६।०४।२३ कुन्हु च्वनाः थ्वहे २०६६ पौष ३ व ४ गते येँ जिल्ला कमिटीया अधिवेशन यायेगु क्वःजिउगु खः तर वय्कलं थ्व अनौपचारिक मुँज्या जक जूगुलिं जिं उपस्थित जनय् हस्ताक्षर याये मखु धकाः मुँज्या क्वथा त्वःता वन सा वय्कःया लिउलिउ मेपिं छुं जिल्ला कमिटीया दुजःत नं मुँज्या त्वःताः वंगु खः। उगु मुँज्याय् नवायेगु झ्वलय् बहुमतया नामय् बलजफ्ती निर्णय याये दइ मखु धकाः ख्याच्वः नं बिया वःगु खः। थ्व धुंकाः २०६६।०४।२५ गते उपत्यका समन्वय कमिटीया आकस्मिक मुँज्या च्वनाः येँ जिल्ला कमिटीयात संगठन कमिटीइ रुपान्तरण (न्हापायापिं ४४ दुजः मेपिं दुजः थप यानाः ७३ म्ह दुगु कमिटी) जुल धकाः अपुष्ट बुखँत वयाच्वंगु दु (लिखित मदु)।
संयोजक भाजु राजेन्द्र श्रेष्ठं विधान व अपानि व्यवस्था मदयेवं परम्परा कथं यानागु धायेगु यानाच्वंगु दु ।

परम्परागत कथं नं स्वयेगु खःसा तत्कालीन अन्तरपार्टी निर्देशन १९ न्हिल्या ०६४।०२।१६, या बुँदा ४ य् ''गनं गनं पार्टी विधान नियमावली व्यवस्था याना तःसां उल्लंघन जुयाच्वंगु दु। विधानया धारा २० या १२य् अंचल समन्वय कमिटी केन्द्रीय कमिटीया अनुमोदन धुंकाः जक जिल्ला कमिटी गठन पुनर्गठन जुइ तर छुं छुं अंचल समन्वय कमिटीं केन्द्रीय कमिटीया अनुमोदन बिना हे जिल्ला कमिटी विघटन, संगठन कमिटी गठन, छ्याञ्जे नापं दयेकेगु ज्या जुयाच्वंगु खने दु ................ थथे यथेष्ट कारण बिना व ई मफुइकं हे कमिटीत विघटन, संगठन कमिटी गठन थेंज्याःगु विधान व नियमावली उल्लंघन यायेगु प्रवृत्ति व घटनात जुयाच्वंगुलिं थुज्वःगु घटनायात तुरुन्त विधान व नियमावलीया सीमा दुने हयाः कडाइपूर्वक लागू यायेगु मुँज्यां निर्णय याःगु दु।'' थथे न्हापा न्हापा नं जूगु ज्यायात भिंकेगु उजं तकं बिया हयेमाःगु खः ।

उकिं थुपालय् नं उपत्यका समन्वय कमिटीं येँ जिल्ला कमिटीयात झण्डै ४० प्रतिशत दुजः तनाः संगठन कमिटीइ रुपान्तरण याःगु नं अवैधानिक खः धइगु प्रमाणित जूगुलिं सम्बन्धित निकायं तुरुन्त भिंकेत दुनुगलंनिसें इनाप दु। अले पार्टीया पासापिंत नं जिगु इनाप दु कि नेतातय्गु व्याख्याय् जक सीमित मजुसे यथार्थ व सत्यता छु खः व नं सीकादिसँ। थःपिंसं नं विश्लेषण यानादिसँ ।

More Stories Like this