भारतय् धाःसा चर्चा हे मदु
भारतया प्रम नेपाः गबलय् वइगु ?
येँ (सन्ध्या टाइम्स)/प्रधानमन्त्री माधव नेपालं थनिंनिसें यानादीत्यंगु भारत भ्रमणया चर्चा नेपालय् तसकं जूसां भारतय् धाःसा खास हे सुनां चिउताः तयाच्वंगु मदु। जनस्तरय् ला झन् नेपाःया प्रधानमन्त्री वयाच्वंगु दु धइगु खँ तकं मनूतय्सं मसिउ ।
थौंकन्हय् न्हूदिल्ली थ्यनाच्वंगु 'हिमाल' खबरपत्रिकाया सम्पादक कनकमणि दीक्षितया अनुमान कथं धायेगु खःसा प्रम नेपालया भ्रमणयात अनया सरकारं नं खास हे ध्यान बी फइगु अवस्था मदु ।
भारतय् उकुन्हु तिनि न्हूगु सरकार वःगु खःसा उकी विदेशमन्त्री नं न्हूम्ह हे वःगु दु। उकिसनं विदेश सचिव नं थुगुसी हे तिनि न्हूम्ह वःगु दु। मन्त्री व सचिव न्हूपिं वःगु कारणं विदेश मन्त्रालयया कर्मचारीत नं तसकं हिलाबुला जुयाच्वंगु दु। खास यानाः नेपाः मामिला स्वइगु 'नर्थ डेस्क' थ्व इलय् मुक्कं हे न्हूपिंसं 'ह्याण्डिल' यानाच्वंगु दु। उकिं उमिसं नेपाःया प्रधानमन्त्रीया थ्व भ्रमणय् खास हे ज्या याये फइगु अवस्था मदुगु खँ मेगु छगू सूत्रं धाःगु दु ।
थ्व झ्वलय् न्हूदिल्लीइ च्वंपिं छुं नेपाःमि बुद्धिजीवीतय्सं धाःसा मेगु हे कथंया न्ह्यसः तया हयाच्वंगु दु। नेपालय् आः तक गुलि नं प्रधानमन्त्री जुल उपिं फुकस्यां भारत भ्रमण यानाच्वंगु दु। तसकं म्होचा ईया लागिं प्रधानमन्त्री जुइपिंसं तकं मेगु छुं ज्या याये मलाःसां भारत भ्रमण छता धाःसा यायेगु मत्वःतू। तर वंगु झिदँ न्ह्यवंनिसें भारतपाखें धाःसा छम्ह हे प्रधानमन्त्रीं नेपाःया भ्रमण याःगु मदुनि। वर्तमान प्रधानमन्त्री डा. मनमोहन सिंह हे निक्वः तक प्रधानमन्त्री जुलं नं वय्कःया नेपाः भ्रमण आः तक चर्चाय् तकं मवःनि ।
