पञ्चेश्वरया सहमति मयाइगु
प्रमया भ्रमण खर्च सरकारपाखें पास
येँ (सन्ध्या टाइम्स)/प्रधानमन्त्री माधव नेपालया भारत भ्रमणय् पञ्चेश्वर परियोजना बारे गुगुं नं सम्झौता मजुइगु खँ धाःगु दु ।
थौं सुथय् च्वंगु मन्त्रिपरिषद्या बैठकं उगु निर्णय याःगु खः। मन्त्रिपरिषद् बैठकय् पञ्चेश्वरयात कयाः सहलह जूसां नं सम्झौता धाःसा मजुइगु खँ सञ्चारमन्त्री शंकर पोखरेलं पत्रकारतलिसे खँ ल्हायेगु झ्वलय् धयादीगु खः। वय्कःया कथं देशय् उच्चस्तरीय राजनीतिक सहमतियात विशेष बः बियाच्वंगुलिं सम्झौता मयायेगु निर्णय जूगु खः। प्रमया भारत भ्रमणया झ्वलय् पञ्चेश्वरयात कयाः गुगुं नं कथंया सम्झौता मयायेत माओवादीं आग्रह याना वयाच्वंगु खः ।
अथे हे बैठकं जलविद्युत, व्यापार व नेपाः-भारत सीमा व्यवस्थापनयात धाःसा प्राथमिकताय् तःगु दु। अथे हे भ्रमणया झ्वलय् हुलाकी सतक, सुरक्षा, भुटानी शरणार्थी व विद्युत आयातयात नं प्राथमिकताय् तःगु खँ धाःगु दु। बैठकं प्रम नेपालया भारत भ्रमणया एजेन्डायात अनुमोदन याःगु दु ।
बैठकं प्रधानमन्त्रीया भारत भ्रमणय् वनीपिं सरकारी पुचःयात नं अनुमोदन याःगु दु। प्रधानमन्त्रीया भारत भ्रमणय् मन्त्री, कर्मचारी, सभासद्, व्यापारी व पत्रकार यानाः ६५ म्ह दुजः दुथ्याः ।
अथे हे भ्रमणय् जुइगु खर्चयात नं अनुमोदन याःगु दु। भ्रमणय् गुलि खर्च जुइ धइगु खँ धाःसा सार्वजनिक मयाःनि।
प्रमया भारत भ्रमणया झ्वलय् नेपाः-भारत दथुया व्यापार सन्धि नवीकरण व उर्जा सम्बन्धी एजेन्डायात स्वीकृति बिउगु दु। बैठकय् प्रम नेपालं नेपालय् न्ह्यानाच्वंगु शान्ति प्रक्रिया बारे भारतीय समकक्षीयात जानकारी याकीगु खँ नं धाःगु दु ।
